रोल्पा- एसइई दिने विद्यार्थीलाई लक्षित गरी रोल्पामा दूर शिक्षा कार्यक्रम सुरु गरिँदैछ। कोरोना भाइरसको महामारीका कारण लकडाउनको अवधी थपिँदै गएपछि रोल्पाका युवाहरुको अगुवाईमा यस्तो कार्यक्रमको थालनी गरिएको हो।
सत्प्रयास समूहको आयोजनामा उक्त कक्षा संचालन गरिनेछ। अंग्रेजी, गणित र विज्ञान विषयमा उक्त कक्षा संचालन गर्न थालिएको समूहले जनाएको छ।
‘१५ दिनको प्याकेज बनाएर एफएम रेडियो र युट्युब च्यानलबाट प्रशारण गर्ने तयारी गरिरहेका छौं‚’ अभियान्ता खेम बुढाले भने। म्याराथन कक्षाका रुपमा संचालन हुने सो कक्षाको रेकर्डिङको काम भइरहेको बुढाले बताए। ‘जिल्लाका ७ वटा एफएम रेडियो र सत्प्रयास समूहको यूटुब च्यानलबाट समेत हेर्न सक्ने गरी रेकर्डिङको तयारी गरिरहेका छौं।’ उनले भने‚ ‘१/२ दिनभित्रै प्रशारणको तयारीमा छौं।’
‘कक्षा संचालनका लागि अंग्रेजी, गणित र विज्ञान शिक्षकहरुले स्वयंसेवी ढंगले सहयोग गर्दै हुनुहुन्छ।’ अर्का अभियान्ता ईन्जिनियर मुकेश कुँवरले भने‚ ‘छायांकन र रेकर्डिङमा जिल्लामा कृयाशील टेलिभिजन पत्रकारहरुले निःशुल्क सहयोग गरिरहनु भएको छ।’
जिल्लामा एसइई लक्षित दूर शिक्षा कार्यक्रम संचालन गर्न लागेको भन्दै अभिभावकहरुले खुसी व्यक्त गरेका छन्। लकडाउनको अवधि लम्बिदै जाँदा विद्यार्थीहरु बिग्रन थालेको भन्दै छिटोभन्दा छिटो कक्षा संचालन गर्नुपर्ने सुनिल स्मृती गाउँपालिका-१ घोडागाउँका अभिभावक केशव कुवर प्रदीपले बताए।
परिवर्तन गाउँपालिका-१ कुरेलीका प्रविन मगरले एसइई दिने विद्यार्थीलाई लक्षित गरेर ल्याइएको दूर शिक्षा कार्यक्रमले नतिजा सुधारमा सहयोग पुग्ने आशा व्यक्त गरेका छन्।
रोल्पाली पत्रकार, स्वास्थ्यकर्मी, चिकित्सक, ईन्जिनियर तथा कर्मचारीहरु संलग्न रही केही वर्षअघि गठन भएको सत्प्रयास समूहले जिल्लामा लोककल्याणकारी काम गर्दै आएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787832555.jpeg)
-1786602170.png)
-1786513116.png)
