काठमाडौं– चालू आर्थिक वर्षको ६ महिना (साउनदेखि पुस मसान्तसम्म) मा ८ खर्ब ३१ अर्ब ३५ करोड रुपैयाँ बराबरको वैदेशिक व्यापार भएको केन्द्रीय भन्सार विभागले जनाएको छ।
गत आर्थिक वर्ष (२०७९/०८०)को सोही अवधिमा ८ खर्ब ७३ अर्ब ४८ करोड रुपैयाँ बराबरको वैदेशिक व्यापार भएको थियो। जसअनुसार गत वर्षको तुलनामा यस वर्ष ३.४७ प्रतिशतले वैदेशिक व्यापार घटेको छ।
यस्तै चालू आर्थिक वर्षमा ७ खर्ब ६८ अर्ब १७ करोड रुपैयाँ बराबरको वस्तु आयात भएको छ भने ७४ अर्ब ९७ करोड रुपैयाँ बराबरको वस्तु निर्यात भएको छ। जस अनुसार आयातको ९१.११ प्रतिशत रहेको छ भने ८.८९ प्रतिशत निर्यातको हिस्सा रहेको छ।
गतवर्षको सोही अवधिमा ७ खर्ब ९२ अर्ब ६७ करोड रुपैयाँ बराबरको आयात भएको थियो भने ८० अर्ब ८१ करोड रुपैयाँको निर्यात भएको थियो।
जसअनुसार गतवर्षको तुलनामा यसवर्ष आयातमा ३.०९ प्रतिशतले कमी आएको छ भने ७.२३ प्रतिशतले कमी आएको पाइएको छ।
तर वैदेशिक व्यापार घट्दा पनि भन्सार विन्दुबाट संकलन हुने राजस्व भने बढेको पाइएको छ। यो वर्ष ६ महिनामा भन्सार राजस्वबाट २ खर्ब ७० करोड बराबर राजस्व संकलन गरेको छ।
विभागका निर्देशक तथा सूचना अधिकारी पुण्यविक्रम खड्काले चालू वर्ष आयात कम भए पनि राजस्व संकलन बढेको बताए। गत वर्ष लक्ष्यभन्दा निकै कम राजस्व संकलन भएको थियो।
तर, यो वर्ष केही सुधार भएको उनको भनाइ छ। यस्तै आगामी दिनमा राजस्व संकलन बढ्न सक्ने उनको दाबी छ।
सरकारले गत आर्थिक वर्ष ५ खर्ब ३० अर्ब राजस्व संकलन गर्ने लक्ष्य लिएको थियो। त्यसमध्ये आयातबाट ५८.४२ प्रतिशत मात्रै लक्ष्य पूरा भएको थियो। गत आर्थिक वर्षमा सरकारले १ खर्ब ८२ अर्ब ८४ करोड रुपैयाँ बराबर राजस्व उठाएको थियो।
चालू वर्षमा विभागले ६ महिनाको अवधिमा ७७ करोड १७ लाख ३५ हजार रुपैयाँ अनुगमन शाखाले प्रत्यक्ष अनुगमन गरी थप राजस्व असुली गरेको छ। चालू वर्षको कुल लक्ष्यको तुलनामा ६ महिनामा ३१ प्रतिशत राजस्व असुली भएको छ।
यसवर्ष सरकारले कुल भन्सार राजस्व ६ खर्ब २७ अर्ब ७५ करोड उठाउने लक्ष्य राखेको छ। गतवर्षको सोही अवधिमा विभागले १८ करोड ८६ लाख ९२ हजार रुपैयाँ थप राजस्व असुली गरेको थियो। यो वर्ष गत आवको तुलनामा ५८ करोड ३० लाख ४३ हजार रुपैयाँ बढी अनुगमन गरी असुली गरेको छ।
सुन, डिजेल र एलपी ग्यास घट्यो, पेट्रोल र विद्युतीय साधनको आयात बढ्यो
चालू वर्षको ६ महिनामा डिजेल र एलपी ग्यासको आयात गत आर्थिक वर्षको तुलनामा कमी आउँदा विदेशिने रकम घटेको छ। तर, पेट्रोल र विद्युतीय साधन आयातमा भने गत आवको तुलनामा ठूलो रकम बाहिरिएको छ।
चालू वर्षमा सुन आयातमा ठूलो गिरावट आएको छ। पुससम्म ११ अर्ब ८९ करोडको सुन आयात भएको विभागले जनाएको छ। गत वर्षको सोही अवधिमा २९ अर्ब २० करोडको सुन आयात भएको थियो।
यस्तै ६६ अर्ब ४९ करोडको डिजेल आयात भएको छ। गत आवको सोही अवधिमा ७० अर्ब ११ करोडको डिजेल आयात भएको थियो। चालू वर्षको ६ महिनामा पेट्रोल आयात हुँदा ३३ अर्ब ९२ करोड बाहिरीएको छ।
गतवर्ष सोही अवधिमा ३३ अर्ब ५४ करोडको पेट्रोल आयात भएको थियो। चालू वर्षको ६ महिनामा २५ अर्ब ४६ करोडको एलपी ग्यास आयात भएको छ। गतवर्ष ६ महिनामा २८ अर्ब २० करोडको आयात भएको थियो।
विद्युतीय सवारीसाधन (जिप, कार र भ्यान) आयातमा ठूलो वृद्धि भएको छ। गत वर्ष ४ अर्ब ९३ करोड रुपैयाँका यस्ता सवारीसाधन आयात भएकोमा यो वर्ष १३ अर्ब १२ करोडको आयात भएको विभागको तथ्यांक छ। गतवर्ष ५ अर्ब ५३ करोडको एचआर सिट आयात भएकोमा यो वर्ष २२ अर्ब ३६ करोडको आयात भएको छ।
पाम तेल निर्यात घट्यो चिया, कफी र अलैंची बढ्यो
चालू वर्षको ६ महिनामा प्रशोधित पाम तेल निर्यातमा ठूलो गिरावट आएको छ। गतवर्ष १३ अर्ब ९ करोडको निर्यात भएको थियो। चालू वर्षको सोही अवधिमा २ अर्ब ९० करोड रुपैयाँको निर्यात भएको छ।
यस्तै फलामे पाता, तयारी कपडा, अलैंची, चियाकफी प्लाइउडजस्ता वस्तु निर्यात बढेको छ। सेन्थेटिक यार्न, ऊन गलैंचालगायत वस्तु निर्यात घटेको छ।
चालू वर्षको ६ महिनामा ७ अर्ब २५ करोड बराबरको चिया कफी निर्यात भएको छ। गतवर्षको सोही अवधिमा ५ अर्ब ५६ करोड रुपैयाँ बराबरको चिया कफी निर्यात भएको थियो। गत वर्षको ६ महिनामा ३ अर्ब ४१ करोड रुपैयाँ बराबरको अलैंची निर्यात भएको थियो।
चालू वर्षको सोही अवधिमा ३ अर्ब ९१ करोड रुपैयाँ बराबरको अलैंची निर्यात भएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
