काठमाडौं–पुरै दुनियाँमा कोरोना भाइरसको कहर बढ्दो छ। यो महामारीबाट सबैभन्दा बढी मृत्यु इटालीमा भयो। इटालीका अधिकारीहरुका अनुसार यहाँ शनिबार एकै दिन कोरोना भाइरसबाट ६ सय ८१ को मृत्यु भयो र यसबाट कुल मुत्यु १५ हजार ३ सय ६२ पुगेको छ।
तर,शनिबार लामो समयपछि आसाको पहिलो किरण देखिएको छ। इटालीमा आम नागरिकको सुरक्षा गर्ने सिभिल प्रोेक्टेक्सन डिभिजनका अनुसार सघन उपचार कक्ष (आईसियु) मा उपचार गरिरहेका बिरामीको संख्यामा पहिलो पटक कमी आएको छ।
डिभिजन प्रमुख एन्जोलो बोर्रेलीले शुक्रबार गम्भीर बिरामीको संख्या ४ हजार ६८ भएकामा शनिबार घटेर ३ हजार ९ सय ९४ पुगेको बताए।
बोर्रेली भन्छन्, ‘यो हाम्रा लागि निकै महत्वपूर्ण आँकडा हो किनभने पहिलोपटक गम्भीर बिरामीको संख्या कम भएको छ। यो यसकारण पनि महत्वपूर्ण छ कि यसबाट हाम्रो अस्पताललाई थोरै राहत मिल्नेछ। जबदेखि हामीले आपतकालीन अवस्था देख्यौं तबदेखि पहिलो पटक गम्भीर बिरामीको संख्यामा कमी आएको छ ।’
इटाली सरकारका साइन्टिफिक काउन्सिलका प्रमुख फ्रान्को लोकतेलीले गम्भीर बिरामीको संख्यामा कमी आउनसक्ने बताए । तर, यसको अर्थ इटालीले गम्भीर चरण पार गरिसक्यो भन्ने लगाउन नसकिने उनको भनाइ छ । उनले भने, ‘यसबाट थाहा लाग्छ कि हामीले जुन तरिका अपनाइरहेका छौं, त्यो प्रभावकारी सावित हुन सक्छ ।’
प्रभावकारी उपाय
इटालीमा नयाँ संक्रमितको संख्यामा पनि कमी आएको छ। शनिबार इटालीमा २ हजार ८ सय ८६ नयाँ संक्रमित भेटिए। अहिले इटालीमा ८८ हजार २ सय ७४ कोरोनाका सक्रिय बिरामी छन्।
इटालीमा २० हजार ९ सय ९६ जना उपचारपछि निको भएका छन्। लोम्बार्डीको उत्तरी क्षेत्र कोरोना भाइरसबाट सबैभन्दा धेरै प्रभावित क्षेत्र हो। पुरै संक्रमितमध्ये ८५ प्रतिशत यसै क्षेत्रका छन्। र, जति मृत्यु भयो ती त्यसमा अधिकांश यसै क्षेत्रका मानिस छन्।
यस क्षेत्रका मानिसलाई घरबाहिर निस्कदा सुरक्षाका लागि मास्क लगाउन अनिवार्य गरिएको छ। यो नयाँ प्रावधान अप्रिल ५ देखि लागू भएर अप्रिल १३ सम्म कायम रहने छ ।
इटालीको उत्तर क्षेत्रको अर्को सहर वेनेतो र एडिगोमा पनि किनमेल गर्न बजार निस्कँदा अनिवार्य मास्क लगाउनु पर्ने नियम बनाइएको छ।
यसअघि पनि यो क्षेत्रमा यो भन्दा कडा कदम उठाइएको थियो। अप्रिल १५ सम्म सडकमा हिँड्न अनुमति दिइएको थिइएन् । मोटरसाइकलबाट पनि बाहिर निस्कन प्रतिबन्ध लगाइएको थियो। सबै पर्यटक स्थल र होटेल बन्द गरिएका थिए। यसका अलवा कुनै पनि किसिमको निर्माण कार्यमा पनि रोक लगाइएको थियो ।
फेब्रुअरीदेखि बिग्रिएको थियो अवस्था
इटालीमा पहिलो संक्रमित भेटिनुभन्दा पहिले नै स्वास्थ्य मन्त्रालयले एउटा टास्क फोर्स गठन गरेको थियो। इटाली युरोपियन देशहरुमध्ये विमान सेवामा प्रतिबन्ध लगाउने पहिलो देश थियो ।
अहिले इटालीमा लकडाउनको अवस्था छ र लोम्बार्डीमा धेरै नै कडा प्रावधान लागू हुँदैछ। त्यसको उल्लघंन गर्नेलाई २ लाखसम्म जरिवाना लाग्ने छ।
यसपछि कोरोना भाइरसमाथि प्रतिबन्ध लगाउने कुरामा इटाली सफल हुन सकेन। स्वास्थ्य विभागका कर्मचारीका अनुसार संक्रमितको उपचार भइरह्यो । तर, उपचारका लागि अस्पताल र शैया कम भए। मानवीय र प्राविधिक साधनको संकट देखियो।
इटालीमा आधिकारिक रुपमा कोरोना भाइरस संक्रमणको सुरुवात २० फ्रेब्रुअरीदेखि भयो, जब एक ३८ वर्षीय आशंकितले लोम्बार्डीको कोडोग्रोमा आफ्नो परीक्षण गराएका थिए।
परीक्षण रिपोर्ट आएपछि यी व्यक्ति कोरोना संक्रमित पाइएका थिए। यही नै इटालीमा आधिकारिक रुपमा दर्ता भएको कोभिड–१९ को केस थियो । तर, केही स्वास्थ्य अधिकारीहरु भने योभन्दा पहिले नै इटालीमा कोरोनाको प्रवेश भैसकेको बताउँछन्।
बीबीसी हिन्दीबाट
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
