काठमाडौं- कोरोना भाइरसविरुद्धको लडाईंमा सरकारलाई साथ दिन तयार रहेको काठमाडौं मेडिकल कलेज जानकारी गराएको छ। बुधबार कलेजले एक विज्ञप्ति जारी गर्दै आफ्नै पहलमा विभिन्न तयारी गरेको जानकारी गराउँदै सरकारले सहयोग चाहेमा सहयोग गर्ने प्रतिबद्धता जनाएको हो।
काठमाडौं र दुवाकोट ज्वरो क्लिनीक संचालन गरिरहेको जनाएको अस्पतालले शंकास्पद बिरामी आए अस्पतालमै आइसोलेसनमा राख्न पहिलो चरणमा ७ बेडको कोरोना आइसोलेसन क्यूबिकल वार्ड, १० बेडको कोरोना केयर वार्ड तथा ३ वटा भेन्टिलेटर सहित कोरोना केयर आईसियू बेड को स्थापना गरेको जानकारी गराएको छ। सरकारको सहयोग पाएमा कलेजले दुवाकोट अस्पतालमा २२ वटा तयारी अवस्थाको क्याबिन, १०० साधारण शय्या (५० वटा आइसोलेसन र ५० वटा कोभिड शय्या), ५ वटा भेन्टिलेटरसहित १० वटा आईसियू संचालन गर्ने योजना गरेको समेत उनले बताइन्।
अस्पतालका सम्पूर्ण वेडहरु उपचारमा प्रयोग गर्न परेमा पनि सरकारलाई सहयोग गर्न तयार रहेको अस्पतालले जारी गरेको विज्ञप्तिमा उल्लेख छ। केएमसी व्यवस्थापनले स्वास्थ्य मन्त्रालय तथा भक्तपुरका स्थानीय सरकारलाई पत्राचार गरिसकेको समेत जानकारी गराएको हो। अस्पतालका आकस्मिक सेवासमेत यथावत् संचालनमा रहेको समेत जानकारी गराईएको छ।
कलेजले अस्पतालमा कोभिड-१९ को व्यस्थापनको लागि कार्यदलसमेत गठन गरेको छ। सर्वसाधारणहरुलाई शंका लागेमा ज्वरो क्लिनीकमा गई वा फोनबाटसमेत आवश्यक जानकारी लिन सकिने व्यवस्था मिलाइएको अस्पतालकी प्रमुख चन्दा कार्कीले जानकारी दिइन्।
सर्वसाधारणलाई स्वास्थ्य सम्बन्धी केही समस्या आई घरबाट नै परामर्श लिनु परेमा अस्पतालले सो समेतको व्यवस्था गरेको र सम्बन्धित चिकित्सकहरूको नाम, टेलिफोन र तालिकासमेत सार्वजनिक गरेको छ।
कोरोनाको शंका भएका वा अन्य कुनै कारण स्वास्थ्य सम्बन्धित आकस्मिक समस्या आई आकस्मिक सेवा लिनु परेका बिरामीलाई प्रोटोकल बमोजिम सेवा दिइहेको र घरबाटै विशेषज्ञ चिकित्सकसँग परामर्श लिन सकिने व्यवस्था मिलाइएको अस्पतालका मेडिकल डाईरेक्टर प्रा. डा. मुकुन्द राज जोशीले बताए। तीनै तहका सरकार र स्वास्थ्य मन्त्रालय तथा सरोकारवाला निकाय र सर्वसाधारणहरुलाई आवश्यक सहयोग गर्न यस कलेज परिवारप्रतिबद्ध रहेको कलेजकी कार्र्यकारी प्रमुख प्रा.डा. चन्दा कार्कीले उल्लेख गरिन्।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।