धनगढी–सुदूरपश्चिम प्रदेशमा असार पहिलो सातासम्म करिब २२ प्रतिशत धान रोपाईं भएको छ।
समयमै मनसुन भित्रिएका कारण यस वर्ष असार पहिलो सातासम्म सुदूरपश्चिम प्रदेशमा ४० हजार दुई सय ४४ हेक्टर क्षेत्रफलमा रोपाई भइसकेको जनाइएको छ।
सुदूरपश्चिम प्रदेशका नौ वटै जिल्लामा एक लाख ८१ हजार ६ सय चार हेक्टर क्षेत्रफलमा धानखेती हुँदै आएको छ। क्षेत्रीय कृषि निर्देशनालय, दीपायलका अनुसार असार पहिलो सातासम्म २२ प्रतिशत क्षेत्रफलमा रोपाईं भइसकेको छ।
‘गत वर्ष असार १५ गतेसम्म मात्र २२ प्रतिशत रोपाईं हुनसकेको थियो। यस वर्ष समयमै मनसुन सक्रिय भएका कारण छिटो रोपाईं सुरु भएको छ। आकाशे पानीको भर पर्नुपर्ने ठाउँहरूमा पनि रोपाईं भइरहेको छ’ क्षेत्रीय कृषि निर्देशनालयका निर्देशक यज्ञराज जोशीले भने, ‘यसपालि चाँडो रोपाईं सुरु भएकाले पनि सहज भएको छ। सिँचाई सुविधा पनि बिस्तार भएकाले किसानहरूलाई आकाशे पानीको भर पर्नुपर्ने बाध्यता केही कम भएको छ ।’
प्रदेशका नौ जिल्लामध्ये सबैभन्दा कम रोपाईं भने धानका लागि उर्वरभूमि मानिएका कैलाली र कञ्चनपुरमा नै भएको छ। कञ्चनपुरमा अहिलेसम्म प्रदेशका अरु जिल्लाको तुलनामा सबैभन्दा कम रोपाईं भएको छ। यहाँ १५ प्रतिशतमात्रै रोपाईं भएको छ।
यस वर्ष अहिलेसम्म कैलाली पनि कम रोपाईं हुने जिल्लामा परेको छ। कैलालीमा यस वर्ष असार पहिलो सातासम्म १७ प्रतिशतमात्र रोपाईं भएको निर्देशक जोशीले बताए। कञ्चनपुरमा ४८ हजार तीन सय ७५ हेक्टर क्षेत्रफलमा धान खेती हुने गरेकोमा हालसम्म सात हजार दुई सय ५६ हेक्टरमा रोपाईं भएको छ। त्यस्तै, कैलालीमा ७१ हजार सात सय १५ हेक्टर क्षेत्रफलमा धान खेती हुने गरेकोमा अहिलेसम्म १२ हजार एक सय ९२ हेक्टरमा मात्र रोपाईं भएको छ।
पहाडी जिल्लामध्ये यस वर्ष अहिलेसम्म बाजुरामा सबैभन्दा बढी ४५ प्रतिशत रोपाईं भएको निर्देशनालयको तथ्यांक छ। सात हजार दुई सय २० हेक्टरमा धानखेती हुने बाजुरामा तीन हजार दुई सय ४९ हेक्टरमा रोपाईं सकिएको छ।
त्यस्तै, अछाम र बैतडीमा ४०-४० प्रतिशत रोपाईं भइसकेको छ। अछाममा धानखेती हुने १६ हजार ५ सय ८० हेक्टरमध्ये अहिलसम्म ६ हजार ६ सय ३२ हेक्टर जग्गामा रोपाईं भइसकेको छ।
त्यस्तै, बैतडीमा धान खेती हुने नौ हजार हेक्टरमध्ये तीन हजार छ सय हेक्टरमा रोपाईं भएको कृषि निर्देशनालयका निर्देशक जोशीले जानकारी दिए।
दार्चुलामा अहिलेसम्म ३५ प्रतिशत रोपाईं भइसकेको छ भने डोटी र बझाङमा २५–२५ र डडेल्धुरामा २० प्रतिशत भूभागमा धान रोपिएको निर्देशक जोशीले जानकारी दिए।
उनका अनुसार दार्चुलामा चार हजार चार सय ४८ हेक्टरमा धान खेती हुने गरेकोमा एक हजार पाँच सय ६८, बझाङमा सात हजार एक सय १० मध्येमा एक हजार सात सय ७६ र डोटीमा १० हजार आठ सय ९८ हेक्टरमा धानखेती हुने गरेकोमा दुई हजार सात सय २५ हेक्टरमा रोपाईं भएको छ। त्यसैगरी डडेल्धुरामा छ हजार दुई सय २६ हेक्टरमा धान खेती गरिँदै आएकोमा एक हजार दुई सय ४५ हेक्टरमा रोपाईं गरिएको छ।
यसपालि मनसुन चाँडो भित्रिएका कारण रोपाईं पनि चाडो सुरु भएकाले धान उत्पादनमा वृद्धि हुने कृषि निर्देशनालयले जनाएको छ।
धानखेतीलाई कुनै असर नपरेमा विगतका वर्षभन्दा यसपालि उत्पादन बढ्ने निर्देशक जोशीको भनाइ छ । ‘अवश्य पनि यसपालि समयमै रोपाईं सकिन्छ। यसले उत्पादन बढ्छ। तर, यसपछि के हुन्छ भन्न सकिदैन,’ उनले भने, ‘अघिल्ला वर्षभन्दा पहिले नै धेरै रोपाईं भईसकेको छ। यो कृषि क्षेत्रका लागि सकारात्मक हो। यसले उत्पादनमा वृद्धि गराउन मदत मिल्छ।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786781074.jpg)
-1786602170.png)
-1786513116.png)
