विदेशबाट फर्काइएका नेपाली। तस्बिर : सिसिएमसी
काठमाडौं-बैंककस्थित नेपाली दूतावासले थाइल्याण्ड कम्बोडिया र सिंगापुरबाट समस्यामा परेका ४७१ नेपाली स्वदेश फर्काएको छ।
स्वदेश फर्काइएकाहरुमा समस्यामा परेका विद्यार्थी, रोजगारी गुमाएका, रोजगारीको प्रलोभनमा पुगि अलपत्र परेका, पर्यटक भिसामा गएर अड्किएकालगायत रहेको दूतावासले जनाएको छ।
गत १७ जुनमा दुई वटा उडानमार्फत् थाइल्याण्डबाट २४७, सिंगापुरबाट ११३ र कम्बोडियाबाट ३३ जना गरी जम्मा ३९३ नेपाली स्वदेश फर्काइएको थियो। त्यस्तै २३ जुनमा थाइल्याण्डबाट पुनः ७८ गरी जम्मा ४७१ नेपाली स्वदेश फर्काइएको हो।
यी ३ वटा मुलुकबाट स्वदेश फर्काइएकाहरुमा समस्यामा परेका विद्यार्थीहरुको संख्या बढी छ। त्यस्तै रोजगारीको प्रलोभनमा परी अलपत्र परेका थाइल्याण्डबाट ९ र कम्बोडियाबाट १३ जना गरी २२ स्वदेश फर्काइएको दूतावासले जनाएको छ ।
थाइल्याण्डबाट फर्किनेमा अधिकांश समस्यामा परेका विद्यार्थी
थाइल्याण्डबाट फर्किएकामध्ये अधिकांश समस्यामा परेका विद्यार्थी छन्। छोटो अवधिको इन्टर्नसिपमा आएका, विभिन्न विश्वविद्यालयहरुमा अध्ययन पुरा गरेका र कोरोनाका कारण समस्यामा परेका २३४ विद्यार्थीहरु स्वदेश फर्किएका छन्।
त्यस्तै पर्यटक भिसा र पारिवारिक पुनर्मिलनका लागि आएका ५१, वैदेशिक रोजगारीकाे प्रलोभनमा परी अलपत्र परेका ९ , रोजगारी समाप्त भएका २२, नेपालमा आफन्त गुमाएका २,जेलमुक्त भएका १ र नाबालक ६ जना रहेका छन् ।
सिंगापुरबाट फर्काइए जेलमुक्त भएका २१
त्यसैगरी सिंगापुरबाट नेपाल फर्किएकामा जेलमुक्त भई नेपाल फर्कन स्वीकृति पाएका २१, ट्रान्जिटमा अलपत्र परेका ७, पर्यटक भिसा र पारिवारिक पुनर्मिलनका लागि आएका १८, रोजगारी समाप्त भएका ५६ र तालिमका लागि आएका प्रशिक्षार्थी तथा विद्यार्थी ९ जनासमेत गरी ११३ जना छन् ।
कम्बोडियाबाट फर्किएकामा वैदेशिक रोजगारीको प्रलोभनमा परी अलपत्र परेका १३, रोजगारी समाप्त भएका ९, पर्यटक भिसामा आएका ९ जना र तालिममा आएका सरकारी अधिकृतहरु २ गरी जम्मा ३३ जना छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
