कोरोना अपडेट

र्‍यापिड टेस्टमा सप्तरीमा २ जना भेटिए कोरोना संक्रमित

दिनेश शर्मा मंगलबार, वैशाख २, २०७७ २३:३९

राजविराज- र्‍यापिड डाइग्नोस्टिक टेस्ट (आरडीटी) किटबाट कोभिड-१९ परीक्षण गर्दा सप्तरीमा दुई जनाको नतिजा पोजटिभ देखिएको छ। राजविराजस्थित गजेन्द्रनारायण सिंह अस्पतालमा मंगलबार ७ जनाको आरडिटि टेस्ट गरिएकोमा २ जनाको रिपोर्ट पोजेटिभ आएको हो।

'७ मध्ये २ जनाको नतिजा पोजेटिभ आएको छ,' अस्पतालका प्रमुख मेडिकल सुपरिटेन्डेन्ट चुमनलाल दासले भने, 'उनीहरु सप्तरीकै स्थायी बासिन्दा हुन्।' उनीहरु सबैको स्वाबको नमुना संकलन गरी परिक्षण गर्न मंगलबारै धरान स्थित बिपी कोईराला स्वास्थ्य विज्ञान प्रतिष्ठान पठाइएको छ।

यसैगरी, प्रहरीले मंगलबार विभिन्न स्थानबाट ३५ जनालाई नियन्त्रणमा लिएर क्वारेन्टाइनमा पठाएको छ। दिल्लीको तबलिकी जमातमा सहभागी भएर फर्केका आठ जनालाई डिमन स्थित एक मस्जिदवाट नियन्त्रणमा लिइएको छ।

भारतका विभिन्न स्थानमा बसोबास गर्ने उनीहरुलाई मस्जिदमै क्वारेन्टाइनमा राखिएको सप्तरीका डिएसपी तिलक भारतीले बताए। उनीहरुसहित सप्तरीमा १२ जना भारतीय नागरिक क्वारेन्टाईनमा रहेको जिल्ला प्रहरी कार्यालय सप्तरीले जनाएको छ।

यस्तै खडक नगरपालिकाबाट २७ जनालाई प्रहरीले नियन्त्रणमा लिएको छ। इलाका प्रहरी कार्यालय कल्याणपुरका अनुसार नियन्त्रणमा लिईएका मध्ये ७ जनालाई आरडिटि टेस्टका लागि राजविराज पठाईएको छ भने २० जनालाई स्थानीय स्तरमै क्वारेन्टाईनमा राखिएको छ।

प्रहरीका अनुसार आरडिटि टेस्टका लागि पठाइएका ७ जना जमातीमा सहभागी भएर फर्केपछि घरमै बसेको पाइएको छ भने र अन्य २० जना सप्तरीको वोदेवरसाईन स्थित इज्तिमामा सहभागी भएका सहभागीहरू हुन्।