न्युयाेर्क- कोरोनाको महामारीबीच अमेरिकाको विसकन्सिनमा राष्ट्रपतिकाे निर्वाचनका लागि प्राइमरी निर्वाचन सम्पन्न भएको छ। राज्यमा घरभित्रै आदेश जारी गरिएको भएतापनि दुईवटा अदालतले निर्वाचन स्थगित हुन नसक्ने फैसला सुनाएपछि निर्वाचन तोकिएकै मितिमा गरिएको हो।
बिहान ८ बजेदेखि ९ बजेसम्म मतदान सुरु गरिएको थियो। मतदान केन्द्रमा नै उपस्थित हुन नसक्ने जनाउँदै अनुपस्थित भएरै मतदानका लागि अनुरोध गरेका तर मंगलबारसम्म हुलाकबाट मतपत्र प्राप्त गर्न नसकेकाहरुले आज भौतिक रुपमा नै उपस्थित भएर मतदान गर्नुपरेको हाे। मतदानमा सहभागीहरु अधिकांशले मास्क लगाएका थिए।
मतदानका लागि जाने मतदाताहरुलाई सामाजिक दूरी कायम गर्न, मतदानस्थलमा जानु अगाडि हात धुन, मतदान गर्नु अगाडि पनि मतदानस्थलमा हात धुन वा स्यानिटाइजर गर्न सुझाव दिइएको थियो। विसकन्सिनबाट डेमोक्रेटिक अधिवेशनका लागि ८४ जना प्रतिबद्ध डेलिगेटहरु छनाेट हुनेछन्।
राष्ट्रपतिका लागि डेमोक्रेटिक उम्मेदवारमा बर्नी स्याण्डर्स र जो बाइडेनबीच मात्र प्रतिस्पर्धा भइरहेको छ। अहिलेसम्म बाइडेनले ११९६ डेलिगेट प्राप्त गरिसकेका छन् भने बर्नी स्याण्डर्सले ८३३ डेलिगेट प्राप्त गरेका छन्। अमेरिकी राष्ट्रपतिका लागि अन्तिम उम्मेदवार हुनका लागि कम्तीमा १९९१ डेलिगेटहरु आफ्नो पक्षमा जित्न जरुरी हुन्छ।
डेमोक्रेटिक पार्टीका राज्यका प्राइमरीहरु र ककसहरुमा मतदाताहरुले सम्भावित राष्ट्रपति उम्मेदवारहरुलाई मतदानमार्फत् चुन्छन्। बन्द प्राइमरी वा ककसमा रजिस्टर्ड मतदाताहरुले मात्र मतदान गर्न पाउँछन्। हरेक प्राइमरी र ककसमा डेलिगेट्सहरुको निश्चित नम्बर हुन्छ। उनीहरुले राष्ट्रिय महाधिवेशनमा आफ्नो राज्यको प्रतिनिधित्व गर्छन्।
प्राइमरी वा ककसबाट जुन उम्मेदवारले आफ्नो पक्षका धेरै डेलिगेट्सहरु प्राप्त गर्छ, त्यही उम्मेदवारले राष्ट्रिय महाधिवेशनमार्फत् प्राइमरी जितेर राष्ट्रपतिको अन्तिम प्रतिस्पर्धामा भाग लिन पाउँछ। पार्टीका आफ्ना स्वतन्त्र डेलिगेट्स र सुपरडेलिगेट्स पनि हुन्छन्। स्वतन्त्र वा सुपरडेलिगेट्सहरु कुनै निश्चित उम्मेदवारलाई मतदान गर्न बाध्य हुँदैनन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
