काठमाडौं- बिहीबार बसेको कोरोना रोकथाम तथा नियन्त्रण समितिको १६ औं बैठकले ठूला आयोजनाको काम बन्द नगर्नेदेखि सीमापारी रहेका नेपालीलाई १४ दिन नेपाल प्रवेश गर्न नदिनेसम्मका केही महत्वपूर्ण निर्णय गरेको छ। सीमापारी भारततर्फ रोकिएका नेपालीहरु अनिवार्य रुपमा १४ दिन त्यहाँको क्वारेन्टाइनमा बसेपछि मात्र नेपाल प्रवेश पाउनेछन्।
बैठकको निर्णय सुनाउँदै अर्थमन्त्री एवं संचार तथा सूचना प्रविधि मन्त्री डा. युवराज खतिवडाले खाद्यान्न र अत्यावश्यक वस्तु उत्पादन गर्ने उद्योगको कामलाई निरन्तरता दिने, ठूला आयोजनाको कामलाई निरन्तरता दिने, कृषि कार्यलाई निरन्तरता दिने र सीमापारी रोकिएका नेपालीलाई १४ दिनसम्म उतैको क्वारेन्टाइनमा बस्न आग्रह गर्नेलगायतका निर्णय भएको जानकारी दिए।
समितिले औषधि, खाद्य सामान र इन्धनको आपूर्ति असहज नहोस् भनेर ढुवानीका साधनलाई सहज रुपमा चल्न दिने र नियमित रुपमा आपूर्ति भइरहेको दैनिक उपभोग्य वस्तुहरु र मुलुकभित्र उत्पादन हुने वस्तुहरुको पनि लेखाजोखा राख्ने निर्णय गरेको छ। मुलुकभित्र खाद्य सामाग्री उत्पादन गर्ने उद्योगहरु र अति आवश्यक वस्तु उत्पादन गर्ने उद्योगहरुलाई त्यही उद्योगभित्र कामदारलाई सुरक्षित राखेर, स्वास्थ्यका मापदण्ड पुरा गरेर काम गर्न दिने र अरु पनि उद्योगहरुले आवासीय रुपमा मजदुर परिचालन गरेर उत्पादनका कामलाई निरन्तरता दिने निर्णय गरेको छ।
बाहिरबाट हुने आवागमनलाई रोकेर उद्योगभित्रै कामदार राखी काम गर्न सकिने अवस्थामा उद्योग संचालन गर्न दिने निर्णय भएको अर्थमन्त्री खतिवडाले बताए।
त्यस्तै मेलम्ची, तामाकोशीलगायत ठूला आयोजनाको काममा निरन्तरता दिन समितिले निर्णय गरेको छ। अरु आयोजनाहरुले पनि आफ्नो कार्यस्थलमा रहेका कामदारलाई बाहिर नपठाइकन र बाहिरका कामदारलाई त्यहाँ प्रवेश गर्न नदिइकन आयोजना निर्माणको कामलाई संचालन गर्न दिने समितिले निर्णय गरेको हो।
आयोजना निर्माणस्थलमा बाहिरबाट मानिसहरुको प्रवेश रोक्ने र आयोजनास्थलमा भएका कामदारहरुलाई बाहिर निस्कन नदिने कार्यमा स्थानीय प्रशासनले सहयोग गर्ने पनि समितिले निर्णय गरेको छ।
हिउँदे बाली काट्ने र वर्षेबाली लगाउने कामलाई निरन्तरता दिने पनि समितिले निर्णय गरेको छ। कृषि कार्यका लागि कामदार बाहिरबाट नल्याउने तर खेतीपातीको काम पनि नरोक्ने समितिले निर्णय गरेको हो।
कोभिड १९ क्राइसिस म्यानेजमेन्ट सेन्टर प्रभावकारी रुपमा संचालन गर्ने, स्वास्थ्य उपचार सामाग्री, लजिस्टिक आपूर्ति र शान्ति सुरक्षाका विषयमा क्यालेण्डर बनाएर काम गर्ने पनि सिसिएमसीले निर्णय गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
