काठमाडौँ- उपेन्द्र यादव नेतृत्वको संघीय समाजवादी पार्टी नेपाल र डा. बाबुराम भट्टराई नेतृत्वको नयाँ शक्ति पार्टी नेपाल अब एकै दल भएका छन्। सोमबार प्रज्ञा प्रतिष्ठानमा औपचारिक एकतासभाको आयोजना गरेर एताको घोषणा गरियो। उनीहरुले नयाँ पार्टीको नाम समाजवादी पार्टी नेपाल राखेका छन्।
मधेशका मुद्दामा केन्द्रित राजनीति गरिरहेको फोरम र माओवाद त्यागेर वैकल्पिक शक्ति बन्न खोजिरहेको नयाँ शक्तिबीच समाजवादसहित अघि बढ्ने सहमति भएको हो।
दुई वर्षदेखि चलेको वार्तालाई निष्कर्षमा पुर्याउँदै दुई दिनअघि पार्टी एकीरकण गर्ने सहमति भएको थियो।
एकता प्रक्रियामा मिहिन ढंगले सलग्न भएर त्यसलाई निष्कर्षमा पुर्याउने मध्येमा पर्छन्, एकिकृत पार्टी समाजवादी पार्टी नेपालका सहअध्यक्ष राजेन्द्रप्रसाद श्रेष्ठ। पार्टी एकता घोषणा समारोहस्थलमै श्रेष्ठसँग नेपाल लाइभका रामकुमार डिसीले एकीकृत पार्टीको सांगठानिक स्वरुपका विषयमा गरेको संक्षिप्त संवादः
यो एकताको सन्देश के हो?
यो एकताको सन्देश भनेको, जस्तो समाज उस्तै राज्य बनाउने हाम्रो अभियानको सफलता हो। नेपाली विशेषतासहितको एउटा पार्टी जन्मेको छ।
हिमाल, पहाड र तराईं, पूर्व-पश्चिम सबैलाई ओगेटेको, एउटा यस्तो पार्टी जुन सिद्धान्तमा पनि नयाँ, कार्यशैलीमा पनि नयाँ, संगठनात्मक शैलीमा पनि नयाँ र समानुपातिक-समावेशी प्रतिनिधित्वमा पनि नयाँ पार्टी बनेको छ।
एकीकृत पार्टीको केन्द्रीय समिति कति सदस्यीय हुन्छ? कार्यविभाजन कसरी गर्नु भएको छ?
आज हामीले २५ जनाको कार्यकारिणी समितिको घोषणा गरेका छौं। त्यसमा २ सहसचिवको नियुक्ति हुन बाँकी छ। त्यो पनि हामी चाँडै टुंग्याउँछौं।
नयाँ पार्टीको केन्द्रीय समितिमा दुवै पार्टीमा भएका केन्द्रीय सदस्यहरु रहनुहुन्छ। संघीय समाजवादी फोरम नेपालमा रहेका २ सय ७८ जना र नयाँ शक्ति नेपालका १ सय ५१ जना स्वतः केन्द्रीय सदस्य हुनुभएको छ।
एकीकृत पार्टीको संसदीय दलको नेता को हुन्छ?
हामी बसेर टुंग्याउँछौं, त्यसमा कुनै समस्या छैन।
अनि पार्टीको चुनाव चिन्ह नि? झन्डा कस्तो बनाउनु भएको छ?
यसबारे एकीकृत पार्टीको बैठक बसेर निर्णय हुन्छ।
झन्डाको विषय भने टुंगिएको छ।
झन्डामा हामीले हरियो र रातो रङ प्रयोग गरेका छौं। माथि रातो हुन्छ भने तल हरियो रङ हुन्छ। ती दुई रङको बीचमा भने तारा राखेका छौं।
हरियो रङ हामीले जातीय मुक्ति र रातो रङ वर्गीय मुक्ति स्वरुप प्रयोग गरेका छौं। जैविक विविधता र पहिचानलाई हरियो रङले प्रतिनिधित्व गर्ने छ भने समाजवाद, क्रान्तिजस्ता कुरालाई रातो रङले प्रतिनिधित्व गर्नेछ। उज्यालोको प्रतीक स्वरुप हामीले तारा राखेका छौं।
.jpg)
राजपाले तपाईंहरुलाई एकताका लागि एक दिन पर्खिनुहोस् भनेको रहेछ। तर, तपाईंहरुले त्यति स मय पनि पर्खिन मान्नु भएन भन्ने छ नि?
