फाइल तस्बिर
काठमाडौं-यो वर्षको वर्षायाममा बिग्रिएका सडक तथा पुल निर्माण गर्न ३ अर्बभन्दा बढी खर्च लाग्ने अनुमान सडक विभागले गरेको छ। यस वर्ष २ सय ११ स्थानमा सडक अवरुद्ध भएका थिए। तीमध्ये अधिकांश सडक दुईतर्फी वा एकतर्फी रुपमा सञ्चालनमा आइसकेका छन्।
सडक विभागअन्तर्गतका विभिन्न डिभिजन कार्यालयमातहत रहेका सडक मर्मतको जिम्मा सडक विभागकै हो। पानी पर्ने क्रम नरोकिएकाले सडक तथा पुलमा हुने क्षति बढ्न सक्ने विभागका भनाइ छ।
सडक विभागले हालसम्म बगेका, भासिएका सडक र क्षति पुगेका पुलको विवरण संकलन गरि मर्मतका लागि आवश्यक लगतको विश्लेषण गरिरहेको विभागका महानिर्देशक केशवकुमार शर्माले बताए। ‘हामीले हालसम्म बिग्रिएका सडक र क्षति पुगेका पुलको विवरण संकलन गरि पुनर्निर्माणका निम्ति आवश्यक काम सुरु गरेका छौं,’ उनले भने ‘त्यसका लागि ३ अर्बभन्दा बढी रकम खर्च हुने प्रारम्भिक अनुमान छ।’
अविरल वर्षाका कारण आएको बाढीपहिरोले मुलुकका विभिन्न २ सय ११ स्थानका सडकमा क्षति पुगेको र यसलाई पूर्ण रुपमा सञ्चालनमा ल्याउने गरी मर्मत गर्न ३ अर्ब रुपैयाँभन्दा बढी खर्चनुपर्ने देखिएको विभागको भनाइ छ। विभागका अनुसार पुल, राष्ट्रिय राजमार्ग, सहायक राजमार्ग, र रणनीतिक सडकलगायतमा भएको क्षतिका आधारमा यस्तो आँकलन गरिएको हो। कतिपय सडक तत्काल मर्मत गरी सञ्चालनमा ल्याइए पनि मनसुन पूर्ण रुपमा नरोकिएकाले अस्थायी प्रकृतिको काममात्र भइरहेको छ।
वर्षाले सबैभन्दा बढी क्षति अरनिको राजमार्गअन्तर्गत वाह्रविसे-तातोपानी सडक अन्तर्गतको २६ किलोमिटर, बेनी-जोमसोम-कोरोला, डुम्रे-बेँसीसहर-चामे सडक खण्डमा क्षति पुर्याएको छ। यस्तै, बेनी-जोमसोम कोरोला सडक खण्डमा पहिरोका कारण बेलिब्रज बगाएको छ भने अर्का पुल निर्माणको काम सुरु गरिँदैछ।
विभागकाे साेमबारसम्मकाे अद्यावधिक विवरणअनुसार असारयता वर्षा, बाढीपहिरो र अन्य कारणले २ सय ११ स्थानमा क्षति पुगेकाे ५। १६ स्थानका सडक खण्ड अझै पनि अवरुद्ध छन् भने ८५ वटा सडक खण्ड आंशिक वा एकतर्फी सुचारु भएका छन्। १ सय १० वटा सडक खण्ड मर्मत गरी सञ्चालनमा ल्याएको विभागकाे अद्यावधिक विवरणमा उल्लेख छ।
नदीकटान, पहिरो खस्ने, सडक भासिने, सडकमा ढुंगा झर्नेलगायतका समस्याका कारण सडक अवरुद्ध भएको र समस्या आएको विभागको भनाइ छ। विभागले अवरुद्ध सडक सञ्चालन गर्न विभिन्न डिभिजन कार्यालयअन्तर्गत आवश्यक मेसिन र कर्मचारी तयारी अवस्थामा राखेको जनाएको छ।
भत्किएका सडक तथा पुल पूर्वरुपमा बनाइसक्न १ वर्षभन्दा बढी समय लाग्ने विभागको भनाइ छ। हाल क्षति पुगेका सडक र पुल बगेका ठाउँमा अस्थायी डाइभर्सन बनाएर यातायात सञ्चालन गरिएको र ती सडक/पुल बनाइसक्न १ देखि डेढ वर्षसम्म लाग्ने विभागका महानिर्देशक शर्माले बताए। ‘क्षतिको विवरण आइसकेकाले अब त्यसको निर्माणका लागि केही समयमा टेन्डर गरेर प्रक्रिया अघि बढाउँछौं,’ शर्माले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1778914053.png)
-1764146706.png)
-1775812183.jpg)
-1779545841.jpg)
