धनगढी- सुदूरपश्चिम प्रदेशमा लकडाउनसँगै खाद्यान्नलगायतका दैनिक उपभोग्य वस्तुको मूल्यवृद्धि भइरहेको जनगुनासो बढे पनि अनुगमन प्रभावकारी हुनसकेको छैन। कालोबजारी तथा महँगी नियन्त्रणका साथै आपूर्ति व्यवस्थापनलगायतको जिम्मेवारी प्रदेश सरकारको उद्योग, पर्यटन, वन तथा वातावरण मन्त्रालयकाे हाे।
प्रदेश सरकारले बजार अनुगमनका लागि निर्देशिका र संरचना तयार गरे पनि बजार अनुगमन भने प्रभावकारी हुन सकेको छैन। लकडाउनयता सुदूरपश्चिम प्रदेशमा पनि खाद्यान्न, तरकारी, फलफूललगायतका दैनिक उपभोग्य वस्तुको निरन्तर मूल्यवृद्धि भइरहेको छ। त्यस्तै, कतिपय व्यापारीले टेलिफोन रिचार्जमा समेत बढी मूल्य लिने गरेको जनगुनासो छ।
प्रदेश उद्योग, पर्यटन, वन तथा वातावरण मन्त्रालयले तीन महिनाअघि तयार गरेको प्रदेशस्तरीय संयूक्त बजार अनुगमन निर्देशिकाअनुसार उद्योग वाणिज्य तथा उपभोक्ता हित संरक्षण निर्देशनालयका निर्देशकको संयोजकत्वमा अनुगमन समिति गठन गरिएको छ भने जिल्लामा घरेलु तथा साना उद्योग कार्यालयका प्रमुखको संयोजकत्वमा समिति गठन हुने व्यवस्था गरिएको छ।
निर्देशनालयका निर्देशक विनोद मालीले लकडाउनका कारण बजार अनुगमन गर्न नसकिएको बताए। उनले भने‚ ‘निर्देशिका र संरचना तयार गरी मन्त्रालयमा दुई पटक बैठक बसेको छ भने निर्देशनालयमा समेत एक पटक बैठक भइसकेको छ। तर, बजार अनुगमन भने गर्न सकिएको छैन।’ उनले कतैबाट उजुरी आए तत्काल बजार अनुगमन गरिने बताए।
निर्देशक मालीले प्रदेश सरकारले बजार अनुगमन गर्ने अधिकार पाए पनि दण्ड जरिवाना गर्ने अधिकार भने नभएको बताए। उपभोक्ता हकहित संरक्षण समितिका कैलाली अध्यक्ष हरि रेग्मीले बजारमा हुने कालोबजारी तथा महँगी नियन्त्रणमा प्रदेश सरकारको खासै भूमिका नदेखिएको बताए।
‘प्रदेश सरकारसँग बजार अनुगमन गर्ने, कालोबजारी तथा महँगी नियन्त्रण गर्ने र अत्यावश्यक वस्तुको अभाव हुन नदिनेलगायतको जिम्मेवारी छ‚’ अध्यक्ष रेग्मीले भने‚ ‘तर, प्रदेश सरकारले जिम्मेवारीअनुसारको काम गर्न सकेको छैन।’ उनले प्रदेश सरकारभन्दा स्थानीय तह र संघीय सरकारले प्रभावकारी रुपमा बजार अनुगमन गरिरहेको अनुभव रहेको बताए।
उनले भने‚ ‘स्थानीय सरकारले बजार अनुगमन गरिरहेको थियो, तर अहिले राहत वितरणमै बढी व्यस्त देखिएको छ। त्यस्तै, संंघीय सरकार मातहतको वाणिज्य, आपूर्ति तथा उपभोक्ता कार्यालयले पनि धनगढी उपमहानगरपालिका बाहेक अन्य स्थानीय तहमा बजार अनुगमन गर्न सकेको छैन।
कैलालीमा तरकारी र फलफूलका साथै चामल, तेल, चिनी, नुनलगायतका दैनिक उपभोग्य वस्तुमा मूल्यवृद्धि भएको व्यापारीहरु बताउँछन्। धनगढीका एक व्यापारीले भने‚ ‘पहिलेको भन्दा ढुवानीमा बढी मूल्य तिर्नु परेपछि सामानको मूल्य पनि बढ्ने नै भयो।’
लकडाउन जारी भएपछि दुर्गम क्षेत्रमा दैनिक उपभोग्य वस्तु, मोबाइल रिचार्ज कार्डलगायतको अभाव सिर्जना गरी मूल्यवृद्धि भइरहेको गुनासो बढेको छ।
पाँच व्यवसायीलाई कारबाही
कैलालीमा कालोबजारी गर्ने पाँच व्यवसायीलाई जरिवानासहित कारबाही गरिएको छ। संयुक्त बजार अनुगमन समितिले कैलालीका पाँच जना व्यवसायीलाई जरिवानासहित कारबाही गरेको हो।
वाणिज्य आपूर्ति तथा उपभोक्ता संरक्षण कार्यालयका प्रमुख कमलबहादुर पुनमगरले लकडाउनका बेला कालोबजारी गर्ने पाँच व्यवसायीलाई पाच लाख ६० हजार रुपैयाँ जरिवाना गरिएको बताए।
धनगढीको द ग्लोबल सर्जिकल हाउसलाई पिपिई र मास्कमा कालोबजारीको गरेको पाइएकाले दुई लाख रुपैयाँ जरिवाना गरिएको छ। त्यस्तै, शुभारम्भ फार्मेसी, शैलैश्वरी आयुर्वेदिक हल र आरबी पूजा स्टोरलाई मास्कमा कालोबजारी गरेकोले जनही २० हजार रुपैयाँ जरिवाना गरिएको कार्यालयले जनाएको छ।
बजार अनुगमन टोलीले अनुगमनका क्रममा पिपिईमा ४४ प्रतिशत र मास्कमा ६० प्रतिशत बढी मूल्यवृद्धि गरेको भेटिएकाले तत्काल जरिवाना गरिएको जनाएको छ।
त्यस्तै, धनगढी उपमहानगरपालिका- ६ मटियारीस्थित शुभ समैजी ग्यास सप्लायर्सले लकडाउनका बेला बढी मूल्यमा ग्यास बिक्री गरेको पाइएकाले तीन लाख रुपैयाँ जरिवाना गरिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