म वार्ता समितिको पनि संयोजक पनि भएको नाताले के भन्न चाहान्छु भने, मेरो पटक-पटक उहाँहरुसँग वार्ता भएको थियो। टिममा बसेर कुरा गर्ने पनि सहमति भएको थियो।
उहाँले को-को आउने भन्ने कुरा पनि प्रष्ट गरिदिनु भएन। हामीले तीनअघि नै पत्र लेखेका थियौं। पत्रको जवाफ आउन नै डेढ महिना लाग्यो। जब हामीले एकिकरण घोषणाको तयारी गर्यौं। त्यसपछि मात्रै उहाँहरुले हामी पनि आउँछौं भन्नुभयो। त्यसकारण अहिले उहाँहरुलाई समेट्न नसकिएको हो। उहाँहरुलाई म अझैं पनि एकतामा आउन आग्रह गर्छु।
.jpg)
राजपासँग मात्रै होइन, हाम्रो सिद्धान्तलाई अंगीकार गर्न तयार हुने विवेकशील, राष्ट्रिय जनमुक्ति, थरुहट, लिम्बुवान जोसुकैसँग पनि हामी एकतावद्ध हुन चाहान्छौं। हामीले प्रष्ट गरेका छौं-सिद्धान्त, नीति र बिचार मिल्नेसँग पार्टी एकता हुन्छ।
मुद्दा र माग मात्रै मिल्यो भने कार्यगत एकता हुन्छ।
पार्टीको आगामी कदम के हुन्छ?
संघीय लोकतान्त्रिक गणतन्त्रलाई संस्थागत गर्ने, उत्पीडित र विपन्न वर्गको मागलाई समेटेर संविधान संसोधनका लागि जन संघर्षका माध्यमबाट यो देशलाई अग्रगामी परिर्वतनको बाटोमा लैजान्छौं।
सबै पार्टीले समाजवादको कुरा गरिरहेका छन्। तपाईंहरुको समाजवाद चाहिँ कस्तो हो?
हाम्रो सिद्धान्तमा दुईवटा मुख्य कुरा छन्। एउटा संघीयता र अर्को समाजवाद। संघीयता पनि नेपाली मोडेलको हुनुपर्यो, समाजवाद पनि नेपाली मोडेलको हुनुपर्यो। नेपालको विशिष्ट स्थितिमा यसलाई हामीले समुन्नत संघीय समाजवाद भनेका छौं। यो नेपाली समाज परिर्वतनको हाम्रो आफ्नो मौलिक बाटो हो।
.jpg)
यसले नै नेपालमा उत्पीडित राष्ट्रियता, विपन्न र गरिब वर्गलाई मुक्ति दिलाउँछ।
हाम्रो नारा हो-राष्ट्रिय मुक्तिका लागि संघीयता र वर्गीय मुक्तिका लागि समाजवाद।
सरकारको आ लोचना गरिरहनु भएको छ। अब सरकार छोड्नुहुन्छ?
संविधान निर्माणदेखि नै नेकपा (सरकारको नेतृत्व गरेको नेपाल कम्युनिस्ट पार्टी)सँग हाम्रो मतभिन्नता छ। उनीहरुसँग मत मिलेर हामी संयुक्त सरकारमा गएका होइनौं।
हामी त २ बुँदे सम्झौता गरेर सरकारमा गएका हौं। त्यो माग पूरा हुन्छ वा त्यो अनुसारको आचरण उहाँहरुले गर्नुहुन्छ भने हामी यो सरकारलाई निरन्तरता दिन्छौं। त्यो गर्नुभएन भने हामी सरकार छोड्छौं।
सम्बन्धित समाचार
उपेन्द्र यादव : अन्तरिम संविधान जलाएपछि सधैं चर्चामा
एउटा पसल थापिहालौं, थोत्रो माल बेचिहालौं भनेर एकीकरण गरिएको होइन : बाबुराम भट्टराई
विभेदरहित नेपाल निर्माण गर्न पार्टी एकता गरेका हौं : उपेन्द्र यादव
प्रदेशको संख्या बढाएर '१० प्लस १' पुर्याउन बाबुराम–उपेन्द्र नेतृत्वको समाजवादी पार्टीले दबाब दिने
संघीय समाजवादी फोरम र नयाँ शक्तिबीच एकता घोषणा, बन्यो 'समाजवादी पार्टी नेपाल'
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
