काठमाडौं–नेपाल उद्योग वाणिज्य महासंघको ५४ औं साधारण सभा यही मंसिर ११ देखि १३ गतेसम्म काठमाडौंमा हुँदैछ। महासघंको नेतृत्व चयनसहितको साधारणसभाका लागि व्यवसायीहरु दुई समूहमा विभाजित भएका छन्।
महासंघको विधानअनुसार वर्तमान वरिष्ठ उपाध्यक्ष शेखर गोल्छा ५४ औं साधारणसभाबाट स्वतः अध्यक्ष हुनेछन्। वरिष्ठ उपाध्यक्ष स्वतः अध्यक्ष हुने भएसँगै अहिले वरिष्ठ उपाध्यक्षका लागि दुई प्यानल चुनावी मैदानमा छन्।
महासंघका दुई उपाध्यक्षहरू किशोरकुमार प्रधान र चन्द्रप्रसाद ढकाल आ-आफ्नो प्यानलको नेतृत्व गरी चुनावी मैदानमा उत्रिएका छन्। प्रधानको प्यानलमा एसोसिएट उपाध्यक्षमा सौरभ ज्योती, वस्तुगत उपाध्यक्षका लागि अञ्जन श्रेष्ठ र जिल्ला नगर उपाध्यक्षमा दिनेश श्रेष्ठले उम्मेदवारी दिएका छन्।
यसैगरी ढकालको प्यानलमा एसोसिएट उपाध्यक्ष पदका लागि रामचन्द्र संघाई, वस्तुगत उपाध्यक्षका लागि उमेशलाल श्रेष्ठ र जिल्ला नगर उपाध्यक्षका लागि गुणनिधि तिवारी अघि सरेका छन्। दुवै प्यानलका उम्मेद्वारले दावेदारी प्रस्तुत गर्दै भोट माग्न थालिसकेका छन्। यसबाहेक पनि ६० जना कार्यकारिणी सदस्यका लागि पनि प्यानलजस्तै उमेद्वारी घोषणा भएको छ।
चुनावी सरगर्मी सुरु भएसँगै दुवै समूह जिल्ला दौडमा छ। ढकाल समूहले पश्चिमबाट जिल्ला दौड सुरु गरेको थियो भने प्रधान समूहले पूर्वबाट। पश्चिमबाट चुनावी अभियान सुरु गरेको ढकाल समूह अहिले पूर्व पुगेको छ भने पूर्वबाट चुनावी दौड सुरु गरेको प्रधान समूह पश्चिम पुगेको छ।
व्यवसायीलाई तिहारभन्दा पनि चुनाव बढी लागेको थियो।
वरिष्ठ उपाध्यक्ष गोल्छाले अघिल्लोपटकका आफ्ना प्रतिस्पर्धी प्रधानलाई समर्थन गरेका छन्। महासंघकी अध्यक्ष भवानी राणाले पनि प्रधानलाई नै वरिष्ठ उपाध्यक्षका रूपमा देख्न चाहेको बताएकी छन्। गोल्छाका आलोचकले ‘भावी अध्यक्ष सन्तुलित हुन नसकेको’ आरोप लगाएका छन् भने उनका समर्थकले ‘अध्यक्षले आफू अनुकूलको टिम बनाउन खोजेको’ बताउने गरेका छन्।
निर्वतमान अध्यक्ष पशुपति मुरारका पनि प्रधानको पक्षमा भोट माग्दै हिँडेका छन। उनीसहित पूर्वअध्यक्षहरू विनोद श्रेष्ठ र कुशकुमार जोशीले पनि प्रधानको पक्षमा लबिङ गरिरहेका छन्।
यता ढकाल प्यानलको चुनावी कमाण्ड महासंघका विशिष्ठ सदस्य एवं पूर्वअध्यक्ष चण्डीराज ढकालले सम्हालेका छन्। जिल्ला, नगरतर्फ बलियो पकड भएका उनले ढकाललाई वरिष्ठ उपाध्यक्षमा जिताउने जिम्मेवारी पाएका छन्। महासंघको निर्वाचनमा जिल्ला नगरतर्फको भोटको भार बढी हुन्छ।
महासंघको जिल्ला, नगरतर्फको भोट कूल सय प्रतिशत भारमा ५० प्रतिशत हो। यसैगरी महासंघका एसोसिएटको भार ३० प्रतिशत र वस्तुगतको भार २० प्रतिशत रहेको छ। जितका लागि ५१ प्रतिशत मत ल्याउनु पर्नेछ।
तर, पूर्वअध्यक्षहरुले भने कोभिडका कारण थला परको अर्थतन्त्र सुधारका लागि अहिले व्यवसायीहरु एक ढिक्का भएर जानु पर्ने बताउँदै आएका छन्। उनीहरूले यो बेला व्यवसायीहरु २ समूहमा विभाजन भएर चुनावी मैदानमा जानु भन्दा सहमतिमै नेतृत्व चयन हुनुपर्नेमा जोड दिँदै आएका छन्।
पूर्वअध्यक्षहरुको भनाइमा वरिष्ठ उपाध्यक्ष पदका उम्मेद्वार चन्द्र ढकाल र किशोर प्रधान पनि सहमत छन्। दुवैले सहमतिको ढोका खुला रहेको बताउँदै आएका छन्। तर, एकले अर्कोलाई छोड्न भने अहिलेसम्म राजी भइसकेका छैनन्।
महासंघको ५१ औं साधारणसभामा एकै ठाउँमा रहेका व्यवसायीहरु अहिले विभाजित छन्। ५१ औं साधारणसभामा वर्तमान अध्यक्ष भवानी राणा, वरिष्ठ उपाध्यक्ष शेखर गोल्छा, निर्वतमान अध्यक्ष पशुपति मुरारका र विशिष्ठ सदस्य चण्डिराज ढकाल एउटै टिममा थिए भने प्रधानमात्रै अलग समूहमा थिए।
तर, अहिले ठीक उल्टो भएको छ। चन्द्र ढकालको टिममा विशिष्ठ सदस्य तथा पूर्वअध्यक्ष चण्डिराज ढकालमात्रै छन् भने अन्य सबै प्रधानको टिममा पुगेका छन्।
किन गुट परिर्वतन?
