काठमाडौं- महामारीको रूपमा फैलिएको कोरोना भाइरस र त्यसले निम्त्याएको लकडाउनको असर विश्वभर नै देखिएको छ। कोरोनाको असर मानिसमा तत्काल देखिनै हाल्छ। तर, त्यसको रोकथामका लागि राज्यले लिएका कदमहरूको असर भने क्रमिकरुपमा देखिँदै जानेछ। अर्थतन्त्रमा कोरोनाको असर आगामी दिनमा हामीले थप झेल्दै जानेछौं।
कोरोनाको प्रभाव मानिसको दैनिक गुजारामा पर्न थालिसकेको छ। दैनिक मजदुरी गर्नेहरूका लागि गुजारा गर्न हम्मेहम्मे परिसकेको छ। त्यतिमात्र होइन माथिल्लो तहमा काम गर्नेहरूमा समेत कोरोना भाइरसको असर देखिने भारतमा गरिएको एक अध्ययनले देखाएको छ।
भारतीय उद्योग परिसंघ (सिआइआइ)ले गरेको सिआइआइ सिइओ स्न्याप पोलले कोरोना भाइरस (कोभिड १९) र त्यसले निम्त्याएको लकडाउनका कारण ५२ प्रतिशत सिइओ (विभिन्न कम्पनीका प्रमुख कार्यकारी अधिकृत)हरूले आफ्नो जागिर गुमाउने अध्ययन प्रतिवेदन सार्वजनिक गरेको द इकोनोमिक्स टाइम्सले लेखेको छ। सिइओहरूले जागिर गुमाउन पर्नुको मुख्य कारण अर्थतन्त्रमा परेको गहिरो असरले आम्दानीमा उल्लेख्य गिरावट हुनु, मागमा कमी हुनु र तल्लो तहका कर्मचारीको समेत जागिर जाने भएकाले उक्त अवस्था आउने अध्ययनले देखाएको सिआइआइ पोलले जनाएको छ।
सिआइआइले सो सर्भे अनलाइनमार्फत गरेको हो। सर्भेमा भारतभरका विभिन्न कम्पनीका २ सय सिइओको सहभागिता थियो।
२०२० को चालू त्रैमास (अप्रिल-जुन)मा कम्पनीहरूको आम्दानी १० प्रतिशत र नाफा ५ प्रतिशत घट्ने अध्ययनले देखाएको छ। भारतका आन्तरिक कम्पनीहरूको आम्दानी तथा नाफामा आउने गिरावटको असर भारतको जिडिपी वृद्धिमै देखिने सिआइआइले उल्लेख गरेकाे छ। लकडाउनको अन्त्य हुँदासम्म १५ देखि ३० प्रतिशत मानिसले आफ्नो रोजगारी गुमाउने सुआइआइले गरेको अध्ययनले देखाएको छ।
सर्भेमा सहभागी कम्पनीहरूले (८० प्रतिशत) यो लकडाउन कहिलेसम्म रहन्छ र त्यसपछिको अवस्था के हुन्छ भन्ने कुरामा धेरै निर्भर रहेको बताएका छन्। लकडाउन सकिएको करिब १ महिनासम्म पनि माग नबढ्ने र लकडाउन सुरू हुनु पूर्वको स्टकका कारण पनि याे हुन्छ भनेर यकिन गर्न नसकिएको फार्महरूको भनाइ छ।
सर्भेका अनुसार विशेष गरी उत्पादन र त्यसमा पनि खाद्यान्न तथा अत्यावश्यकीय वस्तु उत्पादकले लकडाउनमा पनि आफ्नो काम गरिरहेका छन्। यस्ता कम्पनीले अत्यावश्यक वस्तुहरूको उत्पादन, ढुवानी तथा बिक्रीलाई उच्च प्राथमिकतामा राखेका छन्। सरकारले समेत अत्यावश्यक वस्तुको उत्पादन, ढुवानी र उपलब्धता बढाउन निर्देशन दिएको छ।
सरकारले नभइ नहुने खाद्यान्न, औषधिलगायतका लागि राहतसमेत दिएको छ। उक्त प्याकेज फास्टट्र्याकमा कार्यान्वयन गर्न भनिएको छ। उत्पादन उद्याेगमा यसको भन्दा ठूलो प्रभाव लकडाउनको पर्ने सिआइआइ महानिर्देशक चन्द्रजित बेनर्जीको भनाइ छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
