प्रतीकात्मक तस्बिर
काठमाडौँ- ललितपुर मालपोत कार्यालयमा कार्यरत रहेका एक मालपोत अधिकृतले नेपालमा गैरकानुनी रुपमा आर्जन गरेको सम्पत्ति लुकाउन अस्ट्रेलियामा रहेका जेठानलाई पठाउने गरेको खुलासा भएको छ। अख्तियार दुरुपयोग अनुसन्धान आयोगले गरेको अनुसन्धानमा मालपोत कार्यालय ललितपुरमा कार्यरत रहेका शाखा अधिकृत बद्रीप्रसाद ढकालले गैरकानुनी रुपमा नेपालमा आर्जन गरेको सम्पत्ति चोख्याउन अस्ट्रेलियामा रहेको जेठानको खातामा जम्मा गर्ने पाइएको हो।
मालपोत अधिकृतको रुपमा रहँदा ढकालले १० करोड २७ लाख ५८ हजार ४सय ६१ बराबरको गैरकानूनी सम्पत्ति आर्जन गरेको अख्तियारले फेला पारेको थियो। ढकालविरुद्ध अकुत सम्पत्ति आर्जन गरेको अभियोगमा अख्तियारले मंगलबार विशेष अदालतमा भ्रष्टाचार मुद्दा दायर गरेको छ।
अस्थायी शिक्षक हुँदै मालपोत अधिकृतसम्म
२०५४ सालमा अस्थायी शिक्षकका रूपमा सार्वजनिक सेवामा प्रवेश गरेका ढकाल मालपोत कार्यालय लमजुङ्गबाट राजपत्र अनंकित द्वतीय श्रेणी खरिदारका रूपमा निजामती सेवामा प्रवेश गरेका थिए। २०५५ सालमा खरिददार भएका उनी शाखा अधिकृतसम्म हुँदा १० करोडभन्दा बढी सम्पत्ति आर्जन गर्न सफल भए।
ढकाल निजामती सेवामा प्रवेश गरी मालपोत कार्यालयहरु तनहुँ, कास्की, डिल्लिबजार काठमाडौं, पर्सासमेतका मालपोत कार्यालयहरुमा कार्यरत रही हाल मालपोत कार्यालय लगनखेल, ललितपुरमा कार्यरत छन्। उनी यही पैसाको भरमा सधै सुगम र अनियमिता गर्ने सहज हुने स्थानमा सरुवा भएर बस्ने गरेका अख्तियारको अनुसन्धानमा पाइएको छ।
ढकाल मालपोत कार्यालयहरुमा कार्यरत रहँदै जग्गा दर्ता लगायतका गैरकानूनी कार्यहरूबाट गैरकानूनी रुपमा अकूत सम्पत्ति आर्जन गरी अस्वभाविक रुपमा उच्च जीवनयापन गरिरहेकाले उजुरीको आधारमा अनुसन्धान हुदाँ उनको यस्तो कार्यको खुलासा भएको हो।
सार्वजनिक सेवामा प्रवेश पश्चात ढकालले सालीका नाममा सवारी साधन खरिद गरी प्रयोग गर्ने गरेका थिए। गैरकानुनी रुपमा आर्जन गरेको सम्पत्ति पत्ता नहोस् भनेर उनले अन्य व्यक्तिको नाममा गाडी खरिद गरेको आयोगको अनुसन्धानमा खुलेको आरोपपत्रमा उल्लेख छ।
परिवारको बैंक खातामा रकम जम्मा गर्दैनथे ढकाल
उनी यति चलाख थिए कि गैरकानुनी रुपमा आर्जन गरेको सम्पत्ति लुकाउन परिवारको नाममा रहेको बैंक खातामा पैसा जम्मा गर्दैन थिए। अख्तियारको अनुसन्धानमा उनले यसरी परिवारको नाममा रकम जम्मा नगरी बाहिरी व्यक्ति खोज्ने गरेको पाइएको हो।
उनले यसरी आर्जन गरेको सम्पत्ति अस्ट्रेलिया बसोबास गर्दै आएका जेठान नाताका नवराज अर्यालका नाममा जनता बैंकमा नयाँ खाता खोली जम्मा गर्ने गरेका थिए। उक्त खाता खोलेकै दिन खाता संचालकबाट खाता संचालनको अनुमति लिई ढकालले आफू अनुकूलका व्यक्तिहरू एवं आफूसमेतले विभिन्न व्यक्तिहरुका नामबाट खातामा पैसा जम्मा गराएको अख्तियारको अनुसनधानमा पाइएको छ। सो खातामा मौज्दात रकमहरूबाट आफूले खरिद गरेका जग्गाका जग्गाधनी तथा जग्गा बिक्रेता एवं जग्गा कारोबारसँग सम्बन्धित व्यक्तिहरुलाई भुक्तानी तथा खर्च लगानी गर्ने कार्यमा उनले गर्ने गरेको अख्तियारको अनुसनधानमा पाइएको छ।
जेठानको उक्त खाताबाट आफू अनुकूल ४ करोड २६ लाख ९९ हजार विभिन्न शीर्षकहरुमा खर्च गरेको अख्तियारले अनुसन्धानको क्रममा फेला पारेको थियो।
जहाँ पुग्यो उही पैसा लुकाइदिने मान्छे
