दोस्रो पटकको मिर्गौला प्रत्यारोपण गरेर प्रधानमन्त्री केपी शर्मा ओली सरकारी निवास फर्कनुभएकाे छ। क्या गजबको खबर। डिस्चार्ज भएर अस्पतालबाट सरकारी निवासमा फर्कँदै गर्दा प्रधानमन्त्रीज्यूले जसरी हात हल्लाउनुभो नि त्यो झन् गजब। आत्मबलको त के कुरा! दोस्रो प्रत्यारोपणमा यो उत्साह! गजबैगजब।
तर, ध्यान वरिपरि नि गयो। प्रधानमन्त्रीलाई बिदाइ गर्न आएका अधिकांशको मुखमा मास्क छ। तर, प्रधानमन्त्री मास्कविहीन!
अरे, कोरोना भाइरसको महामारी छ। प्रधानमन्त्री भर्खर जोखिमयुक्त शल्यक्रिया गरेका बिरामी हुन्। अनि संक्रमणको जोखिम छ, उहाँको स्वास्थ्यमा। तैपनि मास्क छैन?
साहस गजब हो! दुस्साहसको परिणाम यति लामो राजनीतिक लडाइँ लडेका व्यक्तिलाई के भन्नु पर्छ र!
प्रधानमन्त्री ओली बिदाइ हुँदै गर्दाको दृष्यमा उनको ज्यानलाई टेको लगाएको तीन हात पनि देखियो। लड्खडाएको ज्यान पनि देखियो। दृश्य देखाउँछ प्रधानमन्त्रीलाई टेको अनिवार्य छ।
व्यक्ति टेकोमा चल्ला तर देश कति समय टेकोमा चल्ला?
लाग्ला, प्रधानमन्त्री स्वस्थ भइसके। प्रमाणका रूपमा सामाजिक सञ्जालमा आएका प्रधानमन्त्रीका स्टाटस नि पेश होला। तर, ती स्टाटस फुराउने औंला पक्कै उनका हैनन्। लड्खडाएको ज्यान अनि डिस्चार्ज गर्दा चिकित्सकको नियाउँँरो मुहार त्यसको प्रमाण हो।
चिकित्सक मात्र हैन, आमजन आफ्ना प्रधानमन्त्रीको स्वास्थ्यका लागि चिन्तित छन्। दीर्घायु भव:।
सँगै देशको स्वास्थ्यको नि चिन्ता छ। प्रधानमन्त्रीको ज्यान झैं देश पनि संक्रमणको जोखिममा छ।
प्रधानमन्त्री अस्पतालको बेडमा हुँदा देश पनि बेडमै पुगेको आभास गराएकै हुन् मन्त्रिपरिषद्का अन्य सदस्यले। प्रधानमन्त्री अब सरकारी निवासमा 'आइसोलेसन'मा बसेका छन्। देशलाई नि आइसोलेसनमै राख्ने!
प्रधानमन्त्री बिरामी हुन्छन्, व्यक्ति हुन्। तर, देश बिरामी हुन्छ कि हुन्न? प्रधानमन्त्री व्यक्ति हुन्, बेहोस हुन पाउँछन्। देश बेहोस हुन पाउँछ? छुट छ, देशलाई बेहोस हुन?
प्रधानमन्त्री शिक्षण अस्पतालमा बेहोस हुँदा देश पनि बेहोस भएकै हो। कोरोनाको त्रास हुँदा ह्वारह्वार्ती पर्यटकको स्वागत गरिँदा देश पक्कै होसमा थिएन। विकसित र बलियो संयन्त्र भएको देश कोरोनासँग त्रसित हुँदा 'आयो भने देखा जायगा' भन्नु बेहेसी नै त हो।
000
विवेकीका लागि व्यक्ति र कार्यकारी पद अलग हुन्। देश अलग हो, व्यक्ति अलग हो। हिजो राजाको विकल्प राजा नै थिए। ओच्छ्यान परे पनि उनले नचाहेसम्म बागडोर सर्न सम्भव थिएन। उनको मुड बाहेक अर्को विधि थिएन।
जन्मेको आधारमा शासक हुने परम्परा तिलाञ्जली दिइसक्यौं। तर, शासकै देश हो भन्ने सोच चिसो हातमा तिल टाँसिए झैं दिमागमा भने टाँसिइनै रहेछ।
डिस्चार्जका दृश्य प्रष्ट छन्, ओलीको स्वास्थ्य प्रधानमन्त्रीको जिम्मेवारी बहन गर्न फिट छैन। शरीरका इन्जिनको अवस्था खुलेको छैन। डिस्चार्ज हुँदै गर्दा देखिएको स्वास्थ अवस्थाकै आधारमा पनि ओलीको ज्यानलाई आराम चाहिएको देखाएकै छ।
चिकित्सककै भनाइले पनि काम हैन, आराम नै प्रेस्क्राइब भएको देखाउँछ। साहस पहाडै उचाल्ने छ भन्दैमा ज्यान पनि पहाड उचाल्न फिट हुन्न।
व्यक्ति बिरामी हुँदा देश बिरामी हुन्न। देशप्रेमी नेताले आफू बेडमा पर्दा देशलाई पनि सँगै बेडमा सुताउँदैनन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