गुट परिर्वतनको खेल महासंघमा भवानी राणा अध्यक्ष भएसँगै सुरु भएको थियो। ५१ औं साधारणसभाबाट वरिष्ठ उपाध्यक्षमा विजयी भएका शेखर गोल्छालाई ५४ औं साधारणसभाबाट स्वतः अध्यक्ष हुन नदिने गरी चण्डिराज ढकालले सुरु गरेको विधान संशोधनको खेलका कारण नै ५१ औं साधारणसभामा एकै प्यानलमा रहेका गोल्छा, मुरारका र राणाले गुट परिर्वतन गरेका व्यवसायीहरु बताउँछन।
महासंघको विधानमा वरिष्ठ उपाध्यक्ष नै स्वतः अध्यक्ष हुने व्यवस्थालाई संशोधनगरी गोल्छालाई ५४ औं साधारणसभाबाट स्वतः अध्यक्ष हुन रोक्ने खेलको सुरुवात चण्डीराज ढकालले गरेका थिए। ढकालले विधान संशोधनको खाकासमेत तय गरी महासंघका बुझाएका थिए। तर, महासंघका पदाधिकारी तथा कार्यकारिणी सदस्यहरुले २०७६ कात्तिकबाट विधान संशोधनको खेल अन्त्य गरिदिएका थिए।
विधान संशोधनको खेलमा ५१ औं साधारण सभामा गोल्छासँग नै वरिष्ठ उपाध्यक्षमा प्रतिस्पर्धा गरेका प्रधानले गोल्छा समूहलाई सहयोग गरेका थिए। गोल्छाले पनि प्रधानलाई वरिष्ठ उपाध्यक्षका लागि सहयोग गर्ने वाचा गरेका थिए। गोल्छालाई स्वतः अध्यक्ष हुनबाट रोक्ने खेलको विरोधमा मुरारका पनि थिए। यसरी सुरु भएको विधान संशोधनको खेल महासंघ अध्यक्ष भवानी राणालेसमेत गोल्छा र मुरारकाको सहयोगमा तुहाइदिएकी थिइन्। त्यसपछि चण्डीराज ढकाल कोभिडका कारण निर्वाचन सारेको समयमा राणामाथि सार्वजनिक रुपमै गालीगलौजमा उत्रिएका थिए।
पूर्व अध्यक्ष ढकालविरुद्ध प्रधानले महासंघको इतिहासमै पहिलोपटक खेद प्रस्ताव दर्ता गराएका थिए। उक्त प्रस्तावसमेत महासंघको कार्यकारिणी समितिबाट पारित भएको थियो। जसका कारण महासंघको ५१ औं साधारण सभाबाट बनेको गुट भत्किएको छ, जुन अहिलेसम्म पनि जारी छ।
सहमतिको खाका
पूर्वअध्यक्षहरुले सहमतिका लागि वार्ता गरिरहँदा व्यवासायी वर्गमा एउटा सहमतिको खाता तयार भएको एक पूर्वअध्यक्ष बताउँछन्।
व्यवसायी वर्गमा अहिले महासंघमा चण्डीको प्रभावलाई सदाका लागि अन्त्य गर्ने गरी सहमतिको खाकाको तयारी भएको बताइएको छ। तर, केही पूर्वअध्यक्षले त्यस्तो प्रस्तावलाई स्वीकार गर्न नसक्ने बताउँदै आएका छन्।
एक पूर्वअध्यक्षका अनुसार महासंघको ५४ औं साधारण सभापछि विधान संशोधन गरेमा व्यवसायी किशोर प्रधानलाई महासंघको आजीवन मानार्थ सदस्य बनाउने र चन्द्रप्रसाद ढकाललाई वरिष्ठ उपाध्यक्ष बनाउने तयारी भएको छ। तर, त्यसका लागि चन्द्र ढकालले पूर्वअध्यक्ष चण्डी ढकालको साथ सधैंका लागि छोड्नु पर्ने सर्त अघि सारिएको छ।
यसैगरी पूर्वअध्यक्षहरुबाट चयन गरिने एक विशिष्ठ सदस्यका रुपमा निर्वतमान अध्यक्ष पशुपति मुरारकालाई चयन गर्ने र महासंघलाई चण्डीको प्रभावबाट मुक्त गराउने अवस्था आएमा सहमति हुने ती पूर्वअध्यक्षले जानकारी दिए।
यसरी सहमति भएको अवस्थामा प्रधान प्यानलबाट उमेद्वारी दिएका सौरभ ज्योतिलाई एसोसिएट र अञ्जनलाई वस्तुगत उपाध्यक्ष बनाउने र ढकाल समूहबाट गुणनिधीलाई जिल्ला,नगरतर्फको उपाध्यक्ष बनाउने गरी सहमतिको खाका तयार भएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749801778.jpg)
-1749826086.png)
