काठमाडौं- कोरोना भाइरस (कोभिड–१९)विरुद्ध लड्न स्थापना गरिएको कोरोना क्राइसिस म्यानेजमेन्ट सेन्टर(सिसिएमसी)का सबै काम छाउनीस्थित नेपाली सेनाको ब्यारेकबाट संचालन हुने भएका छन्।
नेपाल लाइभलाई प्राप्त कागजातअनुसार सिसिएमसीअन्तर्गत संचालित हुने कोरोनाविरुद्धका कारबाही छाउनीस्थित नेपाली सेनाको महावीर गण (रेन्जर)को हाताभित्रबाट संचालित हुने छन्।
गत १६ चैत्रमा बसेको मन्त्रिपरिषद बैठकले कोरोना संक्रमण रोकथाम तथा नियन्त्रणका लागि उपप्रधान एवम् रक्षामन्त्री ईश्वर पोखरेलको नेतृत्वमा सिसिएमसी स्थापना गर्ने निर्णय गरेको थियो।
सिसिएमसीमा रक्षामन्त्री पोखरेलका साथै गृहमन्त्री, अर्थमन्त्री, उद्योग वाणिज्य तथा आपूर्ति मन्त्री, संघीय मामिला तथा सामान्य प्रशासन मन्त्री र सुरक्षा निकायका प्रमुख रहने व्यवस्था छ।
सरकारले जारी गरेको आदेश कार्यान्वयन गराउने, क्वारेन्टाइन र कोरोना संक्रमितको उपचारका लागि तयार पारिएका अस्पतालहरुको व्यवस्थापन गर्ने भूमिका मन्त्रिपरिषदले सिसिएमसीलाइ दिएको थियो।
त्यसलाई कार्यान्वयन तहमा लैजना प्रधानमन्त्री कार्यालयका सचिवको नेतृत्वमा नेपाली सेनाको प्रबन्धरथी तथा स्वाथ्य मन्त्रालयका १२ औं तहका अधिकृत रहने गरी तीन सदस्यीय कोभिड-१९ क्राइसिस म्यानेजमेन्ट सेन्टर अपरेशन (सिसिएमसी-ओपिएस) गठन गरिएको छ।
सिसिएमसीका संयोजक समेत रहेका मन्त्री पोखरेल नेतृत्वको विभिन्न मन्त्रीहरुसहितको टोलीले गत १८ गते छाउनी पुगेर ससिएमसी-ओपिएसको कार्यालय समेत निरीक्षण गरिसकेको छ।
हालसम्म सिसिएमसी-ओपिएसको कार्यालय स्थापना, प्रारम्भिक सूचना प्रणालीको विकास र अत्यावश्यक जनशक्तिको व्यवस्थापन समेत भइसकेको छ।
केन्द्रबाट संचालित हुने काम
केन्द्रबाट तीनै तहसम्म निजामती, सुरक्षा निकाय र सबै सरोकारवालाहरुलाई कोरोनाविरुद्धको प्रतिकार्यमा प्रयोग परिचालन गरिनेछ।
केन्द्रदेखि स्थानीयस्तरसम्म एउटै ‘चेनअफ कमाण्ड’मा कोरोना संक्रमितहरुको ट्रयाकिङ, ट्रेसिङ र टेस्टिङ गर्ने, आइसोलेसन र उपचार गर्ने काम हुनेछन्।
त्यस्तै स्वाथ्य सेवा तथा उपचार, औषधि उपकरण तथा सामाग्री आपुर्ति, शान्ति सुरक्षा, अनुगमन तथा नियन्त्रण गर्ने काम हुनेछ। त्यस्तै कोरोनाबारे सूचना तथा प्रविधिसम्बन्धी काम पनि यहीँबाट हुनेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
