कोरोना अपडेट

खै त राहत?

शेरबहादुर ऐर शनिबार, वैशाख १३, २०७७ ०९:२८

कैलाली- धनगढी उपमहानगरपालिका १ त्रिवेणी चाेकमा भाडामा बस्दै आएकी छिन् प्रतिक्षा जोशी। चार जनाको परिवार भएकी उनले लकडाउनयता कुनै पनि राहत पाएकी छैनन्। यहीकारणा शुक्रबार उनी धनगढी उपमहानगरपालिका घेराउ गर्न पुगेकी थिइन्। भनिन्- ‘लकडाउनले मसहित मेराे परिवारलाई ठूलो असर गरेको छ ।’ श्रीमान दैनिक ज्यालादारीमा काम गर्छन्। उनले भनिन्,‘घरमा कोही पनि रोजगार छैनन्, म दैनिक ज्याला मजदुरी गरि परिवारको जोहो गर्नेे गर्छु। अब के खाने भन्ने चिन्ताले सताईरहेको छ ।’

उनीमात्र होइन धनगढी १ का अन्य व्यक्तिहरु पनि धर्नामा सहभागी थिए। धनगढी १ मै बस्दै आएका लालबहादुर कामी विद्युतीय रिक्सा चलाउँदै जीविकोपार्जन गरिरहेका थिए । उनले भने- ‘रिक्साबाटै दैनिक खर्च चलेको थियो अहिले न रिक्सा चलाउन पाएको छु न त आम्दानीको स्रोत नै छ। घर भाडामा बसेको छु । स्थानीय सरकारले केही दिएको छैन।’

सरकारले चैत ११ गतेदेखि देशभर लकडाउन जारी गरेको छ। लकडाउन भएपछि आर्थिक रुपमा विपन्न, मजदुर, विद्यार्थी लगायतलाई राहतस्वरुप खाद्यान्न प्रदान गर्ने जनाएको छ। धनगढी उपमहानगरपालिकामा भने घर भाडामा बस्दै आएका अधिकाँस व्यक्तिले खाद्यान्न सहयोग नपाएको गुनासो गरिरहेका छन्।

‘सरकारले लकडाउन प्रभावितलाई राहत उपलव्ध गराई रहेको छ भन्ने सुनेँ’ पीडित प्रतिक्षाले भनिन् ‘त्यही भएर उपमहानगरपालिका घेराउ गर्न आएकी हुँ ।’ उनका अनुसार केही दिन पहिला धनगढी उपमहानगरपालिकाले वडा नम्बर १ का विभिन्न स्थानमा खाद्यान्न वितरण गरेको थियो । उनले भनिन्-‘उपमहानगरपालिकाले वितरण गरेको खाद्यान्न हाम्रो टोलसम्म भने पुग्न सकेन।’

वडा नं १ बस्ने तुली नेपालीले प्रश्न गरिन्,‘'हामी यो देशको नागरिक होइनौँ? राहत पाउनलाई पनि पार्टीगत आस्था बोक्नुपर्छ र ?’

उनले स्थानीय सरकारले राहतमा राजनीति गर्न थालेको आरोप लगाइन्। उनको पाँच जनाको परिवार छ। उनले भनिन्,‘रोगले भन्दा पनि भोकले सताईरहेको छ ।’ उनी पनि दैनिक ज्यालादारी गरी परिवारको जीविकोपार्जन गर्दै आएकी छिन् । उनले भनिन्–‘हामीजस्तो दैनिक गुजारा गर्नेको पीडा कसले सुन्ने ?’

धनगढी उपमहानगरपालिकाका पदाधिकारी र कर्मचारीहरुले आफन्त र आफ्ना पार्टीका कार्यकर्तालाई वितरण गरेको भन्दै शुक्रबार कार्यालय घेराउ गर्न आईपुगेको वडा नं १ का लालबहादुरले बताए।

स्थानीय बसन्ती गुप्ता उपमहानगरको कार्यालयबाट राहत दिइएको थाहा पाएकाे र आफूले नपाएकाे बताइन् । उनले राहत पाउनुपर्ने परिवारभन्दा नजिकका मानिस हेरेर राहत वितरण भई रहेको बताईन्।

धनगढी उपमहानगरपालिका १ का वडाध्यक्षय सन्तोस मुडभरीले सबैलाई राहत दिईरहेकाे र राजनीति नगरेकाे बताए।

भर्खर वितरण गर्दै चुरे?
सरकारले लकडाउन जारी गरेको एक महिना पुगिसकेको छ । कैलालीको दुर्गम मानिएको स्थानीय तह हो चुरे गाउँपालिका । सो गाउँपालिकाले अहिलेमात्र खाद्यान्न वितरण गर्ने तयारी गरेको छ। छ वडा रहेको गाउँपालिकामा हाल छ सय परिवार अति विपन्न रहेका छन्। गाउँपालिकाले एक महिना अवधिसम्म पनि कुनै पनि स्थानीय तहमा राहत वितरण गर्न नसकेको जनाएको छ ।