ढकाल जुन मालपोत कार्यालयमा सरुवा हुन्थे सोही स्थानमा यसरी आर्जन गरेको पैसा राख्ने र कारोबार गर्ने व्यक्ति बनाउने गरेका थिए। ढकालले आफू तनहुँ जिल्ला स्थित मालपोत कार्यालयमा कार्यरत रहँदा सोही तनहुँ जिल्लाबासी डेकबहादुर गुरुङ्गलाई प्रभावमा पारी श्रीमतीसमेतका नाममा दर्ता कायम रहेका जग्गाहरु कुनै किसिमको खरिद बिक्री कारोबार नै नगरी लिखतमा सरकारी न्यूनतम मूल्य उल्लेख गरी खरिद बिक्री कारोबार देखाइ आफ्नो नाममा ल्याएका थिए।
पुनः जग्गा फिर्ता गर्दा लिखतमा अत्यधिक मूल्य खुलाई उक्त जग्गा डेकबहादुर गुरुङ र उनकी श्रीमती गुरुङका सहोदर दिदी र भिनाजु र बहिनीसमेतका नाममा बिक्री लिखतले बनाएर खरिदबिक्री देखाएका थिए। ढकालले उक्त जग्गा १ लाख ९७ हजारको लगानी गरी केही दिन र महिनाको अन्तरालमै १ करोड ६८ लाख आर्जन गरेको देखाई बिक्री गरेको देखाएको आयोगको अनुसन्धानमा पाइएको छ।
अनुसन्धानको क्रममा संकलित प्रमाणका कागजात एवं सम्वन्धित व्यक्तिहरुले खुलाई दिएका व्यहोराहरु अनुसार ढकालले सार्वजनिक सेवामा प्रवेश गरेदेखि २०७६ फाल्गुण मसान्तसम्मको जाँचअवधिमा १४ करोड ५३ लाख ८२ हजार ४ सय ९८ रुपैयाँ आर्जन गरेको पाइएको छ।
ढकालको लगानी
- श्रीमती सिर्जना अर्याल ढकालको नाममा दर्ता कायम रहने गरी घर तथा जग्गा खरिदमा रु.४,५४,१७,२४४।
- घर निर्माण र घरमा रहेको फर्निचर तथा फर्नि्सिङ एवं इलेक्ट्रोनिक उपकरणहरु समेतमा रु.१,०१,५३,०८१।
- पूँजिगत लाभ तथा आयकर रु.७,९०,१३०।
- विभिन्न बैंक तथा वित्तीय संस्थाका साधारण तथा संस्थापक शेयर खरिदमा रु.१,११,४६,७०१।
- सन्ततीको अध्ययनमा रु.१,६०,०००।
- जीवन बीमा प्रिमियम शुल्कमा रु. ९,२४,६४०।
- विभिन्न बैंक तथा वित्तीय संस्थाहरुबाट लिएका कर्जा चुक्तामा रु. ६४,६३,५११।
- सवारी साधन खरिद तथा संचालनसमेतमा रु. २८,२२,७००।
- सुन खरिदमा रु. १७,३००।
- सरसापटी व्यवहारमा रु. २०,००,०००।
- जेठान नाताका नवराज अर्यालको नाममा बैंक खाता खोली सो खाता संचालन गर्नेलाई आफू एवं विभिन्न व्यक्तिहरुको नामबाट रकम जम्मा गरे गराएका स्रोत नखुलेको मौज्दात रकमहरुबाट रु.४,२६,९९,२९४।
- विविध शीर्षक (अभिलेखमा देखिने शीर्षकका खर्चहरु बाहेक निजले खुलाईदिएका अन्य विविध खर्च) र साथमा रहेको नगद समेत रु. २,२४,२६,६८९।
- निजी विदेश भ्रमणमा रु. ९२,३००।
- बैंक खाताहरुमा अन्तिम मौज्दात रकम रु. २,६८,९०८।
सोही जाँचअवधिमा ढकालको पारिश्रमिक तलव एवं विभिन्न अतिरिक्त भत्ता लगायतका वचत र सवै परिवारको हिसाब गर्दा ४ करोड आय ४९ लाख ४४ हजार १ सय ६० मात्र वैध भएको अख्तियारको आरोपपत्रमा उल्लेख छ।
ढकालको वैध आय
- श्रीमती सिर्जना अर्याल ढकालको पारीश्रमिक बचत आयबाट ७७ हजार ३ सय ६७, ढकालको वैदेशिक बचत आयबाट १ लाख
- कर्मचारी सचयकोष तथा बैंकबाट लिएका कर्जा ६८ लाख ९१ हजा ७ सय ५१
- घरबिक्रीबाट. १ करोड १५ लाख
- जग्गा बिक्रीबाट .१ करोड ८ लाख ६७ हजार
- २ सय शेयर बिक्रीबाट रु.६,९९,२३०।
- सवारी साधन बिक्रीबाट १२¸९६¸०००।-
- कृषि आय रु.१,००,२७४।
माथि उल्लेखित आय मात्र वैध देखिँदा सोभन्दा बढी देखिएकोले रकमहरुको स्रोत खुल्न नआई गैरकानूनी सम्पत्ति आर्जन गरेको भन्दै ढकालसँग सोही बराबर बिगो, जरिवाना र भ्रष्टचार निवारण ऐन अनुसार सजाय गर्न माग गरिएको छ।
श्रीमती र जेठानविरुद्ध पनि मुद्दा
अख्तियारले सम्पत्ति जफतको प्रयोजनका लागि ढकालकी श्रीमती सिर्जना अर्याल र जेठान नाताका नवराज अर्यालसमेतलाई प्रतिवादी कायम गरी विशेषमा मुद्दा दायर गरेको छ। ढकालले आर्जन गरेको सम्पत्ति उनीहरुको नाममा रहेकाले जफत गर्ने प्रयोजनका लागि उनीहरुलाई प्रतिवादी बनाइएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1784106715.png)
-1764146706.png)
