दुर्लभ पत्थर फेला पर्दा बदलियो जीवन : एकै पत्थरको कमाइ ३४ लाख अमेरिकी डलर

विश्व

नेपाल लाइभ आइतबार, असार १४, २०७७ १६:०४

एजेन्सी- पत्थर खोज्ने तान्जानियाका एक व्यक्तिले आफ्नो जीवनको सबैभन्दा ठूलो खोजमात्र गरेनन् उनले फेला पारेको पत्थरले देशलाई समेत फाइदा पुग्यो। पत्थर खोज्न सक्रिय सैनिलिनु लाइजरको पछिल्लो उपलब्धीले राष्ट्रपति समेत खुसी भए र उनलाई फोन गरेर बधाई नै दिए।

उनको उपलब्धी हो तान्जानियामा मात्रै पाइने र हराउँदै गएको दुर्लभ पत्थर ‘तान्जानाइट पत्थर’ फेला पार्नु। गहनामा प्रयोग हुने र दुर्लभ बन्दै गएको यो पत्थर उनले सानो टुक्रा हैन १५ किलो बराबरको फेला पारे। उनले यसको बिक्रीबाट ३४ लाख अमेरिकी डलर पाए। उनलाई तान्जानियाको भूगर्भ हेर्ने मन्त्रालयले सो रकम दिएर दुर्लभ पत्थर किनेको थियो।

यसको उपयोग ब्रासलेट, नेकलेस र औंठीलगायतका गहनामा प्रयोग हुन्छ। रातो, बैजनी र निलो रंग नै यो पत्थरको मुख्य आकर्षण हो। यो पत्थर उत्तरी तान्जानियामा मात्र पाइन्छ। तान्जानियाका भूगर्भविद्हरुको अनुमानमा आगामी २० वर्षमा यो पत्थर पुरै हराउन सक्छ। यसको मुल्य यसको दुर्लभतासँग जोडिएको छ। यसका रंग जति प्रष्ट भयो त्यति नै बढी मूल्य आउँछ।

उनले गत हप्ता ९ दशमलव २ र ५ दशमलव ८ किलो तौलको २ वटा पत्थर फेला पारेका थिए। उनले दुवै पत्थर मान्यारामा भएको ट्रेडिङमा बेचिदिए। सो पैसाबाट आफ्नै घर नजिकै आयस्रोत कम भएका बालबालिकाका लागि विद्यालय खोल्ने र एउटा सपिङ कम्प्लेस खोल्ने योजना बनाएका छन्।