काठमाडौं- 'बजार सधै बढ्छ' मात्रै भन्ने मानसिकतामा रहेका लगानीकर्ता आत्तिएर सेयर बेच्दा सोमबार सेयर बजारमा व्यापक घटेको छ। आइतबार ४० अंकको गिरावट आउँदा 'करेक्सन' भएको विश्लेषण गरिरहेका लगानीकर्ता सोमबार पनि बजार घट्न थालेपछि आत्तिएर बेच्न थालेपछि बजार झनै घट्न पुगेको हो। थप गुमाउनुभन्दा भएको सेयर बिक्री गरेर बाहिरिँदा राम्रो हुने विश्लेषण गरेका लगानीकर्ताले सेयर बेच्दा 'पेनिक सेल' बढ्न पुगेको हो।
विगत दुई वर्षको अवधिभित्र सेयर खरिद गरेकाहरूले पछिल्ला दिनमा राम्रो नाफा आर्जन गरिसकेका थिए।
अधिकांशका मनमा बजार घट्ने परिकल्पना पनि थिएन। यसले गर्दा सोही सेयर बैंकमा धितो राखेर, साथीभाइसँग सापटी लिएर खरिद गर्नेको लहड चल्यो। बजार बढेपछि स्वभाविक रुपमा घट्ने हेक्का पनि नराखी फागुन ११ गते यता सेयर खरिद गरेकाहरु दुई दिनमै घाटामा देखिए। जबकि यही अवधिमा दोस्रो बजारमा दैनिक तीन अर्ब रुपैयाँभन्दा माथिको कारोबार हुँदै आएको छ। दिनदिनै कारोबार रकमले नयाँ रेकर्ड कायम गर्न थालेपछि नयाँ लगानीकर्ता हौसिएका थिए।
केही साता अघि एक बजार विश्लेषकले बढ्दो बजारलाई 'ब्लडी बुल' को संज्ञा दिएका थिए। लगानीकर्ताहरुले गएका दिनमा आर्जन भएको नाफा पनि गुम्ने अवस्था देखेपछि खरिदकै मूल्यमा बिक्री गर्न थाले। नकारात्मक सर्किट लाग्दा पनि एक महिना अगाडि सेयर खरिद गरेका दोब्बर नाफामा थिए।
यसै अवधिमा बजार सुधार हुने अस्त्र अर्थमन्त्री डा. युवराज खतिवडालाई बनाइएको थियो। खतिवडा हट्ने हल्लाले बजारमा राम्रै सुधार आएको पनि थियो। तर अझै पनि उनका विषयमा सरकारले ठोस निर्णय गरिसकेको छैन। सोमबार बजारमा अर्को हल्ला चलाइयो- कोरोनाको असर अब नेपालमा पनि पर्दैछ। तर यसको पनि उपयुक्त आधार भने देखिइसकेको छैन।
राम्रो आधार बिना नै अस्वभाविक सुधार नै बजार घट्नुको प्रमुख कारण भएको बजार विश्लेषक दीलिप मुनाकर्मी बताउँछन्। 'हिजोका दिनमा जसरी बजार बढिरहेको थियो। त्यो नै प्राकृतिक थिएन। र अहिले बजार अस्भाविक रुपमा घटिरहेको छ यसले लगानीकर्ताहरुलाई थप सक बनाएको छ,' मुनाकर्मीले भने। दुई दिनमा १ सय ३६ अंकले बजार तल घट्दा पनि तीन महिनाअघिको तुलनामा बजार साढे तीन सय अंकभन्दा बढीले बढेको छ।
आइतबार स्वभाविक रुपमा घटेको अनुमान लगाइएको तर सोमबार पनि घट्ने क्रम जारी रहँदा नयाँ लगानीकर्ता आत्तिएर सेयर बिक्री गर्न पुगेका हुन्। यसको प्रमुख कारण ती लगानीकर्ताहरूले विगत तीन वर्षको अवधिमा सेयर बजार १ हजार ८ सय ८२ अंकबाट ११ सय अंकमा झरेको देखेका छन्।
केही ब्रोकरहरूका अनुसार बजारमा पेनिक सेल गर्नेमा अधिकांश नवप्रवेशी लगानीकर्ता छन्। तर गएका दिनको कारोबार रकम हेर्दा बजारमा केही दिन पेनिक सेलसँगै नाफा बुक भए पनि बजार सुधारकै क्रममा रहेको उनीहरू बताउँछन्। तर विश्लेषकहरुका अनुसार बजार सिधै अस्वभाविक रूपमा घटिरहने वा बढिरहने अवस्थाबाट बजार विस्तारै सुधार हुने मेकानिजमको विकास गर्नु पर्नेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
