काठमाडौं- किंग्स कलेजले शुक्रबार ‘इम्ब्रेसिंग द क्यावस’ शिर्षकको अन्तर्राष्ट्रिय भर्चुअल कन्फ्रेन्सको आयोजना गरेको छ। विभिन्न राष्ट्रका प्राध्यापक तथा शिक्षक, नेपाली उद्यमी, विद्यार्थी, शिक्षक, विद्यालयका नेतृत्वकर्ता तथा शिक्षाक्षेत्रमा चासो राख्ने करीब ८५ जना राष्ट्रिय तथा अन्तर्राष्ट्रिय सहभागीहरुको उपस्थिति रहेको थियो।
कोरोना भाइरसको कारण राष्ट्रहरुले बन्दाबन्दी (लकडाउन) को घोषणा गरेसँगै शैक्षिक संस्थाहरुले अनलाइन कक्षा संचालन गरिरहेकाले अनलाइन कक्षासम्बन्धी अन्तर्राष्ट्रिय जगतको अनुभव, सिकाइ, विश्लेषण, सफल अभ्यास तथा अनुसन्धानमाथि विचार विमर्श गर्दै नेपालका शैक्षिक संस्थाहरुलाई अझ सशक्त ढंगबाट अनलाइन कक्षा संचालन गर्न सक्षम बनाउने अभिप्रायले उक्त भर्चुअल कन्फ्रेरेन्सको आयोजना गरिएको किंग्स कलेजले बताएको छ।
‘अनलाइन कक्षाको सम्भावना तथा सिमितता, गुणदोषलगायतबारे विश्लेषण गर्दै शिक्षण संस्थाहरुले यसका लागि आफूलाई कसरी तयारी अवस्थामा राख्न सक्छन् भन्ने विषयको अन्वेषण पनि यसको लक्ष्य रहेको थियो,’ अन्तर्राष्ट्रिय भर्चुअल कन्फ्रेन्सको संयोजक तथा कलेजका प्राचार्य उद्गम खड्काले बताए।
अनलाइन सिकाइ, चुनौती र अवसर, अनलाइन शिक्षाको शिक्षण विधी, अनलाइन शिक्षाको लागि प्रविधीको एकिकरण र विश्वमहारीको समयको शिक्षण विधीलगायत मुख्य विषयवस्तु रहेको सो कन्फ्रेन्स जुम प्ल्याटफर्ममार्फत संचालन गरिएको थियो।
शिक्षा, विज्ञान तथा प्रविधीमन्त्री गिरीराजमणी पोखरेलको अनलाइन सहभागीता रहेको सो कन्फ्रेन्समा बेन्ट्ले विश्वविद्यालयका प्राध्यापक तथा हार्वार्ड विश्वविद्यालयका अतिथी प्राध्यापक बिल सियानो प्रमुख वक्ताको रुपमा उपस्थित भएका थिए।
अनलाइन शिक्षालाई अंगिकार गर्नुपरेता पनि विभिन्न पक्षबाट हेर्दा यो जटिल देखिएको पनि नेपालको समग्र शिक्षा क्षेत्रको लागि उपयोगी हुने मन्त्री पोखरेलले बताए।
कोरोना भाइरसको महामारीपूर्व नै नेपालको शिक्षालाई दूर शिक्षा वा अनलाइन शिक्षामा लैजान सरकारीस्तरबाट विभिन्न पहल भइसेकेको बताउँदै उनले अनलाइन कक्षालाई बढीभन्दा बढी अन्तरक्रियात्मक बनाउनुपर्नेमा जोड दिए।
‘कोरोना भाइरसले शिक्षा क्षेत्रमा पारेको प्रभावलाई अध्ययन गर्न हामीले एउटा समिति गठन गरिसकिएका छौं,” मन्त्री पोखरेलले भनें‚ ‘सो समितिले गरेको अध्ययनको निश्कर्षको आधारमा शिक्षा क्षेत्रको भविष्यको दिशा तय गरिनेछ।’
किंग्स कलेजका कार्यकारी निर्देशक नरोत्तम अर्यालले कन्फ्रेन्सलाई सम्बोधन गर्दै अहिलेको संकटको घडीमा सरकारी वा नीजि क्षेत्र भनेर बस्नुभन्दा पनि एकअर्कासँग सहकार्य र समन्वय गर्दै अगाडि बढ्नुपर्ने आवश्यकता रहेको बताए।
‘अनलाईन शिक्षा नेपालको सन्दर्भमा नयाँ भएकाले अहिले नै कुनै निश्कर्षमा पुग्नुभन्दा उपलब्ध सबै अभ्यासहरु लागू गरी र यसको हरेक पक्ष र आयामलाई केलाई सिक्दै र सुधार गर्दै अगाडि बढ्नुपर्ने आवश्यकता रहेको छ,’ उनले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
