काठमाडौं- कोरोना भाइरसको संक्रमण नियन्त्रण तथा रोकथामका लागि दुई सातादेखि गरिएको लकडाउनले बैंकहरुको व्यवसाय घट्न थालेपछि उनीहरुले खर्च घटाउन ब्याजदर घटाउने भद्र सहमति गरेका छन्। बैंकहरुले मुद्दती निक्षेपलाई नविकरण गर्ने क्रममा ब्याजदर घटाउने सहमति गरेका हुन्।
बैंकर्स संघले परिपक्व भएका तथा हुने क्रममा रहेका मुद्दती निक्षेपको ब्याजदरको पुनरावलोकन इमेल, म्यासेजबाट जानकारी दिने समेत सहमति गरेका हुन्। तरलताको अभाव हुन थालेसँगै बैंकहरुले मुद्दती निक्षेपको ब्याजदर १३ प्रतिशतसम्म पुर्याएका थिए। अस्वभाविक रुपमा ब्याजदर बढ्न थालेपछि नेपाल राष्ट्र बैंकको पहलमा बैंकहरुले मुद्दती निक्षेपसहित अन्य ब्याजदरको सिमा तोकेका थिए।
पछिल्लो समय बैंकहरुको आम्दानीभन्दा खर्च बढी छ। खर्च व्यवस्थापनको बलियो औजारको रुपमा उनीहरुले ब्याजदर घटाउने सहमति गरेका हुन्।
डेढ बर्ष पुरानो भद्र सहमतिलाई पुनरावलोकन गर्दै बैंकर्स संघले आधार दर वैशाख १ गते नै प्रकाशित गर्ने निर्णय गरेका छन्। बैंकहरुकले आधार ब्याजदरमा ६ प्रतिशतसम्म प्रिमियम लिन पाउने सहमतिलाई तोडेर ५ प्रतिशतमा झारेका छन्।
बैंकहरुले व्यक्तिगत मुद्दतिको ब्याजदर ८.७५ प्रतिशतमा झारेका छन्। संस्थागतको ८.५ प्रतिशत र नवीकरण गर्दा ८.६ प्रतिशतमा गर्नुपर्ने व्यवस्था गरेका छन्। यसअघि व्यक्तिगतको ९.७५ प्रतिशत, संस्थागतको ९.५ र नवीकरणमा ९.६ प्रतिशत ब्याज थियो। निक्षेपको ब्याजदर मंगलबारदेखि नै घट्ने छ भने ऋणको ब्याजदर वैशाख एक गतेदेखि कार्यान्वयन हुने संघले जनाएको छ।
लकिङ पिरियडमा पनि बैंकहरुले सकेसम्म शाखा खोलेर बैंकिङ सुविधा प्रदान गरिरहेका छन्। विषम परिस्थितिमा डिजिटल कारोबारलाई प्रोत्साहन गर्दै आएका बैंकहरुले ग्राहकहरुलाई आफ्नो खाता नम्बर‚ पिन नम्बरलगायतका विवरण गोप्य राख्न अनुरोध गरेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
