काठमाडौं- सरकारले ल्याएको नीति तथा कार्यक्रम यथार्थमा आधारित छैन। सरसर्ती सुन्दा यसले धेरै विषय समावेश गरेको छ, जुन आवश्यक थिएन। सरकारले आगामी आर्थिक वर्षमा कार्यान्वयन गर्ने मुख्य नीति र त्यसका लागि आवश्यक पर्ने कार्यक्रम समावेश गरेर नीति तथा कार्यक्रम बनाउनुपर्नेमा अनावश्यक लामो लेखिएको छ।
नीति तथा कार्यक्रम भनिए पनि यसमा आत्मप्रसंशा धेरै छ। सरकारका प्राथमिकता भन्दा पनि विगतमा भएका कामो प्रसंशा धेरै लेखिएको छ। नीति तथा कार्यक्रम पनि बजेट भाषण जस्तै लेखिएको छ। जसले वास्तविक रुपमा नीति तथा कार्यक्रमको चरित्र नै प्रतिबिम्बित गर्दैन।
अहिले हाम्रोमा मुख्य समस्या भनेको नीतिको कार्यान्वयन हो। यो नीति तथा कार्यक्रम कार्यान्वयनयोग्य छैन। अहिले गर्नुपर्ने काम के हो, आवश्यकता के हो र प्राथमिकता के हो भन्ने कुरा नबुझी नीति तथा कार्यक्रम तर्जुमा गरिएको छ।
संघीय सरकारले प्रस्तुत गरेको नीति तथा कार्यक्रममा कार्यालय र विभागले गर्ने विषय समावेश गरिएको छ। स्थानीय तहले सम्पादन गर्ने काम पनि संघीय सरकारको नीतिमा परेको छ।
अहिले कोरोना भाइरसले अर्थतन्त्र ध्वस्त भएको छ। यसलाई पुनर्स्थापित गर्न कठिन छ। यसका लागि कार्यक्रम आउनुपर्ने थियो। नीति तथा कार्यक्रममा यही विषय छुटेको छ। कोरोनाले थलिएको अर्थव्यवस्थालाई पुरानै लयमा फर्काउन सरकारले प्रष्ट दृष्टिकोण दिन सक्नुपर्नेमा त्यसमा चुकेको छ।
शिक्षा, स्वास्थ्य र कृषि एवं रोजगारी सिर्जनाका विषयमा आपत्ति गर्नुपर्ने कुरा छैनन्। तर जसरी धेरै कार्यक्रम समावेश गरिएको छ त्यसले अत्यावश्यक काम पनि नहुने हो कि भन्ने जोखिम पैदा गरेको छ। प्राथमिकता निर्धारण गरेर नीति घोषणा गर्नुपर्नेमा सरकारले अनावश्यक कार्यक्रमलाई बढाइचढाइ प्रस्तुत गरेको छ।
भ्रष्टाचारमा शून्य सहनशीलता भनिएको छ। तर सरकारकै संरक्षणमा भ्रष्टचार भइरहेको छ। त्यसमा आँखा चिम्लिएको छ। त्यसकारण यो विश्वास गर्न सकिने खालको कार्यक्रम नै छै।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787821305.jpg)
-1786602170.png)
