किवी खेतीले मनग्य आम्दानी

कृषि

रासस मंगलबार, मंसिर २, २०७७ १४:३३

धादिङ- धादिङको नीलकण्ठ नगरपालिका–३ सिरानबजारका श्रीकृष्ण अधिकारी किवी खेती शुरु गरेपछि मनग्गे आम्दानी गर्न थालेका छन्।

वैदेशिक रोजगारीबाट फर्केर गाउँमै किवी खेती शुरु गरेका उनी आफूसँग काम गर्ने आँट र जाँगर भए रोजगारीका लागि विदेश जानु पर्दैन भन्ने उदाहरण बन्न सफल भएका छन्। अर्काको देशमा जति काम गर्दा पनि आफ्नै गाउँघरको यादले नछाडेपछि उनी विदेशको जागिर छाडेर गाउँ फर्किएका थिए।

विदेशमा गरेको कामले सन्तुष्टि नपाएका अधिकारी पाँच वर्षअघिदेखि नीलकण्ठ नगरपालिका–१४ काउलेमा किवी खेती गरेर मनग्य आम्दानी गर्न थालेका हुन्।

तिहारको समयमा मानिसलाई विदेशबाट ल्याएको मसलाको सट्टा गाउँकै पौष्टिक फल किवी हालेर दाजुभाइलाई कोसेली दिन आग्रह गरेका अधिकारीको अहिले अधिकांश समय किवी बारीमा बित्ने गरेको छ। विसं २०५८ मा मलेसिया गएका अधिकारी चार वर्ष बसेर नेपाल फर्किएका हुन्। घरमा कपडा पसल समेत छ तर व्यवसायभन्दा पनि खेतीमा रमाउन चाहने अधिकारी अहिले जिल्लाका चर्चित किवी किसानका रुपमा चिनिएका छन्।

घर फर्किएपछि आफ्नै गाउँठाउँमा केही गरेर आयआर्जन गर्नुपर्छ भन्ने आत्मविश्वासका साथ उनले शुरु गरेको किवीखेती अहिले नमूना कृषि व्यवसायका रुपमा चिनिन थालेको छ। व्यावसायिक रुपमा शुरु गरिइएको किवीखेतीले अधिकारीलाई अहिले धेरैले चिन्न थालेका छन्।

पाँच वर्षअघि तीन सय बोटबाट सुरु गरेको किवी खेतीले अहिले राम्रो उत्पादन दिन थालेको उनको भनाइ छ। यो वर्ष एक हजार ५०० केजी किवी बिक्री गर्ने योजना रहेको अधिकारीले बताए। बाँझो जमिनको सदुपयोग गरी शुरु गरिएको किवी शुद्ध अर्गानिक रहेको उनको भनाइ छ। नीलकण्ठ नगरपालिकाको माथिल्लो भागका साथै जिल्लाका अन्य गाउँबस्तीमा पनि व्यावसायिक रुपमा किवी खेती गर्न सकिने अधिकारीले बताए।

समुद्री सतहबाट एक हजार मिटरभन्दा माथिको उचाइमा किवीको उत्पादन लिन सकिन्छ। फलफूलमध्ये सबैभन्दा धेरै पौष्टिकतत्व भएको फलको रुपमा किवी रहेको छ। किवीको फल र बिरुवा दुवैबाट फाइदा लिन सकिन्छ। एउटै रुखमा ५० देखि ७० किलोग्रामसम्म फल लाग्छ भने प्रतिकिलो ४०० देखि ६०० रूपैयाँसम्ममा सजिलैसँग बिक्री हुने गरेको किसानको भनाइ छ।

धादिङ जिल्लामा सोयु, हेवार्ड, आलीसान, टोमरी र मन्टी जातको किवी खेती गर्ने गरिन्छ। व्यावसायिक रुपमा खेतीको शुरुआत गरिएपनि जिल्लामा विशेषज्ञ सेवा नपाउँदा रोग निवारणमा समस्या हुने गरेको अधिकारीको भनाइ छ। स्थानीय सरकारले आफूसँग किवी खेतीसम्बन्धी प्राविधिक नभएको जनाएको छ। कृषि ज्ञान केन्द्रले प्राविधिक सेवा दिने भने पनि कुनै पनि कर्मचारी र प्राविधिकलाई यस क्षेत्रमा परिचालन गर्न नसकिएको किसानको गुनासो छ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।