काठमाडौं– उपप्रधान एवं रक्षामन्त्री ईश्वर पाेखरेलले कोरोना रोकथाम, नियन्त्रण र प्रतिकार्यको लागि स्थापना गरिएको कोभिड–१९ क्राइसिस म्यानेजम्यान्ट सेन्टर अपरेशन (सिसिएमसी ओप्स)को निरीक्षण गरेका छन्। छाउनीस्थित नेपाली सेनाको महावीर गण (रेन्जर)भित्र स्थापना गरिएको सेन्टरको भ्रमण गर्दै मन्त्री पोखरेलले हालसम्म भए/गरेका काम कारवाहीहरुको जानकारी लिएका हुन्।
भ्रमणको क्रममा पोखरेललाई कोरोना भाइरसको रोकथाम, नियन्त्रण र उपचार, संक्रमित देखिएका बिरामीहरुलाई अस्पतालसम्म पुर्याई उपचारको व्यवस्थालगायत उक्त रोगको प्रतिकार्यको लागि अत्यावश्यक औषधि, उपकरण तथा स्वास्थ्य सामग्रीहरुको आवश्यकताको पहिचान र खरिद प्रक्रियाको सम्बन्धमा प्रस्तुतिकरणमार्फत् जानकारी गराइएको थियो। लकडाउनको समयमा सुरक्षा व्यवस्थालाई थप प्रभावकारी बनाउने विषयका साथै अत्यावश्यक उपभोग्य सामानहरुको आपूर्ति र राहत वितरणलाई प्रभावकारी बनाउने विषयमा समेत जानकारी गराइएको थियो।
गत १६ चैतमा बसेको मन्त्रिपरिषद् बैठकले कोरोना संक्रमण रोकथाम तथा नियन्त्रणका लागि उपप्रधान एवम् रक्षामन्त्री पोखरेलको नेतृत्वमा सिसिएमसी स्थापना गर्ने निर्णय गरेको थियो। सिसिएमसीमा रक्षामन्त्री पोखरेलका साथै गृहमन्त्री, अर्थमन्त्री, उद्योग वाणिज्य तथा आपूर्तिमन्त्री, संघीय मामिला तथा सामान्य प्रशासनमन्त्री र सुरक्षा निकायका प्रमुख रहने व्यवस्था छ।
त्यसलाई कार्यान्वयन तहमा लैजन प्रधानमन्त्री कार्यालयका सचिव लक्ष्मण आर्याल नेतृत्वमा नेपाली सेनाको प्रबन्धरथी तथा स्वाथ्य मन्त्रालयका १२ औं तहका अधिकृत रहने गरी तीन सदस्यीय सिसिएमसी–ओप्स गठन गरिएको थियो। उक्त केन्द्रबाट तीनै तहसम्म निजामती, सुरक्षा निकाय र सबै सरोकारवालाहरुलाई कोरोनाविरुद्धको प्रतिकार्यमा प्रयोग परिचालन गरिनेछ।
केन्द्रदेखि स्थानीयस्तरसम्म एउटै ‘चेनअफ कमाण्ड’मा कोरोना संक्रमितहरुको ट्रयाकिङ, ट्रेसिङ र टेस्टिङ गर्ने, आइसोलेसन र उपचार गर्ने काम हुनेछन्। त्यस्तै स्वाथ्य सेवा तथा उपचार, औषधि उपकरण तथा सामग्री आपूर्ति, शान्ति सुरक्षा, अनुगमन तथा नियन्त्रण गर्ने काम हुनेछ। कोरोनाबारे सूचना तथा प्रविधिसम्बन्धी काम पनि यहीँबाट हुनेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1768291693.png)
-1764146706.png)
