फाइल फोटो
काठमाडौं- नेपाल कम्युनिस्ट पार्टी (नेकपा) को मंगलबार बोलाइएको सचिवालय बैठक बालुवाटारमा बस्ने एक सचिवालय सदस्यले जानकारी दिएका छन्।
'पेरिसडाँडामा बस्ने भनिएको बैठक फेरि बालुवाटारमै बस्ने सूचना आएको छ', नेपाल लाइभलाई जानकारी दिँदै उनले भने, 'बैठक साढे १२ बजेका लागि तय भएको छ।'
पेरिसडाँडाबाट बालुवाटार सारिएको बैठक फेरि पेरिसडाँडामै सर्ने सम्भावनालाई नकार्न नसकिने उनको भनाइ छ।
नेकपा गठन भएयता सचिवालय/स्थायी कमिटीको बैठक सामान्यतयाः प्रधानमन्त्रीको सरकारी निवास बालुवाटारमा बस्ने गरेको थियो। केही पटक पार्टी कार्यालय धुम्बाराहीमा बसेको भए पनि तत्कालीन माओवादी केन्द्रको मुख्यालय पेरिसडाँडामा भने बैठक बसेको थिएन।
आइतबार सचिवालयको बैठक पहिलोपटक पेरिसडाँडामा बसेको थियो। अर्को बैठक सोमबार दिउँसो १ बजे पेरिसडाँडामै बस्ने तय भएको थियो। तर, पछि स्थगित गरिएको थियो।
बैठकमा छलफलका लागि चारवटा एजेन्डा तय गरिएका छन्। जसमध्ये आइतबारको सरकार पुनर्गठनको नीतिगत विषयमा आइतबारै छलफल भइसकेको छ। यद्यपि, मन्त्री बन्ने नयाँ नामहरु निर्क्यौल भइसकेको छैन। विभिन्न मोडलमा भने छलफल भएका छन्।
दोस्रो एजेन्डा संवैधानिक र राजनीतिक नियुक्तिहरूका बारेमा सरकारलाई निर्णय गर्नका लागि आधार तयार गरिदिन सजिलो बनाउनका निम्ति सचिवालयले छलफल गर्ने रहेको छ।
तेस्रो एजेन्डाका रूपमा सांगठनिक एकीकरणका बाँकी काम पूरा गर्ने विषय रहेको छ।
चौथो एजेन्डामा विविध भनिएको छ। यस अन्तर्गत संगठन विभागका निर्णयका सन्दर्भमा छलफल, स्थायी कमिटी र केन्द्रीय कमिटीमा रिक्त रहेका सदस्यको पदपूर्ति र पहिला गरिएका कारबाहीका विषयमा छलफल गरिने छ।
त्यस्तै, केन्द्रीय कमिटीका सदस्यहरूलाई नियमित रूपमा आर्थिक सहयोग गर्ने विषय पनि एजेन्डामा राखिएको छ। संघीय संसदका सदस्यहरूले कोभिड १९ का सन्दर्भमा बैठक भत्ता के गर्ने भन्ने विषय पनि विविध एजेन्डा अन्तर्गत छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
