काठमाडौं- चितवनको भरतपुर महानगरपालिकामा कोरोना विशेष अस्थायी अस्पतालमा कोरोना आशंका गरिएका विरामीको जाँच गर्ने कार्यलाई तिब्रता दिएको छ। महानगरका २९ वटा वडामा बसोबास गर्ने गरीब तथा विपन्न परिवारलाई दाल, चामल, तेल, नुन लगायत अत्यावश्यक खाद्यान्न वितरण कार्य समेत सक्रियताका साथ भइरहेको छ।
सीमित साधन स्रोतका बीच कोरोना अस्थायी अस्पताल निर्माणसँगै राहत वितरणलाई कार्यलाई प्रभावकारी रुपमा लगेको भरतपुर महानगरपालिकाकी मेयर रेणु दाहालले बताइन्। ‘हामीलाई प्रदेश सरकारबाट कोरोना रोकथाम तथा नियन्त्रणका लागि २० लाख सहयोग प्राप्त भएको छ। अरु ५० लाख महानगरकै दैविक प्रकोपका लागि विनियोजित बजेट खर्च गरेका छौं’, दाहालले भनिन्, ‘कोरोनाको महामारी संकट अझै टर्न सकेको छैन। अझै धेरै खर्च हुने सम्भावना छ।’
महानगरबासीलाई कोरोना रोकथाम र नियन्त्रणमा स्रोत साधनले भ्याएसम्म काम गरिने दाहालले बताइन्। कोरोना नियन्त्रणमा कडाइका साथ काम गरेकाले कोरोना भित्रन नपाएको महानगरको दाबी छ।
७२ घण्टे कोरोना अस्पताल, १०५ जनाको परीक्षण
कोरोना आंशका गरिएका १ सय ५ जनालाई परीक्षण गरिएको भरतपुर कोरोना विशेष अस्थायी अस्पतालका सदस्य सचिव एवम भरतपुर अस्पतालका अध्यक्ष भेषराज अधिकारीले बताए। जसमध्ये ९५ जनाको स्वाब परीक्षण गर्दा नेभेटिभ आएपछि घर फर्किसकेका छन्। अन्य ९३ जनामा सामान्य ज्वरो आएकाले निको भई अस्पतालबाट डिस्चार्ज समेत भइसकेका छन्।
एकजना बिरामी भरतपुरमा उपचार गर्न नमानेपछि टेकु अस्पताल रिफर गरिएको छ। अस्पतालमा भर्ना भएको एक जनाको कोरोना नभई अन्य कारणले मृत्यु भएको पुष्टि भइसकेको अधिकारीले बताए।
‘हामीले कोरोना लागेका बिरामीका लागि अस्थायी अस्पताल सञ्चालनमा ल्याएका हौं’, अधिकारीले भने, ‘त्यहाँ उपचार गर्न आउने बिरामीलाई उपचार खान बस्न सबै निशूल्क गरेका छौ।’
महानगरभित्रका २५ स्वास्थ्य चौकीबाट २६ चैतसम्म २ हजार ७० जनाको ज्वरो परिक्षण गरिएको छ। अस्थायी अस्पतालमा ५० बेडको जनरल वार्ड, १० बेडको एचडियू र १० बेडको आईसियू गरी कुल ७० बेडको व्यवस्था गरिएको छ।
भरतपुर अस्पताल, चितवन मेडिकल लगायतबाट चिकित्सक स्वास्थ्यकर्मीको व्यवस्था गरिएको अधिकारीले बताए।
भरतपुर महानगरपालिका वडा नम्बर १० मा ३ बिगाहामा फैलिएको प्रदर्शनीस्थललाई ७२ घण्टामै कोरोना विशेष अस्थायी अस्पताल बनाइएको थियो। अस्पताल निर्माणमा आवश्यक पूर्वाधार सहितको सामाग्री भरतपुर महानगरपालिका, जिल्ला समन्वय समिति, उद्योग वाणिज्य संघ चितवन र चितवन उद्योग संघले सघाएका थिए।
महानगरपालिकाले भरतपुर कोरोना विशेष अस्थायी अस्पताल ७ चैतमा सञ्चालनमा ल्याएको थियो। महानगरपालिकाले ७२ घण्टामै अस्थायी अस्पताल सञ्चालनमा ल्याएको भन्दै चर्चा कमाएको थियो।
भारतबाट प्रवेश गर्ने नेपालीमा ध्यान
नेपाल भारत सीमा खुला भएकाले भारतबाट प्रवेश गर्ने नेपालीबाट कोरोना फैलनसक्ने भारतपुर महानगरपालिकाका प्रवक्ता अरुण पीडित भण्डारीले बताए। ‘हामीले जिल्ला प्रशासनलाई भारतबाट प्रवेश गर्ने नेपालीलाई कडाइ गर्नुस् भनेका छौ’, भण्डारीले भने, ‘यदी भारतबाट भागेर नेपालीहरु प्रवेश गरेमा सबैभन्दा धेरै खतरा हुन्छ।’
प्रहरीले ठोरी नाका लगायत क्षेत्रमा नेपालीहरु प्रवेशमा कडाई गरिएको छ। अहिलेसम्म भारत, जापान, मलेसिया, कतार, साउदीबाट आएका २ सय ७८ जनालाई घरमै सेल्फ क्वारेन्टाइनमा बसालिएको छ। उनीहरुको विवरण संकलन गरी वडा प्रमुखको समन्वयमा प्रहरीले निगरानी गरेको छ।
राहतको अवस्था
भरतपुर महानगरपालिकाले आफ्ना २९ वटा वडाका गरीब तथा विपन्न परिवारका लागि चामल, दाल, तेल, नुन साबुन लगायत अत्यावश्यक सामाग्रीहरु वितरण गर्दै आएको छ। महानगरपालिकाकाले लकडाउन भएपछि आफ्ना क्षेत्र भित्रका नागरिकलाई सम्बन्धित वडामा पुगेर राहत उपलब्ध गराएको छ।
चैत २६ गतेसम्म २९ वटा वडाका १० हजार ३ सय ८३ जनालाई राहत उपलब्ध गराएको महानगरका प्रवक्ता भण्डारीले बताए। ‘हामीले महानगरका २९ वटै वडामा भएका गरीब विपन्न परिवारको लगत लिएर अत्यावश्यक वस्तुहरु उपलब्ध गराएका छौं’, भण्डारीले भने, ‘एउटा परिवारलाई सामान्यतया १० किलो चामल, एक किलो दाल र एक लिटर तेल उपलब्ध गराएका छौ।’
तत्कालका लागि एक पटक राहत लिएको परिवारले दोहोर्याएर लिन नपाउने भण्डारीले बताए।
चैत २६ गतेसम्म महानगरले चामल ९९ हजार ९ सय ६९ किलो, दाल ९ हजार ८ सय ६ किलो, तेल ४ हजार ३ सय १९ लिटर, नुन ११ हजार ३ सय ४६ किलो, साबुन २ हजार ६ सय ५१ वटा, अण्डा १ हजार ६ सय ४५ क्यारेट, आलु १ हजार ३ सय २२ किलो, भुजा १ हजार ४ सय ३ किलो र मास्क १ हजार २ सय ७२ वटा वितरण गरिएको छ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।