सिओल–कोरोना महामारीकै बीच राष्ट्रियसभाका ३ सय सदस्यका लागि दक्षिण कोरियामा आज आम निर्वाचन हुँदैछ। चारवर्षे कार्यकालका लागि चुनिने उम्मेदवारलाई चार करोड ४० लाख मतदाताले मतदान गर्नेछन्।
वर्तमान राष्ट्रपति मुन जे इनको डेमोक्रेटिक पार्टी बहुमत ल्याउने योजनासहित मैदानमा छ। हाल सदनमा यो दलको १२० सिट छ। बलियो प्रतिद्वन्द्वी मानिने युनाइटेड फ्युचर पार्टी पनि आफ्नो बहुमत आउनेमा ढुक्क छ। सदनमा युनाइइटेड फ्युचरको पार्टीको ११२ सिट भए पनि २० सांसदले छुट्टै युनाइटेड पार्टी खोलेर चुनावी मैदानमा होमिएका छन् । उनीहरु पनि आफ्नो बहुमत आउने दाबी गरिरहेका छन् ।
मजदूरको पक्षधर मानिने राष्ट्रपति मुनको तीनवर्षे कार्यकाल पूरा भएको छ। सत्ता सम्हाल्नासाथ मजदूरको ज्याला प्रतिघण्टा १० हजार वन पु¥याउने मुनको महत्वाकांक्षी योजना अझै पूरा हुनसकेको छैन तर पनि अन्य योजनाहरु चुस्तगतिमा अगाडि बढाउनाका साथै कोरोना महामारीलाई घटाउन उनको सरकारले गरेको कदमको विश्वव्यापीरूपमा प्रशंसा भइरहेको छ ।
मुनको पार्टीले निर्वाचनमा बहुमत पाए मुनलाई बाँकी दुई वर्ष आफूले चाहेअनुसारका काम गर्न, नीति नियम बनाउन र योजना पूरा गर्ने अवसर हुनेछ ।
जोखिम हुन नदिन तयारी
कोरियाली निर्वाचन आयोगका अनुसार कोरोना संक्रमण फैलन नदिन सुरक्षा व्यवस्था चुस्त बनाइएको छ । मतदाताले लाइनमा उभिँदा एक मिटर दूरी कायम राख्नुपर्ने, सबैले मास्क लगाउनुपर्ने, मतदान केन्द्र प्रवेश गर्नुअघि स्यानिटाइजर अनिवार्य प्रयोग गर्नुपर्ने छ ।
हातमा स्यानिटाइजर लगाएपछि निर्वाचन आयोगका प्रतिनिधिले दिएको प्लास्टिकको पञ्जा लगाउनुपर्ने व्यवस्था गरिएको छ। मतदानस्थलमा सबै मतदाताको विशेष यन्त्रमार्फत् ज्वरो नापिने र ३७.५ भन्दा बढी तापक्रम भएका मतदातालाई छुट्टै लाइनको व्यवस्था गरिनेछ ।
चुनावमा कोरोना संक्रमितले पनि भोट हाल्न पाउनेछन् । उनीहरु बिहान ९ बजेभन्दा अघि र बेलुकी ६ बजेपछि मात्र मतदान केन्द्र जान सक्ने व्यवस्था मिलाइएको छ। साथै विदेशमा रहेका कोरियाली नागरिकका लागि पनि मतदानको व्यवस्था गरिएको थियो । उनीहरुले दुई साताअघिदेखि नै भोट हालिसकेका छन् ।
कोरोना महामारीका कारण कोरियाली सरकारले सभा सम्मेलन तथा भेला गर्न रोक लगाएको छ। संक्रमण पुष्टि भएपछि गत जनवरी २० बाटै सभा सम्मेलन गर्न रोक लगाइएको छ। दुई वा तीन जना प्रतिनिधिहरुले सामान्य घरदैलो कार्यक्रम गरी प्रचारप्रसार तथा सामाजिक सञ्जाल र फोन म्यासेन्जरबाटै प्रचार भए भने केही स्थानमा भने गाडीबाट माइकिङमार्फत् उम्मेदवारले आफ्नो योजनाको प्रचार गरेका थिए भने ब्यानर पनि टाँसेका थिए।
निको भएका ११६ मा पुनः संक्रमण
कोभिड–१९ बाट संक्रमण भई उपचारपछि निको भएर घर फर्किएका ११६ जनामा पुनः संक्रमण देखिएको छ । यससँगै यहाँका स्वास्थ्य अधिकारीले भाइरस पुनः सक्रिय भएको हो भने यो विश्वका लागि नै चिन्ताको विषय हुनसक्ने बताएका छन्।
पछिल्लो समय दक्षिण कोरियामा नयाँ संक्रमतिको संख्या निरन्तर ओरालो लागिरहेको छ। यसले कोभिड–१९ रोकथामका लागि कोरिया विश्वभर प्रशंसित भइरहेको छ। यहाँ हालसम्म १० हजार ५३७ जनामा संक्रमण देखिएको छ भने २१७ ले ज्यान गुमाइसकेका छन् । रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1769166231.png)
-1769158577.png)
-1769161919.png)
-1764146706.png)
