फिचर

यो नाम सम्झनुहोस्- अन्सु माने फाती

काठमाडौं- अन्सु माने फाती फुटबल जगतमा छिटो चम्किरहेका छन्। १७ वर्षका उनले तीन वटा कीर्तिमान बनाइसके। एउटा स्पेनको राष्ट्रिय टिमबाट र दुई वटा कीर्तिमान बार्सिलोना फुटबल क्लबबाट।

२०१९ अगस्ट ३१ मा फातीले १६ वर्ष ३०४ दिनको उमेरमा ला लिगा अन्तर्गत ओेसासुनाविरुद्धको खेलमा पहिलो गोल गरे। जुन बार्सिलोनाको सिनियर टिमबाट गोल गर्ने सबैभन्दा कान्छा खेलाडीको कीर्तिमान हो।

२०१९ सेप्टेम्बर १७ मा च्याम्पियन्स लिगमा बोरुसिया डोर्टमुन्डविरुद्ध डेब्यू गरेका फाती बार्सिलोनाबाट सबैभन्दा कम उमेरमा च्याम्पियन्स लिग खेल्ने खेलाडी हुन्। डिसेम्बर १० मा त उनी च्याम्पियन्स लिगमा गोल गर्ने सबैभन्दा कान्छा खेलाडी बने। १७ वर्ष ४० दिनको उमेरमा उनले इन्टर मिलानविरुद्ध च्याम्पियन्स लिग गोल गरेका थिए।

२०२० सेप्टेम्बर ६ मा फाती स्पेनको राष्ट्रिय टिमबाट गोल गर्ने सबैभन्दा कान्छा खेलाडी बने। युइएफए नेसन्स लिग अन्तर्गतको खेलमा उनले युक्रेनविरुद्ध गोल गर्दा उनी १७ वर्ष ३ सय ११ दिनका थिए। जुन स्पेनिस टिममा कीर्तिमान हो।

कम उमेरमा गोल गरेका यी कीर्तिमानबाहेक पनि अन्सु फातीको फुटबल कला मैदानमा गजव देखिन्छ। उनी यति छिटो माथिल्लो स्तरमा चिनिएका छन्, जति उनी आफैले सोचेका थिएनन्। विश्वकै उत्कृष्ट मध्येको क्लब बार्सिलोनामा पाउने अवसरलाई यी किशोर खेलाडीले सदुपयोग पनि गरिरहेका छन्। अहिले राष्ट्रिय टिमबाट पनि उनी निर्धक्क बढिरहेका छन्।

बलमा देखिने तीब्रता, बल अघि बढाउने गजवको शैली र गोलका लागि गर्ने प्रहार कुनैमा पनि फाती १७ वर्षका मात्रै लाग्दैनन्। बल आफ्नो नियन्त्रणमा रहँदा विश्वस्त देखिने फातीको आत्मविश्वास नै गजवको छ। उनले यही समयमा देखाएको फुटबल बुझाइले अबको दशक फुटबल जगतमा फातीको पर्खाइ चलिरहनेछ। जसरी गएको दशक क्रिष्टियानो रोनाल्डो र लियोनल मेस्सीको हरेक खेलमा भयो।

सन् २००९ को डिसेम्बरमा लियोनल मेस्सीले पहिलो बालोन डि’ओर जित्दा ७ वर्षका अन्सु फातीको फुटबल देखिने गरी बल्ल सुरु भएको थियो। अहिले उनै मेस्सीसँग पास मिलाउन फातीले एउटै मैदान पाएका छन्। मेस्सी अझै थाकिसकेका छैनन्, तर अबको समयमा फाती जस्ता केही युवा खेलाडीले नयाँ स्थान पक्कै बनाउने छन्।

अहिले उत्कृष्ट खेलमा रहेका पिएसजीबाट खेल्ने फ्रान्सका केलियन एमबाप्पे, एथ्लेटिको मड्रिडबाट खेल्ने पोर्चुगलका योआओ फेलिक्स, बोरुसिया डर्टमुन्डबाट खेल्ने इंग्ल्यान्डका जडन सान्चो, चेल्सीबाट खेल्ने जर्मनीका के हाभेट्ज, रियल मड्रिडमा रहेका ब्राजिलका रोड्रिगो, म्यानचेस्टर सिटीमा रहेका स्पेनका फेरान टोरेस जस्ता खेलाडीसँगै आइरहेको नाम हो अन्सु फाती।

