काठमाडौं- कोरोना संक्रमणको त्रासका बीच चैत ११ गतेदेखि लागू भएको लकडाउनका कारण कृषि क्षेत्र प्रभावित हुन नदिन राष्ट्रिय कृषक समूह महासंघले यो क्षेत्रलाई समेटेर छुट्टै राहत प्याकेज ल्याउन सरकारलाई आग्रह गरेको छ।
कृषि प्रणालीमा परेको प्रभावले कृषि उपजको उत्पादकत्व र खाद्यन्न आपूर्तिमा दुरगामी असर पार्नेमात्र नभई खाद्य संकटको अवस्थाको श्रृजनासमेत हुने हुँदा राहत प्याकेजका लागि सरकारसँग आग्रह गरेको हो।
सिमान्त समुदाय, मजदुर र श्रमिकको लागि तत्काल आवश्यक खाद्यान्नको पूर्वानुमान र योजना बनाई श्रोतको खोजीमा लाग्न महासंघले सरकारलाई अपिल गरेको छ। कृषि कर्ममा संलग्न किसानहरुको सुरक्षाको प्रत्याभूतिसहित उत्पादनका लागि आवश्यक सामाग्रीहरुको सर्वसुलभ रुपमा उपलब्धता एवं कृषि कामको निरन्तरता, कृषि उपजहरुको बिक्री वितरणको लागि उचित वातावरण मिलाउनुपर्ने महासंघको ठहर छ।
अहिलेको विषम परिस्थितिबाट श्रृजना हुनसक्ने खाद्य संकट र भोकमरीको परिदृश्यसँग जुध्न र कृषि तथा खाद्य प्रणालीलाई जोगाउन सरकारले आवश्यक पहल गर्नुपर्ने सहासंघको भनाइ छ।
‘महामारीको समयमा किसान विशेष प्याकेज घोषणा गरी किसान समुदायलाई थप हौसलाको लागि मल, बिउ, कृषि बिमा औजारमा अनुदानलाई वृद्धि गर्दै व्यवस्थित तवरले वास्तविक किसानले मात्र प्राप्त गर्न सक्ने सुनिश्चित वातावरण तयार गरौं। किसान लक्षित स्वास्थ्य बिमा एवं कृषि बिमा थप सहुलियत र सरल प्रकृया जस्ता आधारभूत पक्षमा ध्यान दिऔं।’ महासंघद्वारा सोमबार जारी विज्ञप्तिमा भनिएको छ।
कोरोनाको कारण विदेशमा रोजगारी छाडेर स्वदेश फर्केका र शहरबाट गाउँ फर्केका जनशक्ति, सीप र पूँजिलाई योजनाबद्ध रुपमा कृषिसँग जोड्ने रणनीतिसहितका कार्यक्रम घोषणा गर्न सरकारलाई महासंघले आग्रह गरेको छ।
आवश्यक सुरक्षाका उपाय अपनाएर कृषि काम सुचारु राख्ने व्यवस्था मिलाउन पनि सबै प्रदेश सरकार र केन्द्र सरकारसँग माग गरिएको छ। ‘सरकारले गरेको अनुरोधअनुरुप परस्पर दूरी कायम राखी खेतीपातीको काम नरोकौं। बाली थन्क्याउने, बाली लगाउने, कृषि औजारहरुको प्रयोग गर्ने, गाईवस्तु चराउने, घाँस दाउरा, स्याउला काट्नेजस्ता कामलाई निरन्तरता दिऔं,’ विज्ञप्तिमा भनिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
