काठमाडौं- मूल्य अभिवृद्धि कर (भ्याट) फिर्ता पाउनुपर्ने माग गर्दै आएका व्यवसायीहरूप्रति लक्षित गर्दै अर्थ मन्त्रालयका राजस्व सचिव शिशीरकुमार ढुङ्गानाले भ्याट फिर्ताको सम्भावना नरहेको प्रष्ट पारेका छन्।
नेपाल उद्योग वाणिज्य महासङ्घले ६८औं भन्सार दिवसका अवसरमा आयोजना गरेको कार्यक्रममा सचिव ढुङ्गानाले भ्याट फिर्तासम्बन्धी विषयमा बहस नै नगर्न आग्रह गरेका हुन्।
‘भ्याट फिर्ता हुँदैन, तर स्वदेशी उद्योगलाई संरक्षण गर्न सरकार तयार छ,’ उनले भने, 'भ्याट फिर्ता दिए मात्रै उद्योग चल्ने र अन्य संरक्षण दिँदा उद्योग नचल्ने भन्ने हुँदैन।'
‘अन्य हरेक विकल्पमा छलफल गर्न सरकार आतुर छ। तर, भ्याट फिर्तामै गएर व्यवसायी अड्किनु भएको छ,’ सचिव ढुङ्गानाको भनाइ थियो, ‘सरकार पुरानो व्यवस्थामा फर्किँदैन। यसमा ढुक्क हुनुहोला।’
'सरकारले स्वदेशी उद्योग एक तहको संरक्षण दिइरहेको छ। त्यसमा अझै पनि संरक्षण चाहिन्छ भने त्यसमा पछि छलफल गर्न सकिन्छ,' उनले उल्लेख गरे।
कपडा उद्योगी, कवाडी, मोबाइल, हस्तकला, टुर अपरेटर, फ्रेट फवार्डस् एसोसिएसनले सरकारसँग भ्याट फिर्ताको माग गर्दै आएका थिए।
कार्यक्रममा नेपाल उद्योग वाणिज्य महासंघकी अध्यक्ष भवानी राणाले सरकारले धेरै ‘कम्प्लाइन्स’ एकै पटक आउँदा उद्योगी/व्यवसायी हतोत्साहित भएको बताइन्। ‘एकै पटक धेरै एन्टिबायोटिक दियो भने त्यसको नकारात्मक असर देखिन्छ,’ उनले भनिन्, ‘असर नगर्ने गरी एन्टिबायोटिक खायो भने मात्रै त्यसले रोग निको पार्छ।’
महासंघका वरिष्ठ उपाध्यक्ष शेखर गोल्छाले सरकारले असल नियतले सन्दर्भ मूल्यको व्यवस्था गरेपनि त्यसको गलत अभ्यास भएको बताए। ‘व्यवसायीलाई सन्दर्भ मूल्य देखाएर तर्साउने काम भइरहेको छ,’ उनले भने, ‘असल नियतले सन्दर्भ मूल्य राखिए पनि त्यसको गतल अभ्यास भइरहेको छ।’
नेपाल कपडा उद्योग सङ्घका अध्यक्ष शैलेन्द्र प्रधानले मन्त्रिपरिषद् बैठकले एक वर्ष अघि स्वीकृत गरेको सुविधासमेत नपाएको बताएका थिए। (फाइल तस्बिर)
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1771592819.png)