गिनी बिसाउमा जन्मिएका फाती आफ्नो बुबासँगै ६ वर्षको उमेरमा नै स्पेन गएका हुन्। उनी २०१० देखि दुई वर्ष सेभियाको युवा टिममा रहे। २०१२ मा बार्सिलोना ‘बी’ टिममा सामेल भएका उनले सानो उमेरमा नै आफ्नो क्षमता देखाउन सके। उनी गएको जुलाईदेखि बार्सिलोनासँग २०२२ सम्मको सम्झौतामा छन्। उनलाई अर्को क्लबले लैजान चाहे अहिले नै १ सय ७० मिलियन युरोभन्दा बढी तिर्नुपर्ने हुन्छ।

अन्सु फातीका बुबा बोरी फाती पनि पहिलेका फुटबल खेलाडी नै हुन्। साथै उनका दुई दाइहरु ब्राइमा र मिग्वेल पनि फुटबल खेलाडी हुन्।

फातीका बुबा स्पेन आउनुअघि कामको खोजीमा गिनि बिसाउबाट पोर्चुगल पुगेका थिए। जहाँ तल्लो डिभिजनका केही क्लबबाट उनले फुटबल पनि खेले। पोर्चुगलमा रहँदै सेभियामा आप्रवासीहरुका लागि राम्रो काम रहेको सुनेपछि उनी स्पेन पुगेका थिए। तर उनले कति समय त सेभिया नजिकैको मारिनालेडा सहरका फुटपाथमा मागेरसमेत जीविका गर्नुपरेको थियो।

त्यही बेला सहरका मेयरलाई भेटेका उनले ड्राइभरको जागिर पाए। ड्राइभरको जागिर पाएपछि नै उनी हेरेरा सहरमा राम्ररी बस्न सकेका थिए। हेरेरामा नै अन्सु फातीको बाल्यकाल बितेको हो। जहाँ केही वर्ष सिडिएफ हेरेरा फुटबल क्लबमा फातीले फुटबल सिक्न पाए। त्यही सिकाइले अहिले उनको फुटबल बार्सिलोना हुँदै स्पेनको राष्ट्रिय टिमसम्म पुग्न सकेको छ।

अन्सु फातीको कथामा देखिने विनम्रता र धैर्यताले नै उनको नयाँ उचाइको बाटो कोरेको हो। जसमा उनी अघि बढीरहेका पनि छन्। सन् २०१२ मा १० वर्षको उमेरमा बार्सिलोना पुगेका फातीले यु११ को टिममा खेल्न पनि एक वर्ष पर्खिनुपरेको थियो। त्यस समय उनले पेलोटेरस एफसीमा अभ्यास खेलहरु खेलिरहे।

फातीलाई फुटबल सिकाएका सुरुका एक प्रशिक्षक मार्क सेरा पुराना दिन सम्झँदै भन्छन्- ‘उनी सेभियादेखि लामो दुरी तय गरेर खेल्न आइरहेका हुन्थे। खेलेर फर्किंदा आजको खेलमा राम्रो हुन नसकेको भन्दै माफी माग्थे र भोलि राम्रो गर्छु भनिरहेका हुन्थे। उनले त्यसबेला पठाएका केही म्यासेजहरु त मसँग अहिलेसम्म होला।’

त्यही सुधारको सोचले हुनुपर्छ फातीले बार्सिलोना सिनियर टिममा समेत आफूलाई प्रमाणित गर्न सकिरहेका छन्। फातीले मेस्सीपछिको बार्सिलोनामा भविष्य देखाउनु सानो विषय होइन। मिलानविरुद्धको च्याम्पियन्स लिग खेलमा ८४ औं मिनेटमा मैदान प्रवेश गरेका उनले त्यसको तीन मिनेटमा गोल गरेका थिए। जुन जितको आधार बनेको थियो। आइतबार राति नेसन्स लिगमा युक्रेनविरुद्ध पूरा समय खेलेका उनी टिमको केन्द्रमा देखिए।

फातीलाई कुनै समयमा प्रशिक्षण गरेका प्रशिक्षक डेनिस सिल्भा पनि १६ वर्षको उमेरदेखि फातीले आफूमा गरेको खेलको विकास ठूलो कुरा भएको बताउँछन्। लियोनल मेस्सी, लुइस स्वारेज, उसमान डेम्बेले जस्ता खेलाडी घाइते रहेको अवस्थामा फातीले पाएको अवसर यसरी उपयोग गरे कि उनी बार्सिलोना सिनियर टिमको एक हिस्सा बनिरहन सके। जसले स्पेनको राष्ट्रिय टिमको बाटो पनि खुल्यो।

