काठमाडौं- बिहीबार दोस्रो बजारमा दुईवटा नयाँ रेकर्ड कायम भएको छ। कारोबार धेरै हुनुका साथै बजार पुँजीकरण अहिलेसम्मकै धेरै कायम भएको छ। बिहीबार बजार पुँजीकरण २० खर्ब ८३ अर्ब रूपैयाँ पुगेको हो।
यससँगै नेपालको पुँजी बजार कुल गाह्रस्थ उत्पादनको ६० प्रतिशत पुगेको छ। अर्थ मन्त्रालयका अनुसार बजार पुँजीकरण कूल गाह्रस्थ उत्पादन (३४ खर्ब ६४ अर्ब रूपैयाँ प्रचलित मूल्यका आधारमा)को तुलनामा ६० प्रतिशत पुगेको हो।
विश्व बैंकका अनुसार बजार पुँजीकरण कुल गाह्रस्थ उत्पादनको ५० प्रतिशत कम हुनुलाई न्यून मूल्यांकन मानिन्छ। त्यस्तै ५० देखि ७५ प्रतिशत हुनुलाई सामान्य मानिन्छ। साथै बजार पुँजीकरण कूल गाह्रस्थ उत्पादनको आकारभन्दा ठूलो भएमा अधिक मूल्यांकन भएको मानिन्छ। अहिले बजार बढ्दो क्रममा छ। हरेक दिन नयाँ रेकर्ड कायम गर्ने गरी बजारमा कारोबार भइरहेकाले बजारको आकार अहिलेको तुलनामा केही बढ्ने देखिन्छ।
शेयर बजारका लगानीकर्ताले ३ महिनाको अवधिमै ६ खर्ब ३३ अर्ब रूपैयाँ कमाएका छन्। ३ महिनाअगाडि मंसिर १० गते बजार पुँजीकरण १४ खर्ब ५० अर्ब रूपैयाँमात्र थियो। सो समयमा नेप्से सूचक ११०९.१७ अंक थियो।
नेप्से सूचक सबैभन्दा बढी हुँदा बजार पुँजीकरण २० खर्ब ७० अर्ब रूपैयाँ थियो। सूचीकृत कम्पनीको चुक्ता पुँजी त्यतिबेलाको तुलनामा अहिले ३ गुणा बढेको छ। सूचीकृत शेयर संख्या बढ्दा बजार पुँजीकरण २४९ अंक कम हुँदै पहिलेको भन्दा धेरै देखिएको हो। ३ महिनाको अवधिमा शेयर बजार ५ सय २३ अंकले सुधार भएर १६३२.१७ अंक पुगेको छ।
पछिल्ला दिनहरूमा वाणिज्य बैंकको सूचकमा सुधार आएसँगै बजार पुँजीकरण पनि बढिरहेको छ। एक सातामै वाणिज्य बैंकको सूचक २३८ अंकले सुधार भएको छ।
शेयर बजार लगातार घट्दा विगतमा लगानीकर्ताहरूले अर्बौं रूपैयाँ गुमाएका थिए। लगानीकर्ताहरूको पुरानो घाटा पुर्ति हुन अझै केही समय लागे पनि विगत दुई वर्षको अवधिमा शेयर किन्नेहरूले रातारात पैसा कमाएको बजार विश्लेषक बलराम रिमालले बताए। एक वर्षको अवधिमा छिरेका नयाँ लगानीकर्ता सबैभन्दा बढी लाभांन्वित छन्। यसै अवधिमा लघुवित्त र बीमा कम्पनीमा शेयर किन्नेहरूले करोडौं कमाइसकेका छन्।
अहिले अस्वभाविकरूपमा बढिरहेको बजारमा पनि लगानीकर्ताहरू फस्ते सम्भावना धेरै हुने लगानीकर्ताहरू बताउँछन्। बजार कति विन्दूसम्म सुधार हुन्छ कसैले पनि भन्न सक्दैन। आफ्नो क्षमता भन्दा बढी लगानी गर्नेहरू यस्तो अवस्थामा सबैभन्दा बढी फस्ने गरेका छन्। शेयर बजार उच्चतम विन्दूमा पुगेको बेलामा शेयर किन्नेहरू अझै पनि घाटामा छन्।
जसले बढ्दो नोक्सानलाई रोक्न सकेनन्। बजार सुधार हुँदा नाफा बुक गर्ने र घट्दो बजारमा नोक्सान रोक्न सक्नेहरू मात्रै सुरक्षित रहन सक्छन्। त्यसैले यस्तो समयमा लगानीकर्ताहरू एकदमै संयमित हुनुपर्ने विश्लेषकहरू बताउँछन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
