काठमाडौं- नेपाल राष्ट्र बैंकले कोभिड- १९ ले प्रभावित कर्जाको लागि ब्याज भुक्तानी गर्न विशेष सुविधा प्रदान गरेको छ। बैंकले कोभिड १९ का कारण विगतमा कायम गरिएको ग्रेस अवधिभित्र उद्योग वा परियोजनाको निर्माण सम्पन्न संचालन हुन नसकेको अवस्थामा निर्माण सम्पन्न हुन सञ्चालनमा आउन लाग्ने थप समय यकीन गरी ग्राहकको अनुरोधमा बैंक तथा वित्तीय संस्थाले एक पटकका लागि २०७७ असोज मसान्नसम्म ग्रेस अवधि थप गर्न सक्ने व्यवस्था मिलाएको छ।
कोभिड १९ बाट अति प्रभावित क्षेत्रमा प्रवाहित कर्जालाई एक वर्ष, मध्यम प्रभावित क्षेत्रमा प्रवाहित कर्जालाई ९ महिना तथा न्यून प्रभावित क्षेत्रमा प्रवाहित कर्जालाई ६ महिनासम्मका लागि ग्रेस अवधि थप गर्न सकिने व्यवस्था गरेको हो। तर सम्बन्धित निकायबाट स्वीकृतिप्राप्त पर्यटकस्तरीय होटलको हकमा अधिकतम २ वर्षसम्मका लागि ग्रेस अवधि थप गर्न सकिने नेपाल राष्ट्र बैंकले जनाएको छ।
यसरी ग्रेस अवधि थप गर्ने सम्बन्धमा बैंक तथा वित्तीय संस्थाले कार्यविधी बनाई सञ्चालक समितिबाट स्वीकृत गराई लागू गर्नु पर्नेछ र ग्रेस अवधि थप गरिएका कर्जाहरूको मासिक विवरण नेपाल राष्ट्र बैंकमा पेश गर्नुपर्नेछ।
यसरी थप भएको ग्रेस अवधिको ब्याजलाई पुँजीकरण नगरी ग्रेस अवधिभित्र कम्तिमा तीन किस्तामा भुक्तानी हुनेगरी असुलीको व्यवस्था गर्नुपर्नेछ। तोकिएको तालिका बमोजिम भुक्तानी गर्ने ऋणीसँग कुनै किसिमको पेनाल ब्याज, शुल्क, हर्जना ब्याजको ब्याज लिन पाइने छैन।
कोभिड १९ बाट अति प्रभावित क्षेत्रमा प्रदान गरिएको कर्जाको हकमा ऋणीको परियोजना वा व्यवसायमा परेको प्रभाव तथा वित्तीय अवस्थाको मूल्याङ्कन गरी ऋणीको लिखित कार्ययोजनाअनुसार भविष्यमा उद्योग व्यवसाय सञ्चालनमा आई ऋण चुक्ता हुन सक्ने बैंक तथा वित्तीय संस्था आश्वस्त भएमा सम्बन्धित ऋणीको अनुरोधमा एक पटकको लागि ऋणीले बुझाउनुपर्ने ब्याजको १० प्रतिशत रकम असुल उपर गरी कर्जाको पुनर्तालिकीकरण गर्न सकिने भएको छ।
यस्तो पुनर्तालिकीकरण वा पुनर्संचरना गर्दा २०७६ पुस मसान्तमा सक्रिय कर्जाहरुको लागि न्यूनतम ५ प्रतिशत कर्जा नोक्सानी व्यवस्था कायम गरी २०७७ असार मसान्तमा असल वर्गमा वर्गीकरण गर्न सकिनेछ। यसरी कर्जा पुनर्तालिकीकरण वा पुनर्संचरना गरिएका स्पष्ट आधारहरु प्रत्येक कर्जा फाइलमा सलग्न हुनुपर्नेछ।
स्पष्ट आधारबिना पुनर्तालिकीकरण वा पुनर्संचरना गरिएको पाइएमा प्रचलित व्यवस्थाअनुसार कर्जा नोक्सानी व्यवस्था कायम गर्न राष्ट्र बैंकले चेतावनी दिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1790307658.jpeg)
-1786602170.png)
