काठमाडौं–कोरोना संक्रमण न्यूनीकरणका लागि सरकारले गरेको लकडाउनपछि सबै रेस्टुरेन्ट बन्द भएका बेला डल्ले रेस्टुरेन्टले भने अत्यावश्यकीय सेवामा क्रियाशीलहरुलाई खाना खुवाउँदै आएको छ।
अत्यावश्यकीय सेवामा क्रियाशील २ सय १७ जनालाई दैनिक खाना खुवाउँदै आएको रेस्टुरेन्टका सञ्चालक आलोक योञ्जनले जानकारी दिए।
रेस्टुरेन्टले ड्युटीमा खटिएका १ सय ८० प्रहरी, कोरोना भाइरसको उपचार केन्द्र टेकु अस्पताल र प्रयोगशाला शुक्रराज ट्रपिकल अस्पताल टेकुमा क्रियाशील चिकित्सकहरु ६० जना,भाइरससम्बन्धी जानकारी लिने र दिन सरकारले बनाएको निःशुल्क टेलिफोन सेवामा क्रियाशील चिकित्सक १२ जना र भाइरसको आशंका लागेका विरामी बोक्न सरकारले तयार पारेका २५ वटा एम्बुलेन्सका चालकहरुलाई खाना खुवाउँदै आएको छ।
देशलाई परेको विपत्तीमा घरमा चुप लागेर बस्नुभन्दा आफ्नो क्षेत्रबाट सकेको सहयोग गर्ने मनस्थिति बनाएर खाना खुवाउँदै आएको सञ्चालक योञ्जनको भनाइ छ। ‘हामीसँग जे छ,त्यही खुवाइरहेका छौं,’ सञ्चालक योञ्जनले भने, ‘सवारी साधनको पासले गर्दा केही समस्या भएको छ,तर पनि म्यानेज गरिरहेका छौं।’
सुरुमा एक साताका लागि मात्र खाना खुवाउने सोचका साथ अगाडि बढे पनि विपत्ती झन् बढ्दै गएकाले रेस्टुरेन्टको सामाजिक उत्तरदायित्वलाई पनि ख्यालमा राख्दै लकडाउन अवधि(वैशाख)३ गतेसम्मै खाना खुवाउने रेस्टुरेन्टका अर्का सञ्चालक सुवास गौचनले जानकारी दिए। डल्लेका हालसम्म ९ वटा आउटलेट सञ्चालनमा छन्।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।