नयाँ पार्टी गठनमा जुटे हृदयेश त्रिपाठी

राजनीति

वीरेन्द्र ओली मंगलबार, फागुन ४, २०७७ २०:३९

फाइल तस्बिर

काठमाडौं- स्वास्थ्य तथा जनसंख्यामन्त्री हृदयेश त्रिपाठीले छिट्टै नयाँ पार्टी गठन गर्ने तयारी गरेका छन्। गएको निर्वाचनमा सूर्य चिह्न लिएर स्वतन्त्र उम्मेदवारका रुपमा निर्वाचन लडेका त्रिपाठीले आफ्नै नेतृत्वमा पार्टी खोल्न लागिपरेका हुन्। यतिबेला पार्टी गठनको तयारीमा सक्रिय उनले आउने एक/डेढ महिनामै घोषणा गर्ने बताएका छन्।

आफ्नो पार्टी सैद्धान्तिक रुपमा प्रगतिशील विचारमा आधारित हुने उनको भनाइ छ। ‘पार्टीले प्रगतिशील विचार बोक्नेछ। वर्गका हिसाबले साना व्यापारी र मजदुर वर्गको प्रतिनिधित्व गर्नेछ,’ त्रिपाठीले भने।

समाजमा व्याप्त विभेदहरु समाप्त पार्ने उद्देश्य पार्टीको हुने बताउँदै समाजवाद उन्मुख राज्यव्यवस्थाका लागि लड्ने उनको दाबी छ। स्वतन्त्र भएपनि नेकपा निकट रहेर काम गर्दै आएका त्रिपाठीले नेकपा विभाजनसँगै आफ्नो पार्टीको आवश्यकता महसुस गरेका हुन्।

त्रिपाठी र उनका कार्यकर्तालाई नेकपा प्रवेश गराउने तयारी थियो। त्रिपठी समूह पर्ख र हेरको अवस्थामा रहेको थियो। तर, प्रतिनिधि सभा विघटनपछि नेकपामा आएको विग्रहले उनी पार्टी गठनतर्फ लागेका हुन्।

२०७४ मंसिरमा भएको निर्वाचनमा हृदयेश त्रिपाठी समूह तत्कालीन एमालेको चुनाव चिह्न सूर्य लिएर निर्वाचनमा गएको थियो। एमाले प्रवेश गर्ने अपेक्षासहित त्रिपाठी समूहलाई वाम गठबन्धनले आफ्नो उम्मेदवार नउठाएर सहयोग गरेकोे थियो। गठबन्धनकै सहयोगमा त्रिपाठी समूहबाट प्रतिनिधि सभामा दुई जना र प्रदेश सभामा तीन जना निर्वाचित भएका थिए।

प्रतिनिधि सभामा नवलपरासी क्षेत्र नम्बर १ बाट त्रिपाठी निर्वाचित भएका थिए भने कपिलवस्तु क्षेत्र नम्बर २ बाट वृजेशकुमार गुप्ता निर्वाचित भए। यस्तै प्रदेश सभातर्फ धर्म बहादुरलाल श्रीवास्तव कपिलवस्तु क्षेत्र नम्बर २ को ‘ख’ निर्वाचित भए। दीर्घनारायण पाण्डेय कपिलवस्तु क्षेत्र नम्बर २ को ‘क’बाट र अजय शाही नलपरासी पश्चिम क्षेत्र नम्बर १ को ‘ख’बाट निर्वाचित भएका थिए। पाण्डेय यसअघि नै नेकपा प्रवेश गरिसकेका छन्।

त्रिपाठी समूहले २०७५ मंसिर र २०७६ को भदौमा भएको राष्ट्रिय भेलाले कुनै पार्टी प्रवेश नगरी स्वतन्त्र संगठनको रुपमा रहने निर्णय गरेको थियो। नेकपासँग एकता गर्नेबारे छलफल भएपनि पद र मर्यादाक्रम मिल्न नसकेपछि त्रिपाठी समूह आफैंलाई व्यवस्थित बनाएर अघि बढ्ने निष्कर्षमा पुगेको हो।

त्यो समय तत्काल छुट्टै पार्टी गठन गर्दा वा नेकपा बाहेक दलमा प्रवेश गर्दा सांसद पद नरहने स्थिति देखिएपछि त्रिपाठी समूह स्वतन्त्र बसेको थियो।
निर्वाचित भएका जिल्लामा पनि आफ्नो संगठन बलियो भएकाले स्वतन्त्र रहने निष्कर्षमा त्रिपाठी समूहका पुगेको थियो। प्रदेश २ मा प्रभाव जमाएपछि अन्य क्षेत्रमा आफ्नो समूह विस्तार गर्ने योजना त्रिपाठीले त्योबेला बनाएका थिए।

त्रिपाठी वामपन्थी विचारबाट प्रभावित भई राजनीतिमा होमिएका थिए। राजनीतिमा होमिँदै गएपछि स्वर्गीय गजेन्द्रनारायण सिंहले नेतृत्व गरेको सदभावना पार्टीमा प्रवेश गरे। सद्भावना पार्टीबाट २०४८, २०५१ र २०५६ सालमा लगातर निर्वाचित भए। मधेस आन्दोलन भएपछि तराई मधेस लोकतान्त्रिक पार्टी प्रवेश गरेका उनी २०६४ साल पहिलो संविधान सभामा निर्वाचित भए।

त्रिपाठी २०५४ सालमा वनमन्त्री, दोस्रो जनआन्दोलन लगत्तै बनेको सरकारका उद्योग वाणिज्य तथा आपूति, २०६९ सालमा भौतिक तथा यातायात मन्त्री, त्यसपछि यही सरकारमा संघीय मामला तथा सामान्य प्रशासन मन्त्री र हाल स्वास्थ्य तथा जनसंख्या मन्त्री छन्।

यस्तै प्रतिनिधि सभा निर्वाचित वृजेशकुमार गुप्ता राष्ट्रिय प्रजातन्त्र पार्टीको पृष्ठभूमिबाट आएका हुन्। यादव २०५६ सालमा राप्रापाबाट निर्वाचित भएका थिए। मधेस आन्दोलनपछि तराई मधेस लोकतान्त्रिक पार्टीमा प्रवेश गरे। सोही पार्टीबाट पहिलो सविधान सभा र दोस्रो सविधान सभा निर्वाचनमा प्रत्यक्ष निर्वाचित भए। उनी २०६१ सालमा भौतिकमन्त्री र २०६९ साल कानुनमन्त्री भएका थिए।

राजनीतिक दल गठन गरेपछि सरकारलाई अप्ठ्यारो परेमा छोड्न सकिने उनले बताए। ‘हामीले स्वतन्त्र राजनीतिक समूहलाई राजनीतिक दलको रुपमा गठन गर्ने तयारी गरेका छौं। सरकारलाई बाधा भयो भने छाड्न सकिन्छ,’ उनले नेपाल लाइभसँग भने, ‘अहिले पनि सरकारमा भएको दलको सदस्य कानुनी र व्यवहारिक दुवै रुपमा होइन। सम्झौतामा सूर्य चिह्न लिएर निर्वाचन लडेका मात्र हौं।’