काठमाडौं- भारतीय सिमा सुरक्षा बलले पर्साको जगरनाथ गाउँपालिकाका अध्यक्ष जलिम मियालाई कोरोना संक्रमितलाई नेपालबाट भारत पठाएर संक्रमण फैलाउने योजना बनाएको गम्भीर आरोप लगाएको छ।
एसएसबीको पनटोका रामगढवाले गोप्य पत्र पठाउँदै नेपालबाट कोरोना संक्रमित ४० देखि ५० जना भारतीय मुसलमानलाई भारत लैजान लागेको र सो काम मियाले गरेको दावी गरिएको छ। सात तारिखको पत्रलाई आधार बनाएर शुक्रबार भारतीय मिडियाले समाचार प्रशारण गरेका थिए।
कोरोनाको संक्रमण कम गर्न भारत सरकारले २१ दिन लामो लकडाउन गरेको छ। यही मौकामा मिया भारतमा कोरोना संक्रमण फैलाउने योजनामा रहेको पत्रमा दावी गरिएको छ।
पश्चिम चम्पारण बिहारका जिल्लाका अधिकारीले अति गोपनिय भन्दै पठाएको पत्रमा मियालाई जाली भारतीय रुपैंयाको कारोबारीलगायतका गम्भीर आरोप लगाउँदै अहिले उनी कोरोना भाइरस फैलाउने षड्यन्त्रमा लागेको दावी गरिएको छ।
उक्त गोप्य पत्रमा लेखिएको छ, ‘नेपालमा रहेका जालिम मुखिया (जलिम मिया) नाम गरेका एक व्यक्ति कोभिड-१९ को माहामामरी फैलाउने योजनामा छन्।’
पत्रमा जालिम मुखिया भारत तथा नेपालबीच अवैध हतियार सप्लाई तथा तस्करीमा सामेल भएको समेत आरोप लगाइएको छ। उक्त पत्रमा लेखिएको छ, ‘उनकै योजनामा ४०, ५० जना कोरोना संक्रमित मुसलमान भारत प्रवेश गर्न लागेको सूचना आएको छ।’
जिल्ला अधिकारीले पुलिस अधिकारीलाई निर्देशन दिँदै नेपाल-भारत सीमामा सतर्कता अपनाउन भनिएको छ। पत्रमा उनका संदिग्ध गतिविधिको निगरानी गर्न समेत भनिएको छ। जालिम नेपालको पर्सा जिल्लास्थित जगरनाथपुर गाउँपालिकाका स्थानीय भएको बताइएको छ।
जिल्ला अधिकारीले यो पत्र ६ अप्रिलमै लेखेका थिए। त्यसपछि एसएसबीले नेपाल भारतसीमामा सतर्कता अपनाएको बताइएको छ।
राजनीतिक चरित्र हत्या गर्न खोजियो, कानूनी उपचार खोज्छु : मिया
गाउँपालिका अध्यक्ष मियाले भने उक्त आरोपको खण्डन गर्दै आफ्नो चरित्रहत्या गर्न खोजिएको बताए। उनले गाउँपालिकाको फेसबुक पेजमा राखेको भिडियोमा भनेका छन्‚ ‘मित्र राष्ट्र भारतसँग बेटी रोटीको सम्बन्ध छ।’ यसमा आफ्नो पनि साथ सहयोग रहेकाले यस्तो कुरा सोच्न पनि नसकिने उनले बताएका छन्।
‘चाइनामा कोरोना भाइरस फैलिएको थियो के त्यो मैले फैलाएको हो र? अमेरिका, इटाली, फ्रान्स, एसिया, अफ्रिकाका सारा देशमा पनि भाइरसको संक्रमण फैलिएको छ, त्यो मैले फैलाएको होर?’ आरोप लगाउनेप्रति मियाले प्रश्न गरे।
‘म एक राजनीतिक मान्छे हुँ। यस्तो बेलामा समेत अफवाह फैलाएर भारतले मेरो राजनीतिक चरित्र हत्या गरेको छ। यसरी राजनीतिक चरित्र हत्या गर्नेविरुद्ध प्रहरी, प्रशासन र गृहमन्त्रालयसम्म पुग्छु। अफवाह फैलाउने व्यक्ति पहिचान गरेर कानूनी दायरामा ल्याएरै छाड्छु‚’ मियाले भने।
यदि यो आरोपमा आफ्नो कुनै संलग्नता भएको पुष्टि भएमा सजाय भोग्न तयार रहेको तर यसरी चरित्र हत्या गर्न भने नपाइने उनको भनाइ छ।
मौखिक जानकारी आएको छ, उजुरी आएको छैन
यसबारेमा अहिलेसम्म जिल्ला प्रहरी कार्यालय पर्सामा कुनै उजुरी नआएको पर्साका प्रहरी प्रमुख एसपी गंगा पन्तले बताइन्। ‘गाउँपालिका अध्यक्ष मियाले फोनमार्फत उक्त घटनाको जानकारी गराए थिए‚’ एसपी पन्तले भनिन्, ‘त्योभन्दा जानकारी हामीलाई छैन। अहिलेसम्म यस विषयमा कुनै उजुरी पनि आएको छैन।’
त्यस्तो कोराना संक्रिमित व्यक्ति पर्सामा हाल नभएको र त्यो आरोप कसरी लगाइयो भन्नेबारेमा अहिलेसम्म आफूहरु जानकार नरहेको पर्सा प्रहरीको भनाइ छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1763721444.png)
