काठमाडौं–कोरोना भाइरस (कोभिड–१९) रोकथाम तथा नियन्त्रणका लागि आवश्यक स्वास्थ्य सामग्री खरिदको जिम्मा पाएको नेपाली सेनाले त्यसको प्रक्रिया सुरु गरेको छ ।
औषधि खरिदका लागि विभिन्न ५ देशको पहिचान गरि परराष्ट्रमार्फत् पत्राचार गरिसकिएको नेपाली सेनाका प्रवक्ता विज्ञानदेव पाण्डले जानकारी दिए ।
‘आवश्यक सामग्रीको सूची बनाएर हामीले रक्षा मन्त्रालयको स्वीकृति लिएर ५ मित्रराष्ट्रहरु चीन, भारत, दक्षिण कोरिया, सिंगापुर र इजरायलमा पत्राचार गरिदिनु भनेर हामीले परराष्ट्र मन्त्रालयमा लेखिसकेका छौं,’ प्रवक्ता पाण्डेले भने ।
आवश्यक स्वास्थ्य सामग्री खरिदका लागि सेनाले सैनिक सहचारीको सहयोग लिने भएको छ । उनले भने, ‘हामीले छुट्टै पनि सम्बन्धित देशका राजदूत र सैनिक सहचारीसँग भेटघाट गरेर यो कुरा राखिसकेका छौं। हाम्रो दूतावासमा रहेका सैनिक सहचारीहरुले पनि आफ्ना समकक्षीहरुसँग कुरा गरिरहनु भएको छ ।’
परराष्ट्र मन्त्रालयका प्रवक्ता भरतराज पौड्यालले औषधि खरिदमा मन्त्रालयको भूमिका समन्वयकारी मात्रै हुने बताए । ‘रक्षाबाट आएको पत्र हामीले पठाउन ढिला गर्ने भन्ने हुँदैन,’ उनले भने, ‘पत्र आउनेबित्तिकै हामीले सम्बन्धित देशमा रहेका नेपाली दूतावासलाई पत्र पठाइसक्छौं ।’
भारत र चीनमा रहेका नेपाली दूतावसमा सैनिक सहचारी रहे पनि दक्षिण कोरिया, इजरायल र सिंगापुर हेर्ने मलेसियामा रहेको नेपाली दूतावासमा सैनिक सहचारी छैनन् ।
प्रवक्ता पाण्डेले नेपाली दूतावासमा सैनिक सहचारी भएका देशमा उनीहरु नै ओषधि खरिदका लागि विशेष रुपमा खटिने र नभएका देशमा दूतावास लाग्ने बताए ।
चीनमा सहायकरथी विनोद पाण्डे र भारतमा सहायकरथी ईश्वरकान्त मैनाली सैनिक सहचारी छन् । नेपाली सैनिक सहचारी नभएका हकमा सम्बन्धित देशका नेपालमा रहेका सैनिक सहचारीको सहयोग लिइने उनको भनाइ छ।
नेपाली सेनाले स्वाथ्य सामग्री खरिदमा कुनै मध्यस्थकर्ताको प्रयोग नगर्ने बताइसकेको छ ।
विश्व स्वास्थ्य संगठनद्वारा मान्यता प्राप्त सामग्रीहरु मात्र खरिद गरिने र यो प्रक्रिया पारदर्शी हुने सेनाले दावी गरेको छ।
‘खरिद प्रक्रियाका दौरान विश्व स्वास्थ्य संगठनद्वारा मान्यताप्राप्त सामग्रीहरु मात्र खरिद गरिने, मध्यस्थकर्ताको प्रयोग नगरिने, गुणस्तरमा कुनै सम्झौता नगरिने, प्रतिस्पर्धात्मक शैलीद्वारा मूल्य निर्धारण गरिने, सामग्री र यातायातको छुट्टाछुट्टै मूल्य निर्धारण गरिने र समय सीमाभित्र आपूर्तिकर्ताबाट आपूर्तिको व्यवस्था गरिने योजना रहेको छ,’ सेनाले भनेको छ।
सेनाले खरिद प्रक्रियालाई सार्वजनिक खरीद ऐन तथा नियमावलीहरुको परिधिभित्र रही पारदर्शी र मितव्ययी बनाउन सर्वपक्षीय औषधि, उपकरण तथा स्वास्थ्य सामग्री खरीद व्यवस्थापन समिति गठन गर्ने काम अघि बढाईएको पनि सेनाले बताएको छ।
त्यस्तै खरिद गरिने सामग्रीहरुको गुणस्तर निर्धारणका लागि विभिन्न मन्त्रालयका पदाधिकारीहरु सहितको गुणस्तर नियन्त्रण समितिसमेत सेनाले गठन गरिसकेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787821309.webp)
-1786602170.png)
-1786513116.png)
