काठमाडौं- सेयर बजारले मंसिर ११ गतेदेखि लगातार नयाँ रेकर्ड कायम गर्दै आएको छ। लगानीकर्ताले अपेक्षा गरेभन्दा आक्रामक रुपमा सुधारिएको सेयर बजारले बुधबारसम्ममा 'अल टाइम हाई' २२८६ अंक कायम गरिसकेको छ। सेयर बजार बुलिस ट्रेण्डमा रहेको र अझै दुई वर्ष सुधारकै अवस्थामा रहने लगानीकर्ताको विश्लेषणले बजार आक्रामक रुपमा सुधार भइरहेको छ।
बजार करेक्सन नभई आक्रामक रुपमा सुधार भइरहेकाले कुनै पनि बेलामा ठूलै अंकले घट्न सक्ने प्रावधिक विश्लेषक अरुण लामाको तर्क छ। बजार बुलिस ट्रेण्डमा रहेकाले लगानीकर्ताको मनोविज्ञान उच्च रहेको विश्लेषकहरु बताउछन्। बैंकिङ ब्याजदरलगायतका कुराहरुले बजारलाई अझै पनि राम्रो सपोर्ट गरेकाले बजार अझै केही समय सुधार भइरहेको बजार विश्लेषक अम्बिका प्रसाद पौडेलको विश्लेषण छ।
बजारको साइकलअनुसार अझै तीन वर्षसम्म लगातार सुधार हुनुपर्ने देखिए पनि पछिल्लो समयको आक्रामक सुधारले यस्तो समय छोट्टिन सक्ने उनको तर्क छ। यदि बजारमा करेक्सन नभई सुधार भयो भने दीर्घकालीन अवधिसम्म टिक्नसक्ने अवस्था रहन्छ। सामान्यतया ५ सय अंकको सुधारमा २ सय अंकसम्मको करेक्सनलाई सामान्य रुपमा हेरिन्छ। तर एक वर्षको अवधिमा सेयर बजार एक हजार अंकभन्दा धेरैले सुधार भएको छ।
प्राविधिक रुपमा एकोहोरो सुधारलाई सकारात्मक मानिँदैन। यसले बजारमा कुनै पनि बेला एक्सिडेन्ट हुने संकेत गर्दछ। तर तीन वर्षदेखि लगातार गिरावट भएका कारण पछिल्लो समय आक्रामक रुपमा बजार बढिरहेको छ। बैंकिङ तरलता उच्च हुँदा ब्याजदर घटिरहेको छ। यसले प्रत्यक्ष रुपमा बजार सुधार हुन सपोर्ट गरिरहेको विश्लेषकहरु बताउछन्। अहिलेको बजार यस्तै गतिमा गइरहेमा तीन हजार अंकसम्म पुग्न सक्ने विश्लेषकहरु बताउछन्।
यदि राष्ट्र बैंकले यसअघि जस्तै सेयर बजारमा जाने कर्जामा कडाइ नगरेसम्म बजार सुधार भइरहने विश्लेषकहरु बताउँछन्। राष्ट्र बैंकले पहिलो तीन महिनाको मौद्रिक समिक्षा गर्ने क्रममा बैंकिङ कर्जा सेयर बजारमा गइरहेको र यसलाई कडाइ गर्ने नीति लिएको थियो। यसले तत्कालीन अवस्थामा दोस्रो बजारमा गिरावट आएको थियो। तर राष्ट्र बैंकले पुनः सेयर बजारमा गएको कर्जालाई कडाइ नगर्ने भन्दै लगानीकर्तालाई आश्वान दिए पनि सुधार हुन थालेको थियो। अहिलेको बजारको सुधारलाई नियामक निकायको कडाइ गर्ने नीति नआउन्जेल सुधार हुने विश्लेषकहरु बताउछन्।
बजार यति अंकसम्म पुग्न सक्छ भनेर कसैले पनि भन्न सक्दैन तर विश्लेषकहरुले विभिन्न सैद्धान्तिक आधारहरुलाई टेकेर विश्लेषण गरिरहेका हुन्छन्।
तत्कालका लागि बजारमा कुनै पनि खतरा नभए पनि यही गतिमा बजार सुधार भइरह्यो भने खतरा बढ्दै जाने विश्लेषकहरु बताउँछन्। अझै पनि केही कम्पनीको सेयर सुधार हुन बाँकी भएकाले बजार सुधार हुने ठाउ रहेको विश्लेषक पौडेलको तर्क छ।
हिजोका दिनमा शिवम् सिमेन्ट तीन सय रुपैयाँ प्रिमियमा सेयर बिक्री गर्न खोज्दा बिक्न सकेको थिएन। तर अहिले यही कम्पनीको सेयर मूल्य १६ सयभन्दा माथि छ। जवकी शिवम् सिमेन्टले प्राथमिक सेयर निष्काशन गर्दा सार्वजनिक गरेका सूचक अहिले धेरै कमजोर छन्। हौसिएर कमजोर कम्पनीमा लगानी गर्नुभन्दा वित्तीय विवरण अवस्था हेरेर लगानी गर्नु सबैभन्दा धेरै बुद्धिमता हुने पौडेलको सुझाव छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
