काठमाडौं– इटाली तथा लाजियोका पूर्वस्टार स्ट्राइकर सिरो इम्मोबिलेले १७ वर्ष लामो व्यावसायिक फुटबल करिअरबाट सन्न्यास लिएका छन्।
फ्रेन्च क्लब पेरिस एफसीले शुक्रबार ३६ वर्षीय इम्मोबिलेले अब आफ्नो अधिकांश समय परिवार र प्रियजनसँग बिताउने इच्छा व्यक्त गर्दै खेलाडी जीवन टुंग्याउने निर्णय गरे जानकारी दिएको हो।
इम्मोबिले गत फेब्रुअरीमा बोलोग्नाबाट पेरिस एफसीमा आबद्ध भएका थिए। उनले फ्रेन्च क्लबका लागि १२ लिग–१ खेल खेल्दै दुई गोल गरेका थिए।
क्लब फुटबलमा इम्मोबिलेले विभिन्न क्लबबाट ५९९ खेल खेल्दै ३०६ गोल गरेका छन्। इटालीको राष्ट्रिय टोलीबाट उनले ५७ खेलमा १७ गोल गरे। इम्मोबिलेको व्यावसायिक करिअरको सबैभन्दा सफल अवधि लाजियोमा बित्यो। रोमस्थित क्लबका लागि आठ सिजन खेल्दा उनले ३४० खेलमा २०७ गोल गरे। उनी लाजियोका सर्वाधिक गोलकर्ता समेत बने।
लाजियोबाट उनले एक कोपा इटालिया र दुई इटालियन सुपर कपको उपाधि जिते। उनी चार पटक सिरिए ‘टप स्कोरर’ बनेका थिए।
सन् २०२० मा इम्मोबिलेले युरोपियन गोल्डेन शू जितेका थिए। उक्त सिजन उनले सिरिएमा ३६ गोल गर्दै एकै सिजनमा ३६ गोल गर्ने गोन्जालो हिग्वाइनको कीर्तिमान बराबरी गरेका थिए।
इम्मोबिले सन् २०२१ मा सम्पन्न युरो २०२० जित्ने इटालीको टोलीका महत्त्वपूर्ण सदस्य थिए। कोभिड–१९ महामारीका कारण एक वर्ष ढिलो भएको प्रतियोगितामा उनले दुई गोल गरेका थिए।
इटालीले लन्डनस्थित वेम्बली रंगशालामा भएको फाइनलमा इंग्ल्यान्डलाई पेनाल्टी सुटआउटमा पराजित गर्दै उपाधि जितेको थियो। इम्मोबिलेले करिअरमा इटालीका युभेन्टस, पेस्कारा, जेनोआ र टोरिनोका साथै जर्मनीको बोरुसिया डर्टमन्ड, स्पेनको सेभिया र टर्कीको बेसिक्टासबाट समेत खेले।
१७ वर्षको व्यावसायिक करिअरमा क्लब तथा राष्ट्रिय टोलीबाट कुल ३२३ गोल गरेका इम्मोबिले आफ्नो पुस्ताका उत्कृष्ट इटालियन स्ट्राइकरमध्ये एकका रूपमा फुटबलबाट बिदा भएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786875773.jpg)
-1786602170.png)
-1786513116.png)
-1788425345.png)
