काठमाडौं- यतिबेला देश कोरोना भाइरसको संक्रमण फैलन सक्ने ठूलो जोखिममा छ। विश्व स्वास्थ्य संगठनले कोरोना भाइरसलाई महामारीका रूपमा घोषणा गरेर अति संवेदनशील भएर काम गर्न सचेत गराइसकेको छ। संक्रमण थप फैलन नदिन भन्दै सरकारले लकडाउन गरेको छ।
यो महामारीको संकटकै बेला नेपाली कांग्रेसका शीर्ष नेताहरुले ‘बेतुक’का अभिव्यक्ति दिँदै हिड्न थालेका छन्। ती अभिव्यक्तिमा विरोध चर्कन थालेपछि सच्याउन पनि थालेका छन्। यसले उनीहरुलाई विवादमा तानेको छ।
कोरोना संक्रमणविरुद्ध पूरै देश एकजुट भएका बेला शीर्ष तहका नेताहरु राजनीतिक विषय उठाएर विवादमा तानिएका हुन्। ‘अर्थहीन’ अभिव्यक्ति दिएर आलोचना खेपेका वरिष्ठ नेता रामचन्द्र पौडेलकै स्थिति सहमहामन्त्री डा प्रकाशशरण महतले भोगेका छन्। दुवै नेताको अभिव्यक्तिको आशय सरकार परिवर्तन हुनुपर्ने सन्दर्भसँग जोडिएको छ।
आलोचित भएपछि दुवै नेताले आफ्ना भनाईलाई गलत आशयका साथ बुझिएको तथा बङ्याएको आरोप लगाएका छन्। पौडेल र महतको बोलीको प्रतिवाद पार्टी प्रवक्ता विश्वप्रकाश शर्माले गर्नुपरेको छ।
वरिष्ठ नेता पौडेलले राष्ट्रिय सहमतिको सरकार बन्नुपर्नेमा जोड दिएका थिए। फेसबुक लाइभमा पौडेलको धारणा थियो, ‘यस्तो बेला (लकडाउन) मा आम सहमति आवश्यक हुन्छ। जसका कारणले सरकारका निर्णय कार्यान्वयनमा समस्या नहोस्। यस्तो बेलामा आवश्यक पर्यो भने सहमतिको सरकार पनि बनाउन सक्नुपर्छ। दुनियाँमा यस्तो प्रचलन पनि छ।’
आम सहमतिको सरकार बन्नुपर्ने पौडेलको बोलीमा आलोचना हुन थालेपछि प्रवक्ता शर्माले दुईपटकसम्म ट्विट गरेर ती धारण पौडेलको व्यक्तिगत मात्र धारणा मात्र भएको प्रष्टीकरण दिएका थिए। पौडेलको बोलीमा प्रवक्ता शर्माको धारणा थियो, ‘सरकारमा सँगै नभएर पनि सँगै लड्न सकिन्छ। सरकारलाई हामीले (कांग्रेसले) बल दिने र सरकारले युद्धस्तरमा क्षमता देखाउने बेला हो यो। यो हामी सबैको साझा संघर्ष हो।’
दोश्रोपटक फेसबुक सम्बोधनमा आएका नेता पौडेलले आफ्नो पूर्व धारणा गलत रुपमा बुझिएको भन्दै चित्त दुखाए। उनले भने, ‘राष्ट्रिय सहमतिको सरकार भनेको होइन। संकटको बेला राष्ट्रिय सहमति गरौं भनेको हुँ।’
पौडेलको अभिव्यक्ति मत्थर हुन पाउँदा नपाउँदै सहमहामन्त्री महतले विवादित अभिव्यक्ति दिए।
महतको बोलीको आशय वर्तमान सरकार असफल भएकाले मध्यावधि निर्वाचनमा जानुपर्ने उनको तर्क थियो। नेता महतले व्यक्तिगत मत भन्दै सो धारणा सार्वजनिक गरेका थिए। महतको बोलीको पार्टी भित्र र बाहिरबाट व्यापक विरोध भएपछि उनले विज्ञप्ति निकालेर खण्डन गरेका छन्।
आफ्नो बोलीको बचाउ गर्दै नेता महतले भनेका छन्, ‘कोरोनाको कारण सिर्जना भएको विषम परिस्थितिमा पनि जनताको सुरक्षामा भन्दा व्यापक अनियमिततामा सरकार लिप्त भएको भन्ने विषय रहेको थियो।’
मध्यावधि निर्वाचनको माग नगरेको दाबी गर्दै उनले अफवाहका पछाडि नलागी सत्य तथ्यका आधारमा मात्रै धारणा आग्रह गरेका छन्। महतको भनाई व्यक्तिगत भएको भन्दै प्रवक्ता शर्माले समेत ट्विट लेखेका छन्। 'व्यक्तिगत मतहरु केवल व्यक्तिगत हुन्छन्। पार्टीलाई गांसेर अतिरंजित व्याख्या नगरौं, प्रवक्ता शर्माले टिव्टमा संस्थागत रूपमा नेपाली कांग्रेसको लेख्छन्, ‘न सहमतिको सरकार न चुनाव। यो संकटको घडी जिम्मेवार ढंगले सरकारलाई हरसंभव साथ, तर ढिलासुस्ती, अनियमितता र भ्रष्टाचारविरुद्ध खरो खबरदारी।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
