जनकपुर- १३औं दक्षिण एसियाली खेलकुद प्रतियोगिता (साग)मा भाग लिन जनकपुर आएका खेलाडीहरुलाई मिथिला संस्कृति अनुसार स्वागत गर्ने तयारी जिल्ला खेलकुद विकास समिति धनुषाले गरेको छ।
१३औं दक्षिण एसियाली खेलकुद (साग) को कुस्ती प्रतियोगितामा भाग लिन आएका नेपाली तथा विदेशी खेलाडीहरुलाई शुक्रबार उद्घाटन हुने दिन मैथिली गीत र नृत्यले स्वागत गर्ने तयारी रहेको समितिका अध्यक्ष कमल किशोर चौधरीले जानकारी दिए।
जनकपुरमा आयोजना हुने उद्घाटन समारोहका लागि भव्य सांस्कृतिक कार्यक्रम आयोजना गर्न मिथिला नाट्य कला परिषद् (मिनाप) जनकपुरसँग ७० हजार रुपैयाँमा सम्झौता गरिएको छ।
‘सागका सहभागीलाई मिथिला संस्कृतिअनुसार स्वागत गर्न मिथिला नाट्यकला परिषद्लाई जिम्मा दिएका छौं,’ चौधरीले भने। उद्घाटन खेलकै दिन साँझ प्रतियोगितास्थलमा आतिशबाजीको समेत तयारी गरिएको छ।
जनकपुरमा हुने कुस्ती खेलमा २० स्वर्ण पदकको लागि पाँच राष्ट्रका ५५ खेलाडीले प्रतिस्पर्धा गर्नेछन्। सबैभन्दा बढी बंगलादेशबाट पुरुषतर्फ १० र महिलातर्फ १० गरी २० जना खेलाडी सहभागी हुन लागेको हो। पाकिस्तानले पुरुषतर्फ मात्रै सहभागी जनाउन लागेको हो। पाकिस्तानले सातजना पुरुष खेलाडीलाई सहभागी गराउन लागेको चौधरीले बताए।
प्रतिस्पर्धाको क्रममा खेलाडीलाई चोटपटक समेत लाग्न सक्ने भएकाले कभर्ड हलमै स्ट्याण्डबाई डाक्टरको टोली राख्ने तयारी गरिएको छ। जनकपुरस्थित जानकी मेडिकल कलेजका दुई डाक्टर, एक फिजियोथेरापिस्ट, दुई स्टाप नर्स र दुई सहयोगी स्ट्याण्डबाई कभर्ड हलमा रहने अध्यक्ष चौधरीले जानकारी दिए।
कुस्तीमा भारत, बंगलादेश, पाकिस्तान, श्रीलंका र नेपाल गरी ५ राष्ट्रका खेलाडी सहभागी हुनेछन्।
तस्वीरः
.png)
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
