काठमाडौं- नेपाली कांग्रेसको संसदीय दलको बैठकमा प्रधानमन्त्रीको राजीनामा माग्न अग्रसरता लिनुपर्ने माग उठेको छ। औपचारिक रुपमा निर्णय गरी प्रधानमन्त्रीलाई हटाउने सक्रियता कांग्रेसकै हुनुपर्ने माग बैठकमा उठेको हो।
शुक्रबार बसेको संसदीय दलको बैठकमा सांसद गगन थापाले संसदीय दलले केपी शर्मा ओलीको राजीनामा दिनुपर्ने मागसहितको निर्णय गर्नुपर्ने बताएका थिए। अन्य सांसदहरुको भन्दा फरक विचार थापाले राखेका थिए।
उनले भने- ‘प्रधानमन्त्रीमा ओलीलाई थप समय स्विकार्नै सकिन्न। ओली प्रधानमन्त्रीमा निरन्तरता रहँदा देशका लागि र कांग्रेसकै लागि पनि उपयुक्त हुँदैन।’ ओलीलाई हटाउने अग्रसरता कांग्रेसले लिनुपर्ने उनको राय थियो। कांग्रेसले उनलाई हटाउन अग्रसरता लिएपनि उनले राजीनामा दिने सम्भावना भने नरहेको उनको बुझाइ थियो।
थापाले बैठकमा भने- ‘राजीनामा नदिएपछि नै कांग्रेसको अग्रसरता बढ्ने हो। त्यसपछिको चरणमा कांग्रेस आफैंले अविश्वासको प्रस्ताव ल्याउने हो कि अरुसँग मिलेर अविश्वासको प्रस्ताव ल्याउने छलफल गर्न सकिन्छ।’
दुईटा नेकपा एउटै हुन् भनि अब पनि कांग्रेस बसिरहे कांग्रेसप्रति नै प्रश्न उठ्ने उनको भनाइ थियो। शुक्रबारको बैठकले प्रधानमन्त्रीको राजीनामा माग्ने निर्णय गरि अघि बढौं भन्ने उनको राय थियो।
बैठकमा बोल्ने सांसदहरूले प्रधानमन्त्री ओलीसँग सत्ता सहकार्य गर्नै नहुने राय नेतृत्वलाई दिएका छन्। बैठकमा बोल्न समय लिएका सांसदले प्रधानमन्त्री ओली प्रतिगमनकारी भएकाले उनलाई साथ दिन नहुने सुझाव दिएका छन्। प्रतिनिधि र राष्ट्रिय सभा दुवैतर्फका सांसद बोलाइएको बैठकमा २९ जनाले आफ्नो धारणा राखेका थिए।
अधिकांशको राय ओलीसँग सरकार बनाउनै नहुने र कांग्रेसलाई नेतृत्व आए छोड्न नहुने तर्क अघि सारेका थिए। उनीहरुको भनाइ थियो, ‘ओलीको सरकार हटाउनुपर्ने पनि छ। बहुमतको सरकार बनाउँदिन भनियो भने कसरी ओली हटाउने?’ बहुमतको सरकार बनाउन कांग्रेसले पहल यो बेला नगर्ने हो भने ‘कहिल्यै पनि कांग्रेसले बहुमतको सरकार’बनाउनतिर लाग्दैन भन्न सक्नुपर्ने तर्क राखेका थिए।
सभापति शेरबहादुर देउवा र संस्थापनइतरका सबै सांसदले ओलीका निर्णयलाई असंवैधानिक भएको पार्टीले निर्णय गरीसकेकाले भावी सरकार उनी पक्षसँग नहुने राय नेतृत्वलाई दिएका छन्। सभापति देउवाले संसदमा कांग्रेसको भूमिकाका सन्दर्भमा राय दिन समय दिएका थिए। बोल्नका लागि नाम टिपाएका सबैले ओलीको विगतको कामकारबाहीबारे धारणा राखे।
बैठकमा उठेको विषयबारे एक सांसदले भने, ‘ओलीलाई साथ दिइयो भने लोकतन्त्र नै समाप्त पार्न लाग्छन्।’ नैतिकताको आधारमा प्रधानमन्त्रीको ओलीको वैधानिकता सकिएको निर्णय पार्टीले धेरै अघि गरिसकेकाले ओली पक्षलाई साथमा लिएर जानै नहुने उनीहरुको तर्क थियो।
संविधानको ‘हत्या गर्ने’ ओलीसँग सहकार्य गर्नु भनेको कांग्रेसको मूल्य, मान्यता विपरीत हुने उनीहरूको तर्क थियो। ओली पक्षसँग सत्ता गठबन्धन गरी सरकार बनाउँदा आगामी निर्वाचनमा कांग्रेसले जनता माझ उठाउने मुद्दा नहुने विषय समेत सांसदहरुले उठाएका थिए। ओली पक्षले कांग्रेसलाई प्रधानमन्त्री दिएपनि स्विकार्न नहुने सुझाव सांसदहरुको छ। संविधान उल्लंघन गरी प्रतिनिधि सभा विघटन गर्ने ओलीलाई साथ दिँदा लोकतन्त्रको मर्ममाथि नै प्रहार हुने उनीहरुको भनाइ छ।
कांग्रेसले सरकारको नेतृत्व गर्ने अवस्थामा प्रचण्ड–माधव पक्षलाई साथ लिएर सत्ता सञ्चालन गर्नुपर्ने राय अधिकांशको छ। केही सांसदले कांग्रेसले निर्वाचनमा पाएको मत प्रतिपक्षमा बस्ने रहेकाले सरकार बनाउन सहयोग गरी बाहिरबाट साथ दिन सकिने सुझाव पनि दिएका थिए। शुक्रबारको बैठकले कुन पक्षसँग सहकार्य गर्ने औपचारिक निर्णय नगरेपनि प्रचण्ड–माधव पक्षसँग नजिकिने संकेत गरेको छ। सरकारमा जाँदा जनताबीच श्वेतपत्र जारी गरी जानुपर्ने मत पनि केही सांसदले राखेका थिए।
२३ गते पुनःस्थापित प्रतिनिधि सभाको बैठक बोलाइएको छ। संसद बैठक बस्नुअघि सांसदहरुको राय संकलन गर्न देउवाले संसदीय दलको बैठक बोलाएका थिए।
नेकपाको प्रचण्ड-माधव पक्षले यसअघि नै कांग्रेस सभापति शेरबहादुर देउवालाई भेटेर सत्ता सहकार्यको प्रस्ताव गरेका थिए। सभापति देउवा कांग्रेसलाई प्रधानमन्त्री बन्ने अवस्था आए सरकारमा जानुपर्नेमा अडिग छन्। सरकारको नेतृत्व प्राप्त भए पछि हट्न नहुने पक्षमा वरिष्ठ नेता रामचन्द्र पौडेल खेमाका कतिपय नेता पनि देखिएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1763721444.png)
-1765273665.jpg)
