कोरियाको १० वर्षे बसाइ श्रमिकका गुनासा सुनेर बिताए ‘ईपियस छिङगु’ ले

प्रवास

शिव भुसाल आइतबार, असोज २५, २०७७ १२:३९

सिओल–ईपियस भाषा परीक्षा उत्तिर्ण गरी कोरिया आएका नेपालीको संख्या करिब ४० हजार छ। कोरिया रोजगारीका दौरान उनीहरुले भाषागत कमजोरी, कोरियाली कानुन, अपरिचित ठाउँमा एक्लै काम गर्नुपर्दा हुने होम सिक, स्वास्थ्यका समस्या, अप्ठेरो काम, रोजगारदाताको हेपाईलगायत थुप्रै समस्या तथा पीडा सामना गर्नु परिरहेको हुन्छ। नेपाल सरकारले यहाँका श्रमिकका समस्या सुन्नका लागि एक जना श्रम सहचारीको व्यवस्था त गरेको छ। तर एक जना श्रम सहचारी ४० हजार नेपाली श्रमिकको पहुँचमा पुग्न कठिन छ।

विविध समस्या झेलिरहेका नेपाली श्रमिकका लागि यहाँ आई लामो समय बसेका, कोरियाली भाषादेखि कानुनमा ज्ञान राख्ने केही नेपालीहरुले स्वयंसेवकका रुपमा काउन्सिलिङ तथा अन्य समस्या समाधानमा सहयोग गर्दै आईरहेका छन्।
यस्तै सहयोगी नेपालीमध्येको एउटा नाम हो अरुण श्रेष्ठ उर्फ ‘ईपियस छिङगु’ ।

उनले आफ्नो कोरिया बसाइका १० वर्ष कोरियामा भाषाकै कमजोरीका कारण अस्पतालदेखि हरेक क्षेत्रमा समस्या झेल्नु परेका नेपाली श्रमिकका लागि कोरियन भाषामा उनीहरुका समस्या सम्बन्धित ठाउँमा बुझाईदिने दोभाषेको काम समेत गरिरहे। यसका अलावा कृषि क्षेत्रलगायत कम्पनीमा एक्लै काम गरिरहेका श्रमिकका हरेक समस्यालाई अनलाईन काउन्सिलिङ गरिरहे।

ईपियस भाषा परीक्षा उत्तिर्ण गरी सन् २०१० मा कोरिया आएका श्रेष्ठ कोरियामा करिब १० वर्षे वैधानिक बसाई टुंग्याएर गत साता स्वदेश फर्किएका छन्।

उनको समाजसेवाकै कारण ‘ईपियस छिङगु’ नाम अहिले कोरियामा एउटा सेवकको नामको रुपमा परिचित बनेको छ।
उनले कोरिया बसाईका दौरान यहाँ कार्यरत नेपाली श्रमिकमा डिप्रेसन तथा मानसिक तनाव मुख्य समस्याको रुपमा देखिएको आफूले पाएको बताउँछन्।

कोरियामा कृषि क्षेत्रमा बिदा, तलब सुविधा, काम गर्ने समयलगायत थुप्रै समस्याहरु रहेको, सम्पूर्ण अधिकार रोजगारदातामा निहित रहेकाले यहाँका श्रमिकहरुले मानसिक तनाव झेल्नुपरिरहेको उनी बताउँछन्।

उनले कोरियामा हुने अधिकांश आत्महत्याका घटनामा रोजगारदातामा मात्र निहित श्रम कानुन भएको दाबी गर्छन् । काम गर्न नसके पनि सजिलै कम्पनी परिवर्तन गर्न नपाएर पीडित श्रमिकलाई आफूले सक्दो सहयोग गरेको उनी बताउँछन्।

काठमाण्डौ बौद्ध स्थायी निवासी उनी सन् २०१० मा कोरियामा कृषि क्षेत्रमा तरकारीमा खेती गर्ने फिनिल हाउसमा आएका हुन्। तर काम सुरु गरेको ४ दिनमै साहुले काम गर्न नसक्ने भन्दै कामबाट निकालिदिए। नेपालमा शिक्षण पेशा गरेका श्रेष्ठले काम छिटोछिटो गर्न नसकेको भन्दै कोरिया आएको ४ दिन मै कामबाट निकालिनुपरेको तितो अनुभव सुनाए। त्यसपछि साहुले रोजगार केन्द्रमा लगेर छाडिदिएको र त्यहाँबाट लाईभ स्टक कम्पनीमा काममा लागेर निरन्तर सोही कम्पनीमा काम गरेको उनी सुनाउँछन्।

कोरिया आईसकेपछि आफूले भोगेको पीडाले गर्दा नयाँ आउने तथा समस्यामा परेका नेपाली श्रमिकलाई सहयोग गर्नुपर्छ भन्ने सोच पलाएको उनी सुनाउँछन्। सुरुमा ईपियस कोरिया नेपाल नामक फेसबुक पेज खोलेर ईपियससम्बन्धी सम्पूर्ण सूचनाहरु दिन सुरु गरेको र पछि श्रमिकका गुनासा आउन थालेपछि ती समस्या समाधानका लागि सम्बन्धित ठाउँमा पहल गर्न सुरु गरेको बताउँछन्।

धेरैका गुनासा सुन्दासुन्दै र उनीहरुका समस्या समाधानमा लाग्दालाग्दै धेरै ठाउँमा परिचय हुने गरेको र छिटो छिटो सेवा गर्न पाउँदा सबैको विश्वास जित्न पनि सहज भएको उनी सुनाउँछन्।

बिहान उठेदेखि कोरियाको कडा काम गरेर साँझ थकित भएर फर्किएपछि पनि नेपाली श्रमिकका गुनासा सुन्नु आफैंमा चुनौतीपूर्ण विषय भएको र त्यसलाई निरनतरता दिनु झन् कठिन विषय भएको उनी बताउँछन्। तर ईच्छाशक्ति भएमा जस्तोसुकै थकान र चुनौतीले पनि नछेक्ने उनको तर्क छ।

कोरियाको १० वर्षे रोजगारी अनुभवले आफूले अनुशासन, लगनशिलता र मिहिनेत महत्वपूर्ण भएको बुझेको बताउने उनी कोरिया आएका तथा आउने तयारीमा रहेका नेपालीलाई काम गर्दा दुर्घटना हुन सक्ने भएकाले होसियारी अपनाउन तथा आफ्नो स्वास्थ्यको ख्याल गर्न सल्लाह दिन्छन्।

उनी स्वदेश फर्किसकेपछि पनि आफूले सञ्चालन गरिरहेको ‘ईपियस छिङगु’ नामक फेसबुक पेजमार्फत सबै सूचनाहरु सम्प्रेषण गर्ने र अनलाईनमार्फत् गुनासा सुन्ने तथा समस्या समाधानकालागि कोरियामा रहेका नेपाली संघ संस्थाहरुसँगको समन्वयमा पहल गर्ने बताए।

पेजका करीब ६० हजार फलोवर्स छन्। सोही पेजमा कोरियामा काम खोजिरहेकाहरुका लागि कामका अवसरदेखि हरेक सूचनाहरु राख्ने गरेका छन्।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।