कोरोना अपडेट

कोरोना हटस्पट नरैनापुरका अध्यक्ष भन्छन्- बिस्तारै बिरामी निको भएर फर्कन थाले‚ खुशी भएको छु

काठमाडौं- बाँकेमा कोरोना भाइरस संक्रमितको संख्या सयबाट नाघेर १ सय १४ पुगेपछि आत्तिएका बाँके नरैनापुर गाउँपालिका प्रमुख इश्तियाक अहमद शाह अहिले अलिक खुशी भएका छन्। अस्तिमात्र बाँकेबाट गाउँपालिकाका ३ जना कोरोना जितेर घर फर्किएपछि उनी अलि ढुक्कको सास फेर्न थालेका छन्।

‘एकातिर संक्रमित बढिरहेका थिए भने अर्कातर्फ क्वारेन्टाइनमा बसेका मानिसहरू पनि धमाधम भाग्न थालेपछि म अताल्लिएको थिएँ’ अध्यक्ष शाहले भने‚ ‘न डाक्टर न त गाउँमा पढे बुझेको मान्छे, म त गाउँ नै सखाप हुने डरले पागल झैं भएको थिएँ।’ यही समयमा गाउँका मानिसहरूले क्वारेन्टाइनमा बसेका र बाँके लगेकाहरूलाई कलेजो झिक्ने र अन्य के के गर्ने भनेर हल्ला फैलाएपछि क्वारेन्टाइनमा रहेका शंकास्पद मानिस भाग्न थालेका थिए।

‘भारतीय सिमाबाट सम्झाएर क्वारेन्टाइनमा ल्यायो‚ बेलुका भागेर खोज्न प्रहरी लिएर जानुपर्ने’ अध्यक्ष शाहले सम्झना गरे‚ ‘समुदायमा सरेर झन् महामारी फैलँदै गाउँ नै सखाप पार्ने हो कि भनेर प्रधानमन्त्री र प्रदेशलाई पत्र लेखेको हो।’ यो अवधीमा आफूलाई सञ्चार माध्यमलगायत अन्य धेरै ठाउँबाट सहयोग भएको उनले बताए।

अहिले क्वारेन्टाइनमा बसेका मानिसहरू पनि अनुशासित भएर बसेको उनले बताए। बाँके जिल्ला प्रशासनबाट सेना परिचलानको निर्णय भएपछि आफुलाई धेरै राहत भएको उनको भनाइ छ। ‘अब गाउँमा एउटै समस्या छ- डाक्टरको’ उनले भने‚ ‘सरकारले एमबिबिएस गरेको एकजना डाक्टर पठाए गाउँमै अस्पताल चलाउने थिएँ र यहीँ उपचार गर्ने थिए।’ गाउँको क्वारेन्टाइनमा अहिले २०० जना मानिस रहेको उनले बताए। उनी अहिले दैनिक क्वारेन्टाइन रेखदेख गरिरहेका छन्।

गाउँपालिकामा छिटै अस्पतालमा रहेका अरु पनि निको भएर आउने खबर आफूले पाएको उनले बताए। गाउँमा उनीहरू फर्केर आएपछि गाउँलेहरूले आफैं सजगता अपाउने उनको विचार छ। ‘यो गाउँमा धेरै पढेका मानिस छैनन्’ शाहले भने‚ ‘यहाँका जनता सोझा भएकाले जसले जे भन्यो त्यसैको पछि लाग्छन्, निको भएर मानिस आउन थाले भने उनीहरूलाई कोरोना जितिन्छ भन्ने लाग्नेछ।’ अस्पतालमा रहेका १ सय ११ जनालाई निको भई संक्रमण पुष्टि नभए आफू धेरै खुशी हुने उनले बताए।

नरैनापुरका गाउँपालिकाका अध्यक्ष शाहले प्रधानमन्त्री केपी शर्मा ओलीलाई पत्र पठाएको भोलिपल्ट सेना परिचालन गर्ने निर्णय भएको थियो। बाँकेको भैरवप्रसाद दल गणबाट सेना गाउँमा गस्तीका लागि पुगेको थियो अहिले पनि सेनाले गाउँमा गस्ती गरिरहेको छ। बाँके जिल्लाकै सबैभन्दा धेरै संक्रमित रहेका उक्त क्षेत्रका मानिसहरू क्वारेनटाइनबाटै भाग्न थालेपछि गाउँपालिका अध्यक्ष शाहले संघ र प्रदेशलाई गुहारेका थिए।

