काठमाडौं- एक मात्र पूर्ण सरकारी स्वामित्वको राष्ट्रिय वाणिज्य बैंकको प्राथमिक शेयर निष्काशनको बहस सुरु भएको छ। अर्थमन्त्री डा युवराज खतिवडाले राष्ट्रिय वाणिज्य बैंकलाई पनि मुलुकका कानुन लागु हुने बताएका छन्।
कम्पनी ऐन र बैंक तथा वित्तीय संस्था सम्बन्धी ऐन अनुसार बैंक तथा वित्तीय संस्थाहरुले चुक्ता पुँजीको ३० प्रतिशत शेयर सर्वसाधारणलाई जारी गर्नु पर्छ। यसै सन्दर्भमा खतिवडाले वाणिज्य बैंकको शेयर स्वामित्वको विषय मन्त्रालयमा छलफल भैरहेको बताएका छन्।
राष्ट्रिय वाणिज्य बैंकको ५५ औ वार्षिकोत्सवको अवसरमा मन्त्री खतिवडाले वाणिज्य बैंकलाई पनि प्रचलित ऐनबाट अछुतो नरहने बताएका छन्। उनले भने, 'अब यो बैंक कम्पनी कानुनअनुसार नै चल्छ। बैंक तथा वित्तीय संस्था ऐनअनुसार नै चल्ने हो।'
उनले थपे, 'त्यसो भएको हुनाले यस बैंकको शेयर स्वामित्व कस्तो हुन्छ भन्ने विषयमा सरकारमा हामी छलफल गर्दै छौ।' उनले यसै भन्दै गर्दा कम्पनीको न्यूनतम ३० प्रतिशत शेयर सर्वसाधारणका लागि छुट्टाउनु पर्छ।
वाणिज्य बैंक पुँजीका हिसावले बलियो भएको हुँदा आइपिओमा जाने नजाने, जानु पर्छ पर्दैन भन्ने विषयमा छलफल भैरहेको खतिवडाले बताए। उनले भने, 'यो छलफलको विषय छ। पुँजीको हिसाबले यसलाई पर्दैन।'
मन्त्री खतिवडाले थपे, '२५ अर्बको पुँजी भएको बैंकलाई बजारबाट पुँजी उठाउनु त पर्दैन। तर के हो भने मुलुकका कानुन त सबैलाई लागु हुन्छन्। कि त हामीले कानुन लागु नहुने अवस्थाको शिर्जना गर्न सक्नु पर्यो। होइन भने भएको कानुन लागु गर्नु पर्यो। यो काम चाहि सरकारको हो। यसमा हामी गृहकार्य गर्दै छौँ।'
पछिल्लो समय वाणिज्य बैंकलाई पनि बैंक तथा वित्तीय संस्था सम्बन्धी ऐन लागू हुने बहस चल्दै आएको छ। यदि ऐनअनुसार चल्ने हो भने वाणिज्य बैंकले पनि सर्वसाधारणका लागि शेयर निष्काशन गर्नु पर्ने बहस चल्दै आएको थियो। केही समय अगाडि सर्वसाधारण शेयर स्वामित्व भएको एनआइडिसीलाई गाभे सँगै वाणिज्य बैंकको शेयरलाई पनि सर्वसाधारणमा कन्भर्ट गर्नुपर्ने आवास उठ्दै आएको छ।
तर सरकारले देशमा एउटा वाणिज्य बैंक सरकारी स्वामित्वकै हुनु पर्ने धारणा राख्दै आएको छ। मन्त्री खतिवडाले यसै कार्यक्रममा आफुले पहिले देखिनै देशमा एउटा वाणिज्य बैंक सरकारी स्वामित्वमा हुनै पर्ने धारणा व्यक्त गरेका थिए। उनले भने 'मैले पहिलेदेखिनै भन्दै आएको कुरा के हो भने सरकारलाई सारो गाह्रो परेको वेलामा सहयोग गर्ने एउटा राष्ट्रिय स्तरको वाणिज्य बैंक सरकारी स्वामित्वकै हुनु पर्छ।'
मन्त्री खतिवडाले यस्तो अभिव्यक्ती दिए सँगै वाणिज्य बैंकको शेयर स्वामित्वको विषयलाई लिएर थप छलफल सुरु हुनेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1770267531.png)
-1770262754.png)
-1764146706.png)
-1770196062.png)
