काठमाडौं- सरकारले घोषणा गरेको लकडाउन उल्लंघन गरेर अनावश्यक रूपमा सडकमा निस्कने सवारीसाधनलाई ट्राफिक नियन्त्रणमा लिँदै आएको छ। अत्यावश्यक कामबाहेक एक जिल्लाबाट अर्को जिल्लामा पुग्ने नाकाहरू, मुख्य सडकहरु तथा भित्री सडकहरूमा ट्राफिक प्रहरीले चेकजाँचमा थप कडाइ गरेको छ।
मंगलबारमात्रै काठमाण्डौं उपत्यकामा लकडाउन उल्लंघन गर्ने ५ सय १० वटा २ पाङ्ग्रे र ३५ वटा ४ पाङ्ग्रे गरी जम्मा ५ सय ४५ वटा सवारीसाधनलाई नियन्त्रणमा लिएको ट्राफिक प्रहरीले जनाएको छ। बिहान ६ बजेदेखि दिउसो ४ बजेसम्म उक्त संख्यामा सवारी नियन्त्रणमा लिएको हो।
महानगरीय ट्राफिक प्रहरी महाशाखाले दिनमा १ सय ५५ स्थान र रातमा ४५ स्थानमा चेकप्वाइन्ट राखी सवारीसाधनहरू चेकजाँच गर्ने व्यवस्था मिलाएको छ। भित्री एरियाको लागि भने मोटरसाइकलमा ट्राफिक प्रहरी खटाएको छ।
कोरोना भाइरसबाट विश्वव्यापी महामारी फैलिएपछि नेपालमा हुने सम्भावित जोखिम रोक्न सरकारले चैत ११ गते बिहान ६ बजेदेखि लागू हुने गरी देशव्यापी रूपमा गरेको लकडाउन उल्लंघन गर्ने सवारी साधनहरूलाई नियन्त्रणमा लिएको र आगामी दिनमा बाहिर ननिस्कने प्रतिबद्धतासहित बेलुका उक्त सवारीसाधन छाड्ने गरिएको महानगरीय ट्राफिक प्रहरी महाशाखाका प्रमुख प्रहरी वरिष्ठ उपरीक्षक भिमप्रसाद ढकालले जानकारी दिए।
'लकडाउन एउटा व्यक्ति वा समूहको फाइदाको लागि गरिएको नभएर तपाई हाम्रो सम्पुर्णको सुरक्षाको लागि हो, यसको पूर्ण पालना गर्न तथा उच्च सुरक्षा सतर्कता अपनाउनपर्छ,' ढकालले आग्रह गरे।
काठमाडौं उपत्यकामा चैत्र ११ गतेदेखि लकडाउन उल्लंघन गर्ने ५ हजार १ सय ९१ वटा सवारीसाधनहरू नियन्त्रणमा लिइसकेको महाशाखाले जनाएको छ।
पाससम्बन्धी नयाँ व्यवस्था
जिल्ला प्रशासन कार्यालय काठमाडौंद्वारा विभिन्न मितिमा जारी भएको ७ (सात) दिने पहेलो रङको सवारी पास अब थपिएको लकडाउन अवधिभर मान्य हुने कुरा जिल्ला प्रशासन कार्यालयले महाशाखालाई पत्राचार गरेको महाशाखाका प्रवक्ता प्रहरी उपरीक्षक जिवन कुमार श्रेष्ठले जानकारी दिए। उनले भने, 'अन्य १ दिने, ३ दिने वा अन्यथा लेखिएका पासहरू भने आजकै मितिबाट खारेज भएको छ।'
पास भएकालाई पनि विशेष निगरानी
पास भएर पनि शान देखाउदै घुम्न निस्कने, तीव्र गतिमा कुदाउने, एक व्यक्तिको नाममा भएको पास अर्को व्यक्तिलाई दिने उपर महाशाखाले विशेष निगरानी तथा चेकजाँच गरी कारबाही गर्न थालेको जानकारी प्रवक्ता श्रेष्ठले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
