काठमाडौं-लकडाउन अवधिमा भारत र अन्य तेस्रो मुलुकबाट २ लाख ६९ हजार ३ सय ७४ नेपाली स्वदेश फर्किएका छन्। लकडाउन सुरु भएदेखि असार ७ गतेसम्म भारतबाट २ लाख ६२ हजार ९ सय ६ नेपाली फर्किएको कोरोना संकट व्यवस्थापन केन्द्र (सिसिएमसी) ले जनाएको छ।
भारतबाट फर्किने सबैभन्दा बढी प्रदेश नम्बर ७ मा
भारतबाट फर्कने अधिकांश प्रदेश नम्बर ७ का छन्। प्रदेश ७ का १ लाख १९ हजार ९ सय नेपालीहरु भारतबाट फर्किएका छन्। त्यस्तै प्रदेश ५ का ९२ हजार ५८४, प्रदेश २ का ३० हजार ७ सय ८९ र प्रदेश १ का १२ हजार १ सय ५५ नेपाली भारतबाट फर्किएका छन्। गत जेठ १ देखि भारतबाट फर्कनेको संख्या दिनानुदिन बढ्दै गएको देखिन्छ। भारतबाट दैनिक १ हजारदेखि १५ हजारसम्म नेपालीहरु स्वदेश फर्किएको सिसिएमसीको तथ्यांकले देखाउँछ।
भारतबाहेक अन्य मुलुकबाट फर्किए ६,४८६
भारतबाहेक अन्य मुलुकबाट ६ हजार ४ सय ८६ नेपाली स्वदेश फर्किएका छन्। मलेसिया, कतार, साउदी, युएई, म्यानमार, माल्दिभ्स, कम्बोडिया, श्रीलंका, कुवेत, ओमानलगायत विभिन्न १८ मुलुकबाट जेठ २१ गतेदेखि असार ८ गतेसम्म ६ हजार ४ सय ८६ नेपाली स्वदेश फर्किएका हुन्।
प्रदेशस्तरीय क्वारेन्टाइनमा ४२००
फर्किएकामध्ये सबैभन्दा बढी ४ हजार २ सय ७६ नेपाली प्रदेशस्तरीय क्वारेन्टाइनमा राखिएका छन्। होटल क्वारेन्टाइनमा ४२५ र होम क्वारेन्टाइनमा ६४७ रहेको सिसिएमसीले जनाएको छ। त्यस्तै स्थानीय क्वारेन्टाइनमा ११ सय २० जना छन् ।
अस्पतालमा १२ जना
भारतबाहेक अन्य मुलुकबाट फर्किएका १२ जना विभिन्न अस्पतालमा रहेको सिसिएमसीले जनाएको छ। यसअघि कोरोनाको आशंका तथा अन्य जटिल अवस्थाका ३२ नेपालीहरु विभिन्न अस्पतालमा रहेको सिसिएमसीले जनाएको थियो। तीमध्ये हाल १२ जना मात्र अस्पतालमा रहेको सिसिएमसीले जनाएको छ। १२ मध्ये केही कोरोना पुष्टि भएका र केही कोरोनाबाहेक अन्य जटिल अवस्थाका बिरामी छन् ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