गएको सिजन लिगा अन्तर्गत बार्सिलोनाले रियल बेटिसलाई ५-२ ले हराएको खेलमा १६ वर्षका फातीले बार्सिलोना सिनियर टिममा डेब्यू गरेका थिए। फातीले रियल बेटिससँग खेल्नुअघि एक हप्ता सिनियर टिममा रहेर अभ्यास गरेका थिए। लियोनल मेस्सी, लुइस स्वारेज र उसमान डेम्बेले घाइते रहेको टिममा अन्तिम १२ मिनेट मैदानमा रहेका फातीले आफ्नो डेब्यू विश्वास नै गर्न सकेका थिएनन्।

सन् १९४१ मा भिसेन्ट मार्टिनेचपछि सबैभन्दा कम उमेरमा बार्सा डेब्यू गर्ने खेलाडीसमेत बनेका फातीले आफू नर्भस भएको खेलपछि बताए। तर उनको खेलमा उनले भनेजस्तो कमजोरी देखिएको थिएन।

‘वास्तवमा म एकदमै नर्भस भएको थिएँ, बार्सामा डेब्यू गर्न पाउनु सानो कुरा होइन, यसका लागि सबैलाई धन्यबाद दिन चाहन्छु,’ त्यसबेला खेलपछि उनले भनेका थिए, ‘एकछिन त विश्वास नै नभएर म मैदानमा नै बसेँ, अब अहिले त्यो अवसर सेलिब्रेसन गर्ने बेला आएको छ, मसँग धन्यबादका शब्दहरु मात्र छन्।’

उस्तै अवसर अहिले स्पेनको राष्ट्रिय टिमबाट पनि फातीका लागि दोहोरियो। बार्सिलोनामा देखाएको खेलले नै उनलाई स्पेनले नै नागरिकता दिएर छोटो समयमा यु२१ हुँदै राष्ट्रिय टिमसम्म लग्यो। नेसन्स लिगमा जर्मनीविरुद्ध १-१ को बराबरी भएको खेलमा दोस्रो हाफमा मैदान आएका फातीले जे देखाए त्यसले युक्रेनविरुद्ध उनी सुरुवाती ११ मा परे।

युक्रेनसँगको खेलमा दोस्रो मिनेटमा नै फातीले डि एरियामा बल बढाउँदा उनीमाथि फोयल भयो र स्पेनले पेनाल्टी पायो। जहाँ सर्जियो रामोसले गोल गरे। रामोसले नै २९ औँ मिनेटमा हेडमार्फत अग्रता दोब्बर बनाए। फातीले ३२ औँ मिनेटमा राम्रो सटमार्फत राष्ट्रिय टिमबाट पहिलो गोल गरे। दोस्रो हाफमा फेरान टोरेसले एक गोल थपे। पहिलो हाफको तुलनामा फातीको खेल दोस्रो हाफमा केही कम लागे पनि उनको तारिफ सबैतिर भयो।

फातीको खेल चिनेर नै प्रशिक्षक लुइस इनरिकले जर्मनविरुद्ध खेलपछि उनी उत्कृष्ट खेलाडी भएकाले उनको विशेष ख्याल राख्नुपर्ने बताएका थिए। ‘फातीले त्यस्तै खेले जुन हामीलाई अपेक्षा थियो। उनी असाध्यै भिन्न खेलाडी छन्। हामीले उनको हेरविचार गर्नुपर्छ। यो उमेरमा उनी परिपक्व खेलाडी छन्। मलाई यकिन छ उनी राष्ट्रिय टिमका लागि अझ महत्वपूर्ण हुनेछन्’ उनले भनेका थिए।

युक्रेनसँगको खेलपछि पनि प्रशिक्षक इनरिकले फातीका बारे प्रतिक्रिया दिन छुटाएनन्। उनले भनेका छन्- ‘म फातीका लागि निकै खुसी छु। उनी १७ वर्षका मात्र छन्। उनलाई हामीले सहज रुपमा अगाडि बढाउनुपर्छ। विस्तारै विस्तारै उनमा अझ धेरै सुधार हुनेछ। उनको उमेरका खेलाडीका लागि शान्ती र विनम्रता चाहिन्छ, जुन फातीसँग छ।’

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।