गाउँपालिका अध्यक्ष धनबहादुर रोक्का मगरले भने–‘शुक्रबारमात्र खाद्यान्न धनगढीबाट गाउँपालिकामा पुगेको छ । शनिबारदेखि वितरण सुरु हुने छ ।’ उनका अनुसार गाउँपालिकाले प्रतिव्यक्ति पाँच किलो चामल, एक किलो दाल, एक प्याकेट नुन, तेल, साबुनलगायत वितरण गर्ने जनाएको छ ।

कांग्रेसले बाँड्यो राहत
चुरे गाउँपालिकाले गाउँपालिकामा राहत वितरण नगरेपछि नेपाली कांग्रेस चुरे गाउँसमितिले लकडाउनका कारण छाक टार्न समस्या भएका परिवारका लागि खाद्यान्न सहयोग गरेको छ।

गाउँपालिकाका नेता-कार्यकर्ताहरुले आफैँ ब्यक्तिगत रुपमा रकम उठाएर शुक्रवार चुरे गाउँपालिकाका अध्यक्ष धनबहादुर रोक्कालाई खाद्यान्न र स्वास्थ्य सामग्री हस्तान्तरण गरेका हुन्। नेपाली कांग्रेस क्षेत्र नं ४ का सभापति दिनेशराज जोशी, वडाध्यक्ष कृष्ण मल्ल नेपाली कांग्रेस जिल्ला सल्लाहकार समिति सदस्य सुरत कार्की, कांग्रेसका स्थानीय नेता तथा कार्यकर्ताहरु राहत सामग्री लिएर वडा कार्यालय पुगेका थिए।

नेपाली कांग्रेस चुरे गाउँ समितिका सभापति डिलबहादुर भाटका अनुसार नेपाली कांग्रेसका नेता-कार्यकर्ताहरुले स्वस्फूर्त रुपमा सहयोग गरेको रकमबाट २० क्वीन्टल चामल, ८० किलो मिक्स दाल, ८० लिटर तेल, ५०० थान मास्क र १ थान पिपिई हस्तान्तरण गरिएको हो।

लामो लकडाउनका कारण बिपन्न, असहायको घरमा चुलो जलाउन नसक्ने अवस्था भएकाले खाद्यान्न सहयोग गरेको नेपाली कांग्रेस गाउँ समितिका सह अध्यक्ष टिकाराम ढुंगानाले बताए। नेपाल तरुणदलका चुरे गाउँ समितिका कार्यवाहक अध्यक्ष खगेन्द्र कठायतले स्थानीय सरकार छाक टार्न समस्या भएकाहरुका लागि गम्भीर नदेखिएपछि आफूहरुले राहत र स्वास्थ्य सामग्री उपलब्ध गराएको बताए । नेपाली कांग्रेसका स्थानीय नेता हेमबहादुर बिष्टले राहत बितरणमा बिभेद नगर्न स्थानीय सरकारसँग आग्रह गरे।

पहुँचका आधारमा राहत

गोदावरी नगरपालिकाले पनि अति विपन्न, दैनिक ज्यालादारीमा काम गर्दै आएका व्यक्तिहरुलाई राहत वितरण गर्ने जनाएको थियो। एक स्थानीयले भने–‘नगरपालिकाले पहुँचका आधारमा राहत वितरण गरेको छ ।’ उनले गोदावरी नगरपालिका २ मा दैनिक ज्यालादारीमा जीविकोपार्जन गर्दै आएका व्यक्तिका नाम सिफारिस गरे पनि नगरपालिकाले कुनै पनि खाद्यान्न उपलब्ध नगराएको गुनासो गरे।

टीकापुर नगरपालिका १ को राहत वितरणलाई लिएर धेरैले असन्तुष्टि जनाएका छन्। कतिपयले सामाजिक सञ्जालमा गैरलक्षित वर्गले राहत पाएको गुनासो गर्ने गरेका छन् । नगरपालिकाले समेत राहत वितरणप्रति चित्त बुझाएको छैन। कहीँ कतै कमि-कमजोरी भैरहेको नगरपालिकाकै भनाइ छ।

वडा कार्यालयले वडाध्यक्षको संयोजकत्वमा २७ सदस्यीय जम्बो आपूर्ति समिति गठन गरेको थियो । साथै सल्लाहकार समिति गठन गरेको थियो। सो समितिले गाउँ-टोलमा विपन्न घरपरिवारको तथ्यांक संकलन गर्न मान्छे खटाएको जनाएको छ।

वडा कार्यालयले पहिलो चरणमा नौ हजार तीन सय घरपरिवारको नामावली ल्याएको जनाएको छ । पुनः नामावली सम्प्रेषण गरि संख्या घटाएर चार हजार एक सय २३ मा झारिएको जनाइएको छ ।

नामावली संकलन गरेकोमा कतिपय वैदेशिक रोजगारमा रहेकाहरुको परिवारको पनि नाम समेटिएको आरोप स्थानीयले लगाएका छन्। स्थानीयका अनुसार जागिरे र विभिन्न पेशा व्यवशाय गर्दै आएकाहरु समेत राहत पाउनेमा परेका छन् ।