राजविराज- तरकारी बोक्ने गाडीमा चढेर काठमाण्डौंबाट आएका २५ यात्रुलाई सप्तरीमा प्रहरीले नियन्त्रणमा लिएर क्वारेन्टाइनमा पठाएको छ। २५ मध्ये १४ जना भारतीय नागरिक छन्।
तरकारी पुर्याएर फर्कंदै गरेको ज १ च १५७९ नम्बरको पिकअप भ्यानमा आएका उनीहरुलाई बुधबार राती १२ बजे सप्तरीको कंचनरुप नगरपालिकास्थित बरमझियाबाट नियन्त्रणमा लिइएको हो।
गाडीमा रहेका अधिकांश काठमाण्डौंमै र केही पैदल आउँदै गर्दा बाटोमा चढेको पाइएको छ। लकडाउनका कारण अन्य सवारी नपाएपछि उनीहरु तरकारी बोक्ने गाडीमै घर फर्कन चाहेको प्रहरीले जनाएको छ। सुनसरीका चालक २२ वर्षीय अजय परियारले पैसाको लोभमा उनीहरुलाई लिएर आएको पाइएकाले गाडीसहित नियन्त्रणमा लिइएको जिल्ला प्रहरी कार्यालय सप्तरीका डिएसपी तिलक भारतीले बताए।
चालकसहित २५ जनालाई नै अग्नीसाइर कृष्णसबरण गाउँपालिका-४ स्थित जनचेतना माध्यमिक विद्यालयको क्वाइरेन्टाइनमा राखिएको प्रहरीले जनाएको छ।
उनीहरुमध्ये १४ जना भारतको विहार राज्यस्थित अररिया जिल्लाका हुन् भने अन्य ११ जना सुनसरी, मोरङ्ग, झापालगायतका बासिन्दा रहेको प्रहरीले जनाएको छ।
सबैलाई १४ दिन क्वारेन्टाइनमा राखिने जिल्ला स्वास्थ्य कार्यालय सप्तरीका निमित्त प्रमुख दुनियाँलाल यादवले बताए।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।