यो नेपाल–भारत सिमाक्षेत्रसँगै जोडिएको गाउँपालिका हो। नेपालगन्जबाट करिब ३५ किलोमिटर पूर्वी–दक्षिणमा रहेको नरैनापुरमा मधेसी समुदायको बसोबास छ। कुनै समयमा नेपाली रुपैयाँ समेत नचल्ने यहाँका अधिकांश व्यक्ति कृषि पेशामा निर्भर छन्। शिक्षा र स्वास्थ्यमा धेरै पछाडि परेका यहाँका प्रायः युवा वैदेशिक रोजगारीका लागि भारत जाने गर्छन्। यही रोजगारीका कारण अहिले नरैनापुर कोरोनाको हटस्पट बनेको छ।

सीमापारी आएर रोकिएका ८ सय युवालाई गाउँपालिकाले वैशाख अन्तिम साता उद्धार गरेर ल्याएको थियो। गाउँपालिकाले निर्माण गरेको क्वारेन्टाइनमा उनीहरूलाई राखियो र परिक्षण सुरु गरियो। कोरोना भाइरस प्रभावित क्षेत्र भारतको मुम्बईलगायत स्थानबाट फर्केर आएका व्यक्तिको क्वारेन्टाइनमै स्वाब परीक्षण गर्दा जेठ २ गते पहिलो पटक नै ८ जनामा कोरोना संक्रमण पुष्टि भयो।

त्यस लगत्तै क्वारेन्टाइनमै बसेको अवस्थामा नरैनापुर गाउँपालिका- ५ का २४ वर्षीय युवकको कोरोना संक्रमणबाटै मृत्यु भयो। एम्बुलेन्सले बोक्न नमान्दा समयमा उनलाई अस्पताल पुर्‍याउन नसकेपछि उनको ज्यान गएको थियो। उक्त घटनापछि नरैनापुरमा झन् डरलाग्दो अवस्था सिर्जना भयो।

समुदायमा गलत बुझाइले फैलायो कोरोना
कोरोना भाइरसबारे यहाँका समुदायमा अहिले पनि बुझाइ गलत भएका कारण पनि फैलिएको अध्यक्ष शाहको भनाइ छ। कोरोना महामारीको मौका छोपेर कतिपय व्यक्तिले राजनीतिक लाभ लिन खोजिरहेका छन्। समुदायको गलत बुझाइ भएका कारण संक्रमित व्यक्ति आइसोलेसनमा बस्नै चाहँदैनन्। केही दिनअघि संक्रमितलाई आइसोलेसनमा लैजान स्वास्थ्यकर्मी र सुरक्षाकर्मी नरैनापुरमा पुग्दा एक समूहले अवरोध गर्ने प्रयास गरेको थियो।

‘गाउँपालिकामा धेरै युवाहरू भारतको मुम्बईबाट फर्केर आएका छन्, उनीहरू भारतबाटै संक्रमित भएर आएको आशंका छ’ अध्यक्ष शाहले भने‚ ‘त्यसकारण धेरै जनामा एकै पटक कोरोना फैलिएको हुनसक्छ।’

कलेजो निकाल्छ, के के निकाल्छ भनेर राजनीति भयो
गाउँपालिका अध्यक्ष शाहले क्वारेन्टाइनमा रहेका युवामाथि राजनीति मिसिएको आरोप लगाए। ‘केही बदमास व्यक्तिहरूले गलत हल्ला फैलाए जसका कारण यहाँबाट मानिस भागे र समुदायमा फैलाउने त्रास सिर्जना भयो’ शाहले भने। शिक्षाबाट पछाडि परेको नरैनापुरमा कोरोना भाइरससम्बन्धी गलत बुझाइ भएका कारण समस्या बल्झिएको उनको भनाइ छ। ‘कोरोना भाइरसविरुद्ध एकजुट भएर लड्नुपर्ने बेलामा उल्टो केही व्यक्तिले कलेजो निकाल्छन् र अरु के के निकाल्छन् भनेर भ्रम फैलाए, मानिस क्वारेनटाइनबाट भागे’ अध्यक्ष शाहले भने‚ ‘जसका कारण समुदायमै फैलियो कि भनेर त्रास भइरहेको छ।’

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।