काठमाडौं- सर्वोच्च अदालतले भारतलगायत अन्य देशमा रहेका नेपालीबारे पाँच बुँदे अन्तरिम आदेश जारी गरेको छ। न्यायाधीश दिपककुमार कार्की र मनोजकुमार शर्माको संयुक्त इजलाशले भारतीय सिमामा अलपत्र परेका नेपालीदेखि विदेशमा भिसा अवधि सकिएका नेपालीलाई समेट्दै पाँच बुँदे अन्तरिम आदेश जारी गरेको हो।
अधिवक्ता माधवकुमार बस्नेत, मनिषकुमार श्रेष्ठले दायर गरेको दुईवटा रिटमा आदेश गर्दै सर्वोच्चले भारतमा रहेका नेपालीहरुलाई उनीहरुले चाहेमा नेपाल प्रवेश दिन भनेको छ। यसरी नेपाल छिर्नेहरुलाई अनिवार्य रुपमा क्वारेनटाइनमा राख्न पनि भनेको छ।
हवाई सेवा बन्द हुँदा र भारतीय सिमामा नेपाली अलपत्र पर्दा सरकारले उद्धार नगरेको भन्दै सर्वोच्चमा रिट दायर भएको थियो। देशका नागरिकलाई प्रवेश नदिनु गैरकानुनी भएको जिकीर गर्दै दायर भएको रिटमा सर्वोच्चले सरकारी पक्षसँग पनि छलफल गर्दै अन्तरिम आदेश जारी गरेको हो।
यस्तो छ पाँच बुँदे आदेश
१. विदेशमा खान बस्न र स्वास्थ्य उपचारको अभाव झेलिरहेका वा विपतमा परेका नेपाली नागरिकहरुको पहिचान गरी नेपाल फर्कन चाहने इच्छुक नेपाली नागरिकलाई सम्बन्धित मुलुकसँग कुटनीतिक पहल वा माध्यमबाट समाधान गरी ल्याउन व्यवस्था गर्नु/गराउनु, तत्काल सम्भव नभए उनीहरुको उचित खान,स्वास्थ्य र बसाइको व्यवस्था मिलाउन
२. नेपालीहरु विदेशबाट नेपाल आएको अवस्थामा आएका सम्पुर्ण व्यक्तिहरुको नाम थर वतनसहितको अद्यावधि लगत राखेर मात्र नेपाल प्रवेश गराउने र उनीहरुलाई क्वारेनटाइनमा राख्ने
३. नेपाल भारतको सिमामा रहेका नेपालीहरुलाई उनीहरुले चाहेमा नेपाल ल्याई निश्चित समय क्वारेनटाइनमा राख्ने र त्यस्तो गर्न तत्काल सम्भव नभए भारत सरकारसँग सम्वन्वय गरी खान,बस्न र उपचारको व्यवस्था गर्ने
४. क्वारेनटाइनमा रहेका व्यक्तिलाई विश्व स्वास्थ्य संगठनको मापदण्डअनुसार स्वास्थ्य उपचारलगायतको सेवा प्रदान गर्नेगरी व्यवस्थित रुपमा सञ्चालन गर्न
५. विदेशमा रहेका नेपालीहरुको भिसा समाप्त भएको वा राहदानीको म्याद समाप्त भएको कारणबाट कुनै समस्यामा भए सम्बन्धित देशसँग सम्वन्वय गरी नियमित बसाइ नियमित गर्ने व्यवस्था मिलाउनु
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
