काठमाडाैं- संस्कृति, पर्यटन तथा नागरिक उड्डन मन्त्रालयले नेपाल एयरलाइन्सकाे चार्टर्ड उडानमा बोन ट्राभल्सलाई ५ प्रतिशत कमिसन नदिन निर्देशन दिएको छ। नेपाल एयरलाइन्सले अष्ट्रेलिया उडान बोन ट्राभल्समार्फत् भएको भन्दै कानुनी रुपमा ५ प्रतिशत कमिसन उसले पाउने बताउँदै आएको थियो।
दूतावासले सिधैं जहाज चार्टर्डको अनुमति लिए पनि नेपाल एयरलाइन्सको व्यवस्थापनाले घुमाउरो पारामा ट्राभल्ससँग चार्टर्ड सम्झौता गरेको थियो। नेपाल एयरलाइन्स वाइडबडी जहाजले अप्रिल १ मा २ सय ५७ जना अष्ट्रेलियाका नारिकको उद्धार गरेको थियो। उक्त चार्टर्डमा नेपाल एयरलाइन्सले बोन ट्राभल्सलाई घुसाएको थियो।
कोन ट्राभल्सलाई एजेन्ट बनाएको विषयमा अख्तियारले पनि छानबिन गरिरहेको छ। सोही क्रममा मन्त्रालयले तत्काल बोन ट्राभल्सलाई ५ प्रतिशत कमिसन बापतको २७ लाख ३४ हजार रुपैयाँभन्दा बढी रकम भुक्तानी नगर्न निर्देशन दिएको हो।
यस्तो थियो घटना
नेपाल एयरलाइन्सको वाइडबडी जहाज चार्टर्ड गरेर अष्ट्रेलियन दूतावासले आफ्ना २ सय ५७ नागरिकलाई आफ्नो देश पठाएको थियो। बुधबार साँझ पौने ६ बजे नेपाल एयरलाइन्स २ सय ५७ यात्रु लिएर अष्ट्रलिया उडेको हो।
नेपाल एयरलाइन्सको कमर्सियल विभागले बोन ट्राभल्ससँग मिलोमतो गर्दै आर्थिक हिनामिना गरेको विषय उजागर भएपछि अष्ट्रलिया चार्टर्ड उडान विवादित बनेको थियो।
यद्यपि निमित्त महाप्रबन्धक गणेशबहादुर चन्द, प्रवक्ता अर्चना खड्का र कमर्सियल विभाग प्रमुख टंक दाहालले चार्टर्ड जहाजमा कुनै आर्थिक हिनामिना नभएको दाबी गर्दै आएका छन्। चन्दले यो विषयमा बुझिरहेको जनाएका छन् भने दाहालले अष्ट्रलियन दूतावासको पत्रअनुसार बोन ट्राभल्ससँग चार्टर्ड सम्झौता गरेका बताएका थिए। तर, दूतावासले नेपाल नागरिक उड्डयन प्राधिकरणबाट चार्टर्ड अनुमति लिएको छ।
प्राधिकरणले जारी गरेको पत्रमा पनि दूतावास नै उल्लेख छ। तर, कमर्सियल विभागका दाहालले अनुमति दूतावासले लिए पनि उसैको पत्रका आधारमा बोन ट्राभल्ससँग सम्झौता गरेको बताइरहेका छन्।
नेपाल एयरलाइन्सकी प्रवक्ता अर्चना खड्काले चार्टर्ड जहाजमा नेपाल एयरलाइन्सले यात्रु खोज्ने काम नगर्ने हुँदा प्रतिघन्टा उडानको १८ हजार १ सय डलरका दरले ट्राभल्ससँग सम्झौता भएको बताएकी छन्। उनका अनुसार यो चार्टर्ड उडान २५ घन्टा २५ मिनेटको हो।
सोही आधारमा भन्ने हो भने नेपाल एयरलाइन्सले कुल ४ लाख ५७ हजार २५ डलर पाउने छ। उक्त डलरलाई १ सय २० रुपैयाँका दरले हिसाब गर्दा नेपाल एयरलाइन्सले कुल ५ करोड ४८ लाख ४३ हजार रुपैयाँ आम्दानी गर्छ। ट्राभल्समार्फत् चार्टर्ड सम्झौता गर्दा ट्राभल्सले यसरी भएको आम्दानीको ५ प्रतिशत कमिसन पाउँछ। ५ प्रतिशत कमिसन रकम २७ लाख ४२ हजार १ सय ५० रुपैयाँ हुन्छ।
उक्त कमिसनका लागि नै नेपाल एयरलाइन्सका कर्मचारीले सेटिङमा दूतावासबाट भएको चार्टर्डलाई बोन ट्राभल्समार्फत् गराएको भन्दै विरोध भएको छ। उक्त चार्टर्ड सिधैं दूतावासमार्फत् भएको भए नेपाल एयरलाइन्सले आफैंं टिकट बुकिङ खुल्ला गरेर यात्रु म्यानेज गर्नुपर्ने हुन्थ्यो। यसो गर्दा बोन ट्राभल्सलाई दिनुपर्ने ५ प्रतिशत कमिसन बापतको २७ लाख ४२ हजार १ सय ५० रुपैयाँ नेपाल एयरलाइन्सकै हुने थियाे।
एयरलाइन्स आफैंले सहज गर्न पनि गाह्राे भने थिएन। देशका विभिन्न भूभागमा अलपत्र परेका अष्ट्रलियन नागरिकको उद्धार नेपाल पर्यटन बोर्डले गरेको थियो। टिकट र यात्रुलाई सम्पर्कमा आउन भन्दै नेपाल पर्यटन बोर्डबाट पनि नेपाल एयरलाइन्सले काम गर्न सक्थ्यो। तर, त्यसो गरेन।
बोन ट्राभल्सलाई एक उडानमा साढे ३४ लाख
बोन ट्राभल्सका अनुसार उडानमा २ सय ५२ जनाको टिकट काटिएको छ। जसमा २ सय ३६ जनाको हकमा १ हजार ७ सय ९५ डलर र १६ जनाको हकमा २ हजार ३ सय डलरको टिकट जारी भएको छ। २ सय ३६ जनासँग ५ करोड ८ लाख ३४ हजार ४ सय रुपैयाँ (प्रतिडलर १२० रुपैयाँका दरले हिसाब गर्दा) लिइएको छ।
यसैगरी १६ जनाबाट ४४ लाख १६ हजार रुपैयाँ संकलन गरिएको छ। यो दुवै रकम जोड्दा कुल ५ करोड ५५ लाख ५० हजार ४ सय रुपैयाँ हुन्छ। तर, बोन ट्राभल्सले नेपाल एयरलाइन्सलाई मात्रै कुल ५ करोड ४८ लाख ४३ हजार रुपैयाँ तिर्नु पर्छ।
यसरी तिरेको रकमबाट पनि ५ प्रतिशत कमिसन बापत बोन ट्राभल्सले २७ लाख ४२ हजार १ सय ५० रुपैयाँ नेपाल एयरलाइन्सबाट पाउँछ। यो रकम र टिकटबाट उडाएर नेपाल एयरलाइन्सलाई तिरेर बाँकी रहेको रकम ७ लाख ७ हजार ४ सय रुपैयाँ जोड्दा बोनको आम्दानी ३४ लाख ४९ हजार ५ सय ५० हुन आउँछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1763721444.png